Read ngakarimojong 2 Ŋirw. 11 Bible Online

2 Ŋirw. 11 - ngakarimojong bible

2 Ŋirw. 11

¹Ŋinapei ayenunia Asalia ŋina arae toto a erwosit Aasia atemar aari lokoku keŋ, totub atemar toarae ŋituŋa daadaŋ ŋulu ke erwosit Aasia.

²Nai abu Yeoseba nakoku a Yoram a erwosit, ŋina arae nakaato keŋ ka Aasia kinunaiya Yoas lokoku keŋ ka Aasia alokidiŋ ŋidwe ŋulu ke erwosit ŋulu acamitae akiar; kiwua Yeoseba iŋes ka aketen keŋ anagule ikotere Asalia nyear.

³Kiboiyoto Yoas ka aketen keŋ eŋopito alo kai ke Ekapolon ŋikaru ŋikanikapei ŋulu arakar Asalia epukat Yudaya.

⁴Ani edolete ŋikaru a Yoas ŋikanikaarei, tonyarau Yeoida ŋolo arae esacaradoti ŋikarikok a ŋasigarya a ŋuna atyakatyakatae erae ŋamiae ka ŋasigarya ŋuna a lowae a ŋolo a ŋayona a ŋuna enyaritae Ŋaceris ta ŋasigarya ŋuna eteok erwosit, aponare Kai ka Akuj. Kiwuak iŋes acamunet kidiŋ keŋ ka ikes, kisikoŋ ikes alo Kai ka Akuj; kitoodiya nai ikes neni a Yoas a lokoku a erwosit.

⁵Kicikak iŋes ikes tema, “Ŋuna itemokino iyes kitiyata nu: ‘Iyes ŋulu ilosete akitiya etic akoloŋit ŋina a Sabato, totyakas ŋatyaketa ŋauni. Emaikina atyaket kus apei tolot akitere akai ŋina ke erwosit.

⁶Emaikina atyaket ace min epuke ŋolo enyaritae Sur. Tolot atyaket ŋinace akitere epuke ŋolo eyai kaku ŋiketeok ŋuluce.’ Epite ŋol emaikina iyes toboonokinotor akitere akai ŋina a erwosit.

⁷Ani iyes ŋulu iyakasi natyaketa ŋunace ŋunaarei ŋuna sek ieŋununuyere akoloŋit ŋina a Sabato, itemokino iyes daadaŋ toloto Kai ka Akuj, kiteto erwosit.

⁸Itemokino iyes kiwuakis erwosit kidiŋ kus, ŋinituŋanan totiŋite ŋiboro ŋulu ejiere; ituŋanan daadaŋ ŋini eapuuni neni kus, itemokino toarae. Kiteto erwosit aneni elosi a daadaŋ.”

⁹Kitiyata ŋikapolokinitok ŋasigarya ŋuna atyakatyakatae a ŋamiae lopite ŋolo ecikitor Yeoida ŋolo arae esacaradoti ikes. Tonyarau ŋolokarikon ŋasigarya keŋ, yaut ŋulu alosete etic akoloŋit ŋina a Sabato ka ŋulu ieŋunito, potu neni a Yeoida a esacaradoti.

¹⁰Tokorak nai Yeoida ŋikarikok a ŋasigarya ŋakwaaras ka ŋaupala ŋuna sek arae ŋuna ke erwosit Daudi, ŋuna eŋadatae Kai ka Akuj.

¹¹Tosodo ŋasigarya totaka ŋakwaaras kec iwuakinito erwosit kidiŋ kec alo Kai ka Akuj, kibaka ŋinapei alowae a ŋolo alo Kwap akitodol lowae ŋolo alo Kuju.

¹²Yau nai Yeoida esacaradoti, lokoku a erwosit kiŋa, kitanap ebokot, inak ŋakiro ŋuna ka acamunet aruwor erwosit, temasi ŋituŋa, “ Erae iŋes erwosit, ” Kedaut alimun kiosae Yoas a akimyet. Toramakis ŋituŋa ŋakan kec, tocelut temasi, “Ikigasi isua torubak erwosit eyari!”

¹³Ani iirari arwosit Asalia ecelet ŋolo a ŋasigarya ka ŋituŋa, abu iŋes tolot Kai ka Akuj neni aya ŋituŋa.

¹⁴Ani edoli iŋes nen, kiŋolik erwosit ŋolo ariŋa eseunio ewoi alopir a ekek a Akai ka Akuj, lopite ŋolopei sek ewoenenea erwosit a nen. Erimokinito iŋes kidiŋ ŋikarikok a ŋasigarya ka ŋikakutak ŋarupepe, tocelas ŋituŋa daadaŋ elelyanete, tokusete ŋarupepe. Abu arwosit Asalia tocilicili ŋilowi keŋ, kiworou tema, “Erae ibore en aruruma ŋina demaret arwosit apukan, Erae ibore en aruruma ŋina demaret erwosit apukan!”

¹⁵Kicik Yeoida ŋikarikok a ŋasigarya a ŋuna etyakatyakatae a ŋamiae tema, “Yautu iŋes kidiŋ ŋasigarya, toara ituŋanan daadaŋ ŋini iwarit aiun iŋes.” Arae ŋun anerae pa acamit Yeoida toarakinae Asalia Kai ka Akuj.

¹⁶Kikamut nai ikes iŋes apaki ŋina adolio lokidori ŋolo alomanaryata ŋaŋolei kai ke erwosit, ido toara ikes iŋes a nen.

¹⁷Abu Yeoida ŋolo arae esacaradoti kiwuak acamunet kidiŋ Ekapolon ke erwosit ta ŋituŋa, ikotere toruworos ikes ŋituŋa ke Ekapolon. Kiwuak daŋ acamunet kidiŋ erwosit ka ŋituŋa.

¹⁸Apotu ŋituŋa ŋulu ka akwap a ŋin daadaŋ tolomasi kai ka Akuj aŋina enyaritae Baal, toukosi Baal, tobwaŋabwaŋata ŋamuroeta keŋ ka ŋitorubei keŋ. Aponi Matan ŋolo arae esacaradoti a Baal, toarae alokiŋaren Ŋamuroeta. Tolimok Yeoida ŋasigarya akitere Akai ka Akuj.

¹⁹Tonyara iŋes ŋikarikok a ŋasigarya ka ŋulu anayona a ŋuna enyaritae Ŋaceri ta ŋasigarya ŋuna eteok kaapei ka ŋituŋa daadaŋ ŋulu ka akwap a ŋin, tosodi yaunae erwosit alo Kai ka Akuj, kitorunere lokek ŋolo aya ŋiketeok, ido yaarae kai ŋina ke erwosit, kisiboikinoe lokicoloŋ a ŋirwosi.

²⁰Tolelyana ŋituŋa ka akwap a ŋin daadaŋ, bu ekisil lotaun keari Asalia a ekileŋ a ŋolo alokai ke erwosit.

²¹Arae ŋikaru a Yoas ŋikanikaarei apaki ŋina esyakinia akipuka.