Read ngakarimojong 2 Ŋirw. 23 Bible Online

2 Ŋirw. 23 - ngakarimojong bible

2 Ŋirw. 23

¹Abu nai erwosit Yosia kiyakiya tocunut neni keŋ ŋikasikou alo Yudaya a daadaŋ ka ŋulu a Yerusalem.

²Abu erwosit kitipeiyo Kai ka Akuj, torukosi ka ŋituŋa daadaŋ ŋulu a Yudaya ka ŋulu a Yerusalem daadaŋ. Torukosi iŋes ka ŋisacaradotin, ŋikadwarak ta ŋituŋa daadaŋ, ŋulu ecarioko kaapei ka ŋikarwok. Tosyom iŋes alokiŋaren kec ŋakiro daadaŋ ŋuna egiritae lokitaabo ŋolo ka Acamunet, ŋolo aponi torukaunae alotooma Akai ka Akuj.

³Towo erwosit Yosia alodiyete epir, kikoŋ alokiŋaren Ekapolon akiwuapit iŋes, akiricakinit ŋakiciketa keŋ, ŋakiro keŋ ka ŋikisila keŋ a etau keŋ a daadaŋ ta akitiya ŋuna daadaŋ igiritae lokitaabo ŋol. Tosodo ŋituŋa daadaŋ kiikis akiwuap Acamunet ŋin.

⁴Tolimok erwosit Yosia Ilikia esacaradoti ŋolo apolon nooi ka ŋisacaradotin ŋulu ewuapito ŋulu apolok ta ŋituŋa ŋulu apolokinito etic alo Kai ka Akuj akipudun alo Kai ka Akuj ŋiboro daadaŋ ŋulu etiyaunitae aŋuna a Baal ka Asera ta ŋiboorei ŋulu ecayete alokidiama. Kicunyak iŋes ikes daadaŋ alokiŋa etaun Yerusalem alotooma ayonae ŋina enyaritae Kidiron, ido kisiwoko ŋituŋa ekuron kec Besel.

⁵Kirita iŋes ŋisacaradotin ŋulu a ŋakujo a ŋun, ŋisacaradotin ŋulu kepotu ŋirwosi a Yudaya kiwuakis aŋuna ka ainanakin ŋainanakineta anenimukur, aneni ilipere ŋakujo alotaunio a Yudaya ka alo Yerusalem, ŋulu ainanakinete ŋainanakineta neni a Baal, neni ka akoloŋ, neni ke elap, neni a ŋirematom ka neni a ŋitopon ka neni a ŋiboorei a ŋic a ŋulu ecayete alokidiama.

⁶Kipud Yosia alo Kai ka Akuj etorube ka akuj a ŋina anyaritae Asera, yau kiŋa Yerusalem, nayonae Kidiron, tosodi kicunyak. Ani irikakin kicakicak toruwor apuwa, ido kieliyelak apuwa ŋin nalyalin a ŋituŋa ca a daadaŋ.

⁷Kituwono iŋes ŋakais ŋuna a ŋikilyok a ŋulu erae ŋimalaae, eboiyete alo Kai ka Akuj. Arae tooma ŋakais ŋun adonyoto ŋaberu ŋilowi ŋulu elipere neni ka Asera.

⁸Tonyarau iŋes ŋisacaradotin alotaunio a Yudaya a daadaŋ, ido tomunaiyana ŋaduketa ŋuna aya nenimukur neni sek ainanankineta ŋisacaradotin ŋainanakineta neni a ŋakujo. Tomunaiya iŋes ŋaduketa ŋuna aya nenimukur alo Geba akitodol Beeriseba. Tobwaŋabwaŋaya ŋaduketa ŋuna aya nenimukur alopukei a ŋulu aya lopuke ŋolo aduli Yosua ŋolo apolokinit etaun, aya ŋaduketa ŋun alowae a ŋolo alokedyeny epuke ŋolo ke etaun.

⁹Pa aponeneete ŋisacaradotin ŋulu a ŋakujo a ŋuna gelae Namuroet ŋina ke Ekapolon ŋina ayai Yerusalem, emujeneneete ikes aneni a ŋiyeneta kec ŋamugati ŋuna emam ŋakinyalet.

¹⁰Abu Yosia tomunaiya Topes, namuroet ŋina adukokinitae nayonae ŋina anyaritae Ben-Inom, todaun nabo epite ŋolo apedoria idiotuŋanan akiar lokoku keŋ. kori nakoku keŋ kicunyak erae ainakinet neni ka akuj a ŋina anyaritae Molek.

¹¹Tolema iŋes ŋitorubei a ŋaŋolei ŋulu sek etowoikinito ŋirwosi a Yudaya lokek ŋolo ka Akai ka Akuj, ŋuna etaleoritae neni ka akoloŋ, torae alodiyete akai ŋina a ekolup a ŋolo anyaritae Nasan Melek, akai ŋina ayai narwatata. Kicunyak iŋes ŋagaari ŋuna elipere akoloŋ.

¹²Ani ŋamuroeta ŋuna aya nagule ŋina alokidiama akai ka Aas, Ŋamuroeta ŋuna adukete ŋirwosi a Yudaya ka ŋuna aduki Manase nalapatui ŋunaarei ŋuna ka Akai ka Akuj, abu Yosia toukono, tobwaŋabwaŋa, tosodi tobukono ŋakielet nayonae Kidiron.

¹³Tomunaiya iŋes ŋaduketa ŋuna aya nenimukur Kide Yerusalem, ŋuna elipere ŋakujo ka ŋuna aya alowae a ŋolo alo kwap emukura ŋolo enyaritae emukura ŋolo ka Akinyasuno (Iŋes emukura ŋolo a ŋikito ka Olipa). Arae sek Solomon ŋolo arae erwosit a Isirael iŋes aduki ŋaduketa ŋun aŋuna ka akuj a ŋina anyaritae Asitarite a ŋina a Ŋisidoniae ka Kemos akuj a Ŋimoabi ta Milikon akuj a Ŋiamoni.

¹⁴Abu Yosia toukono ŋitorubeei a ŋakujo, totubutubu ŋipirin ŋul, kililyaa ŋapanya.

¹⁵Abu Yosia touko tari namuroet ŋina ayai nenimukur alo Besel, ŋina aduki Yeroboam lokoku a Nebat ŋolo arikokini Ŋisirael nasecit, abu Yosia touko ibore daadaŋ kiela. Kicuny iŋes aduketait ŋin kicakicak ŋiboro ŋulu adukitere toruwor ŋalup, kicuny iŋes tari etorube ka akuj a ŋina anyaritae Asera.

¹⁶Apaki ŋin, toboboŋ Yosia kiŋolik ŋalyalin ŋuna aya epeiwae emukura. Kiyakiya iŋes ŋituŋa alosit akipudunun ŋakoyo kiŋa. Abu iŋes kicunyak ŋakoyo ŋun anamuroet a ŋina ayai nen, ikotere inyasi namuroet ŋin lopite ŋolo alimokinitor Ekapolon iŋes anakituk a ŋina ke ekadwaran a ŋolo abu todwar ŋakiro ŋun. Ani eyakaun ŋasuban, abu Yeroboam towo alodiyete namuroet, kireo neni ayai alyal ŋina ke ekadwaran a ŋolo kedwari ŋakiro ŋun.

¹⁷Abu iŋes kiŋit ŋituŋa tema, “Erae nyo aduketait a ŋamoru ŋina ete ayoŋ ŋin?” Toboŋokis ŋituŋa ŋulu ke etaun iŋes temasi “Erae alyal ŋina ke ekadwaran a ŋolo abuni alo Yudaya todwar ŋakiro ŋuna itiya iyoŋ namuroet ŋina alo Besel.”

¹⁸Tolimu iŋes tema, “Kimyekisi iŋes kieŋu; nyelema idiotuŋanan ŋakoyo keŋ.” Toesikis nai ikes ŋakoyo keŋ ka ŋuna ke ekadwaran a ŋolo kebuni alo Samaria.

¹⁹Tolema Yosia ŋaduketa ŋuna aya nenimukur ŋuna elipere ŋakujo alotaunio a Samaria a daadaŋ, ŋaduketa ŋuna sek kedukete ŋirwosi a Isirael, ŋuna keponeta kitoŋaeta nooi Ekapolon. Abu iŋes tomunaiya ŋaduketa ŋun lopite ŋolopei abunio tomunaayrya ŋuna sek aya Besel.

²⁰Toar iŋes ŋisacaradotin ŋulu a ŋaduketa aŋuna aya nenimukur a nen daadaŋ, tosodi kicunyak ŋakoyo a ŋituŋa alokidiama ŋamuroeta ŋun. Toboŋo nai Yerusalem.

²¹Abu erwosit Yosia tolimok ŋituŋa tema, “Kiwuapito etal ŋolo a Paska a Ekapolon Akuj kus lopite ŋolo elimunitere alokitaabo alo a ŋolo ka acamunet.”

²²Amam Paska ace sek ŋina enuminumitae ameun alorwa a ŋulu epukatotor ŋikatubok Isirael ka daŋ alorwa a daadaŋ a ŋulu epukatotor ŋirwosi Isirael ka Yudaya.

²³Nai alokaru a ŋolo a ŋitomon ka ŋikanikauni ipukat Yosia, aponi kinumunumae ŋasuban a Paska alo Yerusalem.

²⁴Abu Yosia tolema ŋimurok, ŋikapilak, ŋakujo ŋuna a ŋikalya ŋuna ayeunitae ta asiilio daadaŋ ŋina ayai nakwap a Yudaya ka Yerusalem. Abu Yosia kitiya ŋun, ikotere isiyookini ŋuna a ŋikisila a ŋulu egiritae lokitaabo ŋolo abu Ilikia esacaradoti torukau alotooma Akai ke Ekapolon.

²⁵Amam sek ekiŋaren erwosit ece ŋolo ekoni Yosia ŋolo ewuapit Ekapolon a etau keŋ a daadaŋ ka anakiyar keŋ a daadaŋ ta anagogoŋu keŋ a daadaŋ anakiwuapit ŋikisila a Moses. Mam tari erwosit ece ŋolo abu min ekaku keŋ ŋolo etiyae ŋuna etiyat iŋes.

²⁶Tari kikote nen daŋ abu Ekapolon torubak eŋoit nooi neni ka akwap a Yudaya aŋuna ka aronis a daadaŋ a ŋina sek kebu Manase kitoŋoya Ekapolon.

²⁷Abu Ekapolon totub tema, “Alemari ayoŋ Yudaya daŋ ejoŋo akitere lopite ŋolopei abunio olemarya alo Isirael ŋituŋa a Isirael. Aŋeri ayoŋ tari Yerusalem neni sek erae etaun ŋolo aseunit ayoŋ. Aŋeri nabo tari Akai na ŋina sek abu ayoŋ otema ekelipeneneere ayoŋ.”

²⁸Ŋiticisyo a Yosia ŋuluce daadaŋ, ŋuna daadaŋ etiyat iŋes, igiritae lokitaabo ŋolo a ŋakiro a ŋirwosi a Yudaya.

²⁹Apaki ŋina epukator Yosia abu Parao ŋolo anyaritae Neko bu anakwap keŋ alo Ijipit, tolot neni ke erwosit a ŋolo ka Asiriya anaŋolol Eupurate. Acamit Neko akiŋarakin erwosit ŋolo ka Asiriya akitijiore Yosia, tolot neni keŋ pa eyeni ŋakiro ŋadi, nai ani iryamete ikes lorot aneni enyaritae Megido, abu Parao Neko toar Yosia.

³⁰Tosodo ŋirukitos ŋulu a Yosia kiwokosi akuwan keŋ a agaari a ŋina eritae a ŋaŋolei, yaut Yerusalem tonuka neni sek etemokinit iŋes aŋuna keŋ. Apotu ŋituŋa kinyonyoa Yeoas ŋolo arae lokoku keŋ toruwor erwosit, kilunyokin lokicoloŋ a Yosia a papa keŋ, kipuka Yudaya.

³¹Arae ŋikaru a Yeoas ŋatomoniarei ka ŋiuni apaki ŋina esyakinia akipuka; kipuka iŋes Yudaya alo Yerusalem ŋilapyo ŋiuni. Arae ekiro a toto keŋ Amutal nakoku keŋ a Yeremia a ŋolo alo Libina.

³²Etiyat iŋes ŋakiro ŋuna aronok aneni ke Ekapolon lopite jik ŋolo etiyatotor atapapaa keŋ.

³³Abu Parao Neko toen iŋes aneni anyaritae Ribila anakwap ka Amas, todaun Yeoas epite ŋolo iboikinor Yerusalem akipuka. Toreik Parao ŋituŋa a Yudaya akitac ocur neni keŋ, totacae neni keŋ ŋatalantae amiat ŋulu ke esilipa ka etalantait ŋolo ke egolid.

³⁴Kiwuak Neko Eliakim lokoku a Yosia toruwor erwosit kilunyokin neni a papa keŋ toruwor erwosit, kilocok tari ekiro keŋ toruwor Yeoiakim. Nai ya iŋes Yeoas Ijipit totwanik inaa.

³⁵Abu Yeoiakim inak esilipa ke egolid neni a Parao Neko, totubok ŋituŋa ocur ŋolo alalan nooi aŋuna ka arukaunia ŋisiliŋa ŋulu eitanit Parao. Toreiyanak iŋes ŋituŋa daadaŋ alemikin iŋes esilipa ka egolid, atubokinitae ŋinituŋanan ocur alotyae a ŋolo a ebari keŋ.

³⁶Arae ŋikaru a Yeoiakim ŋatomoniarei ka ŋikan apaki ŋina esyakinia akipuka Yudaya. Kipuka iŋes Yudaya alo Yerusalem ŋikaru ŋitomon ka epei. Arae ekiro a toto keŋ Sebida nakoku keŋ a Pedaia a ŋolo alo Rama.

³⁷Abu iŋes kitiya ŋakiro ŋuna aronok aneni ke Ekapolon lopite jik ŋolo etiyatotor atapapaa keŋ daadaŋ.