Read ngakarimojong 2 Ŋirw. 14 Bible Online

2 Ŋirw. 14 - ngakarimojong bible

2 Ŋirw. 14

¹Alokaru a ŋolo a ŋiarei ipukat Yeoas lokoku a Yeoawas Isirael, kisyak Amasia lokoku a Yeoas a ŋolo sek arae erwosit alo Yudaya akipuka Yudaya.

²Esyakini iŋes akipuka erae ŋikaru keŋ ŋatomoniarei ka ŋikan, kipuka iŋes Yudaya alo Yerusalem ŋikaru ŋatomoniarei ka ŋikanikaomwon. Arae toto keŋ Yeoadin ŋina alo Yerusalem.

³Etiyae iŋes ŋakiro ŋuna ajokak aneni ke Ekapolon nai pa eloit iŋes Daudi ŋolo arae papaa keŋ. Etiyae iŋes ŋakiro daadaŋ lopite ŋolo sek etiyaa Yeoas ŋolo arae papa keŋ.

⁴Nai pa aponi toukonoroe neni elipeneneere ŋakujo, aŋun, torubakis ŋituŋa emuroete ka einanakinete ŋainakineta nakujo.

⁵Ani kedau Amasia akiboikin ejok napukan, abu toar ŋikapolok daadaŋ ŋulu koloŋ aarete papa keŋ apaki ŋina araakar papa keŋ erwosit.

⁶Nai nyeara iŋes ŋidwe ŋulu a ŋikaarak a ŋul. Etiyae iŋes ŋun lopite ŋolo igiritere lokitaabo ŋolo a ŋikisila a Moses neni icikitor Ekapolon ŋituŋa ebe, “Nyearyo ŋikauruunak aŋuna a ŋidwe, kori nyearyo ŋidwe aŋuna a ŋikauruunak, nai earyo ŋinituŋanan aŋuna a ŋasecisea keŋ a elope.”

⁷Toar Amasia ŋasigarya a Edom ŋalipyo ŋatomon anakadipaalat a ŋina ka acumbi ka torem etaun Sela, kikama. Tolimok Sela ekiro ece ebe “Yokiseel”, ekiro ŋolo eriŋa enyaritere tari tokona.

⁸Abu iŋes kiyakiya ŋituŋa neni a Yeoas a lokoku a Yeowas a ŋolo arae lokoku a Yeu a erwosit a Isirael, abala akirot ŋin, “Bua acamit ayoŋ akiŋolikin ka iyoŋ.”

⁹Nai abu Yeoas ŋolo arae erwosit a Isirael kiyakiya akirot neni ka Amasia a erwosit a Yudaya tema, “Ayai koloŋ amoni a ŋikaromwa lomoru Lebanon ŋina abu kiyakik akirot neni a ekitoe a ŋolo enyaritae Cedar tema, ‘Yau nakoku kon kiit lokoku kaŋ.’ Abu etyaŋ ŋolo ka ariet kitoru namoni ŋin kipudaiya.

¹⁰Idau kire iyoŋ akiloun ŋituŋa a Edom, ido iturokin. Kimomwor aŋuna ilounia iyoŋ, nai kiboikin lore kon! Kaanukiro iwaritor iyoŋ egurigur ŋolo ikicakari iyoŋ kaapei ka ŋituŋa kon alo Yudaya?”

¹¹Nai abu Amasia towou akiirar ŋakiro ŋun. Tosodi nai Yeoas ŋolo a Isirael tocamu ejie. Tojioto iŋes ka Amasia aneni enyaritae Bes-Semes anakwap a Yudaya.

¹²Kilounae ŋasigarya ka Amasia tobwaŋas daadaŋ toem ŋinituŋanan lore keŋ.

¹³Abu Yeoas ŋolo a Isirael kikama alo Bes-Semes Amasia erwosit a Yudaya ŋolo arae lokoku a Yoas a ŋolo arae lokoku ka Aasia. Tolot nai Yeoas tobwaŋabwaŋa arwatata a Yerusalem ameun alopuke a ŋolo anyaritae Epuraim akitodol lopuke ŋolo anyaritae Ekoona. Arae aoyau a arwatata a ŋin ŋimitae amiat ka ŋatomonikanikauni ameun alopuke a epei tari ŋoloce.

¹⁴Tocuna iŋes egolid ka esilipa daadaŋ ta ŋiboro daadaŋ ŋulu aya Kai ka Akuj ka ka ŋisiliŋa ŋulu aya kai ŋina ke erwosit. Abu daŋ toriko ŋituŋa ŋulu aponi yaarae Samaria.

¹⁵Ŋiticisyo a Yeoas ŋuluce daadaŋ ka ŋakiro ŋuna ka arwonu keŋ ta epite ŋolo etijio iŋes Amasia erwosit a Yudaya, igiritae lokitaabo ŋolo a ŋakiro a ŋirwosi a Isirael.

¹⁶Abu Yeoas totwana, tonukae akuwan keŋ neni anukitae ŋirwosi a Isirael. Kilunyokin Yeroboam ŋolo arae lokoku keŋ lokicoloŋ keŋ kipuka Isirael.

¹⁷Kiboi Amasia erwosit a Yudaya ŋolo arae lokoku a Yoas ŋikaru ŋitomon ka ŋikan ketwana Yeoas erwosit a Isirael ŋolo arae lokoku a Yeowas.

¹⁸Ŋiticisyo ka Amasia ŋuluce daadaŋ, igiritae lokitaabo ŋolo a ŋakiro a ŋirwosi a Yudaya.

¹⁹Apotu ŋituŋa a Yerusalem totukut akiar Amasia. Nai abu iŋes tosi, tolot lotaun Lakis. Nai apotu ŋimoe keŋ kiwuapasi iŋes inaa, toara.

²⁰Kiwokunae akuwan keŋ a ŋaŋolei tari Yerusalem, tonukae neni anukitae atapapaa keŋ alotaun a Daudi.

²¹Apotu nai ŋituŋa a Yudaya daadaŋ kituruwosi Asaria lokoku ka Amasia erwosit. Arae ŋikaru ka Asaria ŋitomon ka ŋikanikapei.

²²Kedau papa keŋ atwanare, abu Asaria todukok nabo etaun Elas kinyakak lotuŋa a Yudaya.

²³Alokaru a ŋolo a ŋitomon ka ŋikan ipukat Amasia lokoku a Yeoas Yudaya, kisyak Yeroboam ŋolo a ŋiarei, lokoku a Yeoas a erwosit a Isirael akipuka Isirael alo Samaria, kipuka iŋes ŋikaru ŋatomoniomwon ka epei.

²⁴Etiyae iŋes ŋakiro ŋuna aronok aneni ke Ekapolon. Abu iŋes nyeki akitiya ŋasecisya ŋuna ekote ŋuna arikokinia Yeroboam Ŋisirael nasecit.

²⁵Abu iŋes tomeme nabo akwap daadaŋ neni koloŋ arae akwap a Ŋisirael, kikama ameun aneni enyaritae Leboamas alowae a ŋolo alo Kwap akitodol nanam ŋina atwan alowae a ŋolo alo Kuju. Etiyae iŋes ŋun lopite ŋolo alimunitor Ekapolon ŋolo erae Akuj a Ŋisirael anakituk a Yona a ekadwaran a ŋolo arae lokoku ka Anitai a ŋolo alo Gaseper.

²⁶Etiyae Yeroboam ŋolo a ŋiarei ŋun, anerae abu Ekapolon kiŋolik atemar apipilu nooi ŋican a Ŋisirael a ŋulu arae ŋipi kaapei ka Ŋisirael ŋuluce daŋ. Amam ituŋanan tari ipei daŋ ŋini eŋarakinan ikes.

²⁷Nai pa alimunit Ekapolon atemar amunyari Ŋisirael anakwap; aŋun, abu iŋes toiu ikes kisitiya Yeroboam ŋolo a ŋiarei, lokoku a Yeoas.

²⁸Ŋiticisyo a Yeroboam a ŋolo a ŋiarei ŋuluce daadaŋ ka daadaŋ ŋuna etiyae iŋes ka ŋuna a arwonu keŋ ta epite ŋolo ademunia iŋes ŋituŋa a Yudaya ŋitaunio Damasko ka Amas, igiritae lokitaabo ŋolo ŋakiro a ŋirwosi a Isirael.

²⁹Abu Yeroboam ŋolo a ŋiarei totwana, tonukae neni anukitae ŋirwosi a Isirael. Kilunyokin Sakariya ŋolo arae lokoku keŋ lokicoloŋ keŋ, kipuka Ŋisirael.