Read ngakarimojong 1 Ŋirw. 9 Bible Online

1 Ŋirw. 9 - ngakarimojong bible

1 Ŋirw. 9

¹Ani irikakini Solomon akiduk Akai ke Ekapolon ka akai ke erwosit ta ŋaduketa daadaŋ ŋuna abu iŋes totamak adukokin,

²totakanu Ekapolon neni a Solomon atakanunet ŋuna a ŋaarei, lopite ŋolopei aris ketakanunia neni keŋ alo Gibeon.

³Tema Ekapolon neni a Solomon, “Adau ayoŋ akiirar akilip kon ka adyekitoi kon, ŋuna ibu iyoŋ kirwor alokiŋaren kaŋ; adau ayoŋ akitaleun Akai na ŋina idau iyoŋ akiduk ka eturubakini ayoŋ ekiro kaŋ eyai ne ŋikaru ka ŋikaru arubakini ayoŋ eŋoliunit ka amina ne jik.

⁴Nai iyoŋ Solomon ani kiwuap ŋakiro kaŋ lopite ŋolo ewuapitor papa kon Daudi a epeitau ka anakiyookino, ido kitiya ŋuna daadaŋ adau ayoŋ akicik iyoŋ, kiwuap ŋikisila kaŋ ka ŋuna atubunit ayoŋ,

⁵ŋun nai eturubakinia ayoŋ, apukan kon alo Isirael ŋikaru ka ŋikaru, lopite ŋolo eikinitor ayoŋ papa kon Daudi abala, ‘Nyikiŋopikini iyoŋ aryamun ituŋanan ŋini ilunyokin lokicoloŋ kipuka ŋituŋa a Isirael.’

⁶“Ani kiŋer iyoŋ, kori ŋidwe kon akiwuapit ŋakiro kaŋ, toesikis akiwuapit Ŋakiciketa kaŋ ŋuna ewuak ayoŋ kiŋaren kon, ido toloto akitiyanakin ka akilip neni a ŋakujo,

⁷ŋun nai alemarya ayoŋ Ŋisirael anakwap a ŋina adau ayoŋ ainakin ikes. Akai daŋ ŋina etaleu ayoŋ aŋuna ekiro kaŋ, alemari ayoŋ ojoŋo akitere; toruwor Isirael akwap ŋina nyeriŋa eyai toruwor ŋina edoŋ erae eemut bon, ŋina ekyenatar ŋituŋa a ŋakwapin a daadaŋ.

⁸Eruwor Akai na ŋina tokona iteete iyes eoya na ereŋorot ŋolo etukosi ŋakielet keŋ; ituŋanan daadaŋ ŋini itori nen, eumokini topodok tema, ‘Kaanukiro etiyaa Ekapolon ŋakiro nu nakwap na ka Kai na?’

⁹Eboŋokinete nai ŋituŋa temasi, ‘Erae aŋuna aŋeryoto ikes Ekapolon Akuj kec ŋina ayauni atapapaa kec anakwap a Ijipit, ido acamut ikes ŋakujo ŋace, ilipete ikes neni a ŋakujo ŋun ka kitiyanakinete; iŋes nai ayaunia Ekapolon akinyasuno na neni kec.’ ”

¹⁰Ekaku a ŋikaru a ŋatomoniarei kedau Solomon akiduk ŋakais nu ŋaarei: Akai ŋina ke Ekapolon ka akai ke erwosit.

¹¹Abu erwosit Solomon inak Iram erwosit ŋolo Tiro ŋitaunio ŋatomoniarei anakwap a Galileya, anerae abu Iram inak Solomon ŋakito ŋuna a Cedar, ŋuna a Cipres ka egolid lotyae daadaŋ ŋolo eitanitor Solomon.

¹²Nai ani ebuni Iram alo Tiro akiŋolikin ŋitaunio ŋulu ainakini Solomon iŋes, abu Iram nyelakar aŋuna a ŋitaunio a ŋul.

¹³Aŋun, abu iŋes kiŋit Solomon tema, “Alutaunio lu ŋulu ikiinak iyoŋ ayoŋ lokaato kaŋ?” Aŋun, enyaritae ŋitaunio ŋul Kabul tari tokona. [2]

¹⁴Apaki ŋin, aris Iram kiyakik Solomon ŋitalantae amiat ka ŋatomoniarei ŋulu a egolid.

¹⁵Erae lu ŋiticisyo ŋulu abu Solomon toreik ŋituŋa akitiya: Akiduk Akai ke Ekapolon, akai keŋ a elope ka akiduk arwatata nakititis ŋina a etaun ta akiduk ŋarwatatain ŋuna a Yerusalem, Asor, Megido ka Geser.

¹⁶(Aris apaki ŋin Parao erwosit ŋolo a Ijipit kelot akikamar Geser kicuny ka toar Ŋikanaani ŋulu eboiyete alo Geser, ido toropya etaun ŋol nakoku keŋ ŋina eisit Solomon.

¹⁷Aŋun, abu Solomon toduk Geser nabo), abu daŋ iŋes toduk Bes-oron ŋolo ayai nenidipal,

¹⁸Baalas, Tadimor ŋolo ayai naloŋisat, aya ŋitaunio ŋul daadaŋ nakwap keŋ.

¹⁹Abu daŋ Solomon toduk ŋitaunio ŋulu aya ŋisitowae daadaŋ ka ŋitaunio ŋulu a ŋagaari keŋ, ŋulu a ŋikametok ŋaŋolei keŋ ka ŋaduketa ca daadaŋ ŋuna abu Solomon totamak adukokin Yerusalem, Lebanon ka nakwap daadaŋ ŋina epukat iŋes.

²⁰Ŋipiya daadaŋ ŋulu a ŋituŋa a lu: a Ŋiamori a Ŋiitaiti, a Ŋiperisi, a Ŋiipi ka Ŋiyebusi, ŋituŋa ŋul ŋulu pa arae Ŋisirael,

²¹ikes ŋipiya a ŋiletok a ŋituŋa ka akwap a ŋin ŋulu kepotu Ŋisirael nyemunyasi a nen, abu Solomon toreik ŋul daadaŋ akitiya etic, ido eriŋa tari tokona ereikinitae ikes etic.

²²Nai ani eruwor Ŋisirael, pa abu Solomon kituruwo ikes ŋipi; arae ikes ŋasigarya, ŋikapolok anapukan keŋ, ŋikarikok a ŋajorei keŋ, ŋikarikok a ŋajorei ka ŋikarikok a ŋajorei a ŋuna emeto ŋagaari ŋuna iritae a ŋaŋolei ta ŋikajiok ŋulu edokito ŋaŋolei.

²³Arae ekimar a ŋikapolok a ŋulu apolokinito ŋiticisyo a Solomon, ŋamiae ŋakan ka ŋatomonikan. Arae ŋul apolokinito ŋituŋa ŋulu etiyaete.

²⁴Kedau nakoku a Parao acunar alotaun a Daudi kelot kai keŋ ŋina adukokinit Solomon iŋes, abu Solomon toduk arwatata nakititis ŋina alowae a ŋolo alo Kide Akai ka Akuj.

²⁵Aŋolokaru ayenene Solomon ŋainakineta ŋuna epeyo ŋuna a ekisil ŋayayet ŋauni Namuroet ŋina abu iŋes toduk a ŋuna ke Ekapolon. Ecunyanakini iŋes ekinyate ka ŋainakineta ŋun alokiŋaren Ekapolon. Aŋun, abu Solomon kirikak akitiya ŋuna amaikina kitiya Kai ka Akuj.

²⁶Abu Solomon kitiyau ŋameeli ŋuna alalak alo Esion-Geber, alodiyete Elos alokipetot ka anam a ŋina Areŋan, anakwap ke Edom.

²⁷Kiyakiya Iram ŋiketiyak keŋ a ŋameeli, arae ikes ŋikametok ŋameeli ŋulu ayenete anam ejok. Kiyakiyarae ikes kaapei ka ŋiketiyak a Solomon.

²⁸Toloto ikes nakwap ŋina anyaritae Opir, yaut ŋatalantae ŋamiae ŋaomwon ka ŋatomoniarei ŋuna a egolid, inakis erwosit Solomon.