Read ngakarimojong 2 Ŋirw. 15 Bible Online

2 Ŋirw. 15 - ngakarimojong bible

2 Ŋirw. 15

¹Alokaru a ŋolo a ŋatomoniarei ka ŋikanikaarei erae Yeroboam erwosit a Isirael, abu Asaria lokoku ka Amasia kisyak akipuka Yudaya.

²Arae ŋikaru keŋ ŋitomon ka ŋikanikapei isyakini iŋes kipuka alo Yerusalem ŋikaru ŋatomonikan ka ŋiarei. Arae ekiro a toto keŋ Yekolia ŋina ayaunitae alo Yerusalem.

³Etiyae iŋes ŋuna ajokak neni ke Ekapolon, lopite jik ŋolo etiyaa papa keŋ Amasia.

⁴Tari kikote nen daŋ, aponi nyeukonor neni elipeneneere neni a ŋakujo. Torubakis ŋituŋa emuroete ka einanakinete a nen ŋainakineta neni a ŋakujo.

⁵Abu Ekapolon kisican erwosit Asaria, inak adyak atapon anakiyar keŋ a daadaŋ, kiboiye epakara kai keŋ bon. Arae Yosam lokoku keŋ iŋes apolokinit akai ŋina ke erwosit ka daŋ kipukate ŋituŋa.

⁶Ŋiticisyo ka Asaria ŋuluce daadaŋ ka daadaŋ ŋuna etiyat iŋes, igiritae lokitaabo ŋolo a ŋakiro a ŋirwosi a Yudaya.

⁷Abu Asaria totwana, tonukae akuwan keŋ neni anukitae atapapaa keŋ alotaun a Daudi. Kilunyokin Yosam ŋolo arae lokoku keŋ lokicoloŋ keŋ kipuka Yudaya.

⁸Alokaru a ŋolo a ŋikanikauni ipukat Asaria Yudaya, kisyak Sakariya lokoku a Yeroboam akipuka Isirael alo Samaria, kipuka ŋilapyo ŋikanikapei bon.

⁹Etiyae iŋes ŋakiro ŋuna aronok aneni ke Ekapolon, lopite ŋolo etiyatotor atapapaa keŋ. Abu iŋes nyeki akitiya ŋasecisya ŋuna ekote ŋuna arikokinia Yeroboam lokoku a Nebat Ŋisirael nasecit.

¹⁰Tosodi Salum lokoku a Yabes totuk toar iŋes alokidiŋ ebuku kilunyokin lokicoloŋ keŋ akipuka Isirael.

¹¹Ŋiticisyo a Sakariya ŋuluce daadaŋ, igiritae lokitaabo ŋolo a ŋakiro a ŋirwosi a Isirael.

¹²Arae ŋun ŋakiro ŋuna eikinit Ekapolon Yeu atemar, ipukaete ŋidwe keŋ Isirael akitodol anyamet ŋina a ŋaomwon. Apotu kiyookinos ikote nenipei.

¹³Alokaru a ŋolo a ŋatomoniuni ka ŋikanikaomwon ipukat Usia Yudaya, kisyak Salum lokoku a Yabes akipuka Isirael. Kipuka iŋes Isirael alo Samaria elap epei bon.

¹⁴Abu nabo Menaem lokoku a Gadi a ŋolo alo Tirisa bu Samaria toar Salum, kilunyokin iŋes lokicoloŋ keŋ akipuka Isirael.

¹⁵Ŋiticisyo a Salum ŋuluce daadaŋ ka ŋakiro a ŋajiorei a ŋuna atuki iŋes aŋare igiritae lokitaabo ŋolo ŋakiro a ŋirwosi a Isirael.

¹⁶Alorwa a ŋul, abu Menaem torem Tipisa, toŋata ŋiboro ka kiela ŋulu daadaŋ aya nen ka ŋulu aya diyete nen, ameun anakwap a ŋina anyaritae Tirisa. Abu iŋes kitiya ŋun, anerae aŋeritoe iŋes a nen. Abu iŋes torem nen toŋeere ŋaberu ŋuna apotiyete.

¹⁷Alokaru a ŋolo a ŋatomoniuni ka ŋikanikaomwon ipukat Asaria Yudaya, kisyak Menaem lokoku a Gadi akipuka Isirael, kipuka Isirael alo Samaria ŋikaru ŋitomon.

¹⁸Etiyae iŋes ŋakiro ŋuna aronok aneni ke Ekapolon. Abu iŋes anakiyar keŋ a daadaŋ nyeki akitiya ŋasecisya ŋuna ekote ŋuna arikokinia Yeroboam lokoku a Nebat Ŋisirael nasecit.

¹⁹Bu erwosit Pul ŋolo ka Asiriya torem akwap a Ŋisirael. Inak Menaem ŋolo arae erwosit a Isirael ŋitalantae aliput ŋulu a esilipa neni a Pul, ikotere kiŋarakinia Pul iŋes, torubak ipukat.

²⁰Kipogoununu Menaem ŋisiliŋa ŋulu alalak aneni a Ŋisirael a ŋulu abarak, tolimok ŋinituŋanan alemun ŋicekelin ŋatomonikan ŋulu a esilipa, yarae neni ke erwosit ka Asiriya. Aŋun, abu erwosit ŋolo ka Asiriya toboŋo nakwap keŋ toesik akwap a Isirael.

²¹Ŋiticisyo a Menaem ŋuluce daadaŋ ka ŋuna daadaŋ etiyat iŋes, igiritae lokitaabo ŋolo a ŋakiro a ŋirwosi a Isirael.

²²Abu Menaem totwana, tonukae neni anukitae atapapaa keŋ. Kilunyokin Pekaia ŋolo arae lokoku keŋ lokicoloŋ.

²³Alokaru a ŋolo a ŋatomonikan ipukat Asaria Yudaya, kisyak Pekaia lokoku a Menaem akipuka Isirael alo Samaria, kipuka iŋes Isirael ŋikaru ŋiarei.

²⁴Etiyae iŋes ŋakiro ŋuna aronok aneni ke Ekapolon. Abu iŋes nyeki akitiya ŋasecisya ŋuna ekote ŋuna arikokinia Yeroboam lokoku a Nebat Ŋisirael nasecit.

²⁵Abu epei a ŋulu apolokinito ŋasigarya a Pekaia ŋolo anyaritae Peka, lokoku a Remalia, totuk akiar Pekaia, ya ŋikilyok ŋatomonikan ŋulu a Gilead toloto toara Pekaia kaapei ka Arigob ta Ariel anaduketait a akai ka apukan aŋina ayai Samaria. Ani kedau Peka akiar Pekaia, abu kilunyokin lokicoloŋ keŋ kipuka Isirael.

²⁶Ŋiticisyo a Pekaia ŋuluice daadaŋ ka daadaŋ ŋuna etiyat iŋes igiritae lokitaabo ŋolo a ŋirwosi a Isirael.

²⁷Alokaru a ŋolo a ŋatomonikan ka ŋiarei ipukat Asaria Yudaya, kisyak Peka lokoku a Remalia akipuka Isirael alo Samaria. Kipuka iŋes Isirael ŋikaru ŋatomoniarei.

²⁸Etiyae iŋes ŋakiro ŋuna aronok aneni ke Ekapolon. Abu iŋes nyeki akitiya asecit ŋina arikokinia Yeroboam lokoku a Nebat Ŋisirael nasecit.

²⁹Alorwa a ŋulu epukator Pekaia Isirael, bu Tigilaspilese ŋolo epukat Asiriya torem akwap a Isirael kikama neni anyaritae Ijon, Abelebesmaaka, Yanoa, Kedec, Asor, Gilead ka Galileya, arae ŋul daadaŋ ŋirerya ŋulu ka akwap a Naputali. Kikama iŋes ŋituŋa daadaŋ ya Asiriya.

³⁰Tosodi Osea lokoku a Ela totuk akiar Peka lokoku a Remalia, toar, kilunyokin lokicoloŋ keŋ akipuka Isirael. Atakanunete ŋun alokaru a ŋolo a ŋatomoniarei ipukat Yosam lokoku a Usia Yudaya.

³¹Ŋiticisyo a Peka ŋuluce daadaŋ ka daadaŋ ŋuna etiyat iŋes, igiritae lokitaabo ŋolo a ŋakiro a ŋirwosi a Isirael.

³²Alokaru a ŋolo a ŋiarei ipukat Peka lokoku a Remalia Isirael, kisyak Yosam lokoku a Usia akipuka Yudaya.

³³Arae ŋikaru keŋ ŋatomoniarei ka ŋikan isyakini akipuka. Kipuka iŋes Yudaya alo Yerusalem ŋikaru ŋitomon ka ŋikanikapei. Arae ekiro a toto keŋ Yerusa nakoku a Sadok.

³⁴Etiyae iŋes ŋuna etalakarito Ekapolon lopite ŋolopei etiya Usia ŋolo arae papa keŋ.

³⁵Tari kikote nen daŋ, aponi nyeukonor neni elipeneneere ŋakujo. Apotu ŋituŋa torubakis emuroete ka einanakinete ŋainakineta neni a ŋakujo a nen. Arae Yosam iŋes adukokini ekek ŋolo ekyara ŋolo ka Akai ka Akuj.

³⁶Ŋiticisyo a Yosam ŋuluce daadaŋ ka ŋuna daadaŋ etiyat iŋes, igiritae lokitaabo ŋolo a ŋakiro a ŋirwosi a Yudaya.

³⁷Alorwa a ŋul, abu Ekapolon kiyakiya ŋirwosi lu ŋiarei; Resin ŋolo ka Aram ka Peka lokoku a Remalia akitijiore akwap a Yudaya.

³⁸Abu Yosam totwana, tonukae akuwan keŋ neni anukitae atapapaa keŋ alotaun a Daudi. Kilunyokin Aas ŋolo arae lokoku keŋ lokicoloŋ keŋ kipuka Yudaya.