Read ngakarimojong 1 Ŋirw. 6 Bible Online

1 Ŋirw. 6 - ngakarimojong bible

1 Ŋirw. 6

¹Ekaku a ŋikaru a ŋamiae a ŋaomwon, ka ŋatomoniuni, kedaut Ŋisirael awotun alo Ijipit, ekaru ŋolo a ŋitomon ipukat Solomon Isirael, elap ŋolo a ŋiarei ŋolo enyaritae Sip, kisyak Solomon akiduk Akai ke Ekapolon.

²Arae lo lopite ŋolo epimitere Akai ke Ekapolon ŋina abu erwosit Solomon toduk: Aoyau keŋ alosepyon arae ŋimitae ŋatomoniarei ka ŋikanikaarei, alowae a ŋolo ka akou ka neni iteotor arae ŋimitae ŋikanikaomwon ka aoyau keŋ alokwap tari kidiama arae ŋimitae ŋitomon ka ŋiuni ka atutubet

³Arae ŋisepyon a agule a ŋina alokiŋaren Akai ka Akuj ŋimitae ŋiomwon ka atutubet, aoyau a agule a ŋin alowae a ŋolo alokiŋaren arae ŋimitae ŋikanikaomwon, ariyan ŋimitae ŋul ka ŋulu epimito aoyau a Akai ka Akuj alokoku ka alokiŋaren.

⁴Kiwuanak Solomon narwatata ŋina Akai ka Akuj ŋidirisae ŋulu adidiŋ.

⁵Todukok aduketait ace diyete arwatata ka Akai a ŋin a daadaŋ kisiryam, alosepyon ka alokaku, min tooma aduketait ŋin akibois ŋina asegan ka akibois ŋina asegan nooi. Kiwuanak ŋagulei naduketait ŋin kiryam.

⁶Arae alolomu a ŋagulei a ŋuna alokwap anaduketait a ŋin ŋimitae ŋiarei arae ŋuna alokidiama ŋuna alokwap ŋimitae ŋulu aapiyarit ŋiuni, ido ŋuna alokidiama ŋunaarei ŋun arae ŋimitae ŋiuni. Kikamanak ŋarwatatain ŋun daadaŋ kiryam ikotere nyegwaŋar arwatata ŋina alotooma narwatata ŋina ka Akai ka Akuj.

⁷Adukio Akai ŋin a ŋamoru a ŋuna sek etiyatae ejok aneni abokere ŋamoru, ikotere tomam enyondo, kori ibore daadaŋ ŋini erwo alo Kai ka Akuj apaki ŋina edukere.

⁸Ayai epuke ka agule a ŋina a alokidiama ŋina alokwap lowae ŋolo alo kwap Akai ka Akuj alosi ituŋanan nagule ŋin emyat ŋadoketa ŋuna elugulugoorito kidiama, kiropo a nen tomek nadoketa tolot nagule ŋina a ŋauni alokidiama.

⁹Aŋun, abu Solomon toduk Akai ka Akuj kirikak, kiriwonok kidiama, ka topetanak ŋakito ŋuna enyaritae Cedar.

¹⁰Todukok iŋes aduketait narwatata ka Akai ka Akuj kisiryam, arae aoyau a aduketait a ŋin ŋimitae ŋiarei, ido ekamakina aduketait ŋin narwatata ŋina ka Akai ka Akuj.

¹¹Abu nai akirot ŋina ke Ekapolon bu neni a Solomon ebala,

¹²“Erae ŋakiro nu ŋuna ka Akai a na a ŋina iduki iyoŋ, ani ca kiwuap iyoŋ ŋikisila kaŋ, ŋuna atubunit ayoŋ ka tolot iwuapit ŋakiciketa kaŋ daadaŋ, esiyookini nai ayoŋ akiikinet kaŋ aneni kon, akiikinet ŋina abu ayoŋ eik Daudi papa kon.

¹³Ikiruki ayoŋ kaapei ka Ŋisirael, ido nyaesikini ayoŋ ŋituŋa kaŋ Ŋisirael.”

¹⁴Aŋun, abu Solomon toduk Akai ka Akuj kirikak.

¹⁵Topetanak ŋakito ŋuna a Cedar narwatata alotooma Akai, ameun alokwap arwatata a Akai tari neni apesitae ŋakito alokidiama Akai, toburusiya arwatata daadaŋ alotooma a ŋakito bon, ido topetanak kwap Akai daadaŋ ŋakito ŋuna anyaritae Cipres.

¹⁶Topaka iŋes agule kwap Kai. Arae aoyau a agule a ŋin alokwap tari kidiama ŋimitae ŋikanikaomwon. Apakaritae agule ŋin a ŋakito a ŋuna a Cedar. Abu iŋes todukok agule ŋin tooma Akai ka Akuj erae akibois ŋina asegan ka akibois ŋina asegan nooi.

¹⁷Amyar kidiama arae aoyau ka arwatata a agule a ŋin alokiŋaran ŋina asegan nooi ŋimitae ŋitomon a ŋikanikauni.

¹⁸Ecietae ŋakito ŋuna a Cedar ŋuna aya tooma Akai esibit ŋitwol ka ŋatur ŋuna eŋaara; arae ibore daadaŋ a nen ŋakito a Cedar bon pa atakanete ŋamoru.

¹⁹Abu Solomon kitemok akibois ŋina asegan tooma jik Akai ka Akuj ikotere iwuakini nen Asaduku ŋina ka Acamunet a Ekapolon.

²⁰Arae alolomu alosepyon a akibois a ŋina asegan a ŋin ŋimitae ŋikanikaomwon, ido anakou ka neni eteotor arae ŋimitae ŋikanikaomwon, torae aoyau alokwap tari kidiama ŋimitae ŋikanikaomwon. Esibusit Solomon nen a egolid bon. Enapinapit daŋ iŋes ŋakito a Cedar Namuroet.

²¹Esibusit Solomon tooma Akai a egolid bon, ido enenet ŋiriko ŋulu a egolid ameun alosyep a epei a Akai tari ŋoloce. Esibusit iŋes akibois ŋina asegan, ido aburusikinit egolid nen.

²²Ekaku, abu iŋes toburusik Akai daadaŋ a egolid, ikotere Akai daadaŋ ibusyar; Namuroet daŋ ŋina ayai nakibois ŋina asegan, abu Solomon toburusik egolid.

²³Kitiyau Solomon anakito a Olipa ŋitorubei a Ŋikerubim, kitowo ikes alotooma akibois ŋina asegan nooi. Arae aoyau a ŋolotorube a Ŋikerubim a ŋul ŋimitae ŋiomwon ka atutubet.

²⁴Arae aoyau a abebenukat ka apei a ŋolotorube ŋimitae ŋiarei, ŋinace daŋ arae aoyau ŋimitae ŋiarei. Arae aoyau anabebenukat ka apei tari nasalunet a abebenukat a ŋinace ŋimitae ŋiomwon ka atutubet.

²⁵Ŋoloce daŋ arae aoyau anasalunet a abebenukat ka apei tari nasalunet a ŋinace ŋimitae ŋiomwon ka atutubet. Ariyan aoyau alosepyon a ŋitorubei a ŋul ka ekwaan ikes pur.

²⁶Aoyau a epeisubuna ameun anakejen tari nakou arae ŋimitae ŋiomwon ka atutubet, ŋoloce daŋ arae aoyau keŋ ŋinapei.

²⁷Abu Solomon kiwuak ŋitorubei ŋul tooma jik Akai; apetara ŋabebenuk a ŋitorubei a ŋul, adolit abebenukat ŋina ewasyan a apei narwatata apei ka ŋina ewasyan a ŋoloce daŋ adolit narwatata ŋinace; atapakina ŋabebenuk kec ŋuna alokidiŋ kec.

²⁸Aburusikinit daŋ Solomon ŋitorubei ŋul egolid.

²⁹Kicienak Solomon narwatata ka Akai a ŋin daadaŋ nagulei alotooma ka alokiŋa ŋitorubei. Kicienak iŋes nen Ŋikerubim ŋulu a ŋakito a ŋiŋolya ka ŋulu a ŋatur a ŋuna eŋaara.

³⁰Toburusik daŋ iŋes egolid kwap ŋagulei ŋuna alotooma ka ŋuna alokiŋa Akai ŋin

³¹Kitiyau Solomon anakito a Olipa agolyet a epuke ŋina atyakak ŋaarei, kiwuak nakito a epuke a ŋolo ka akibois a ŋina asegan nooi. Kiwuak kidiama epuke ŋol ŋakito ŋunadapal ŋuna alukum kidiama eepuke.

³²Kicienak Solomon Ŋicerubim, ŋiŋolya ka ŋatur ŋuna aŋaara lopuke ŋol ŋolo atyakak ŋaarei, ŋolo etiyaunitae a ŋakito a olipa. Toburusik lotorubei a Ŋikerubim, ŋiŋolya ka ŋatur.

³³Kitiyau Solomon anakito a Olipa ŋakito ŋaomwon ŋuna ke epuke, kiwuak lopuke ŋolo apolon a agule a ŋina asegan.

³⁴Abu daŋ iŋes kitiyau anakito a Cipres ŋipukei ŋiarei, ŋolopuke abilanakin ŋarwa ŋaarei.

³⁵Kicieanak iŋes Ŋikerubim, ŋiŋolya ka ŋatur ŋuna aŋaara lopuke ŋul, toburusik egolid ŋolo lotorubei ŋulu ecienakinitae lopukei.

³⁶Todukok Solomon alapatu kidiŋ jik Akai, todukok nen a ŋamoru ŋilaino ŋiuni ka epei a ŋakito a Cedar.

³⁷Ani edoli ŋikaru ŋiomwon ipukat Solomon, kisyak iŋes adukokin akisyakinet ŋina ka Akai ka Akuj. Etiyakini iŋes ŋun elap ŋolo a Sip.

³⁸Ani edoli ŋikaru ŋitomon ka epei ipukat Solomon, elap ŋolo a ŋikanikauni ŋolo enyaritae Bul, kirikak Solomon akiduk Akai daadaŋ lopite ŋolo amaikina edukere. Abu Akai ŋin ya ŋikaru ŋikanikaarei eduki Solomon.