Read ngakarimojong 2 Ŋirw. 24 Bible Online

2 Ŋirw. 24 - ngakarimojong bible

2 Ŋirw. 24

¹Alokaru a ŋulu epukator Yeoiakim akwap a Yudaya, abu Nebukadinesar erwosit a Babilon, kikama akwap a Yudaya toruwor Yeoiakim eketiyan keŋ ŋikaru ŋiuni. Nai abu Yeoiakim toŋer Nebukadinesar akipuka iŋes.

²Abu Ekapolon kiyakiya ŋajorei alokabilae a Ŋikaledian, a Ŋiarameani, a Ŋimoabi ka a Ŋiamoni amunyar ŋituŋa a Yudaya, kiyookinotor ŋuna erworit Ekapolon alorwor a ŋikadwarak a ŋulu arae ŋiketiyak keŋ.

³Apotu kitiyakin kire ŋun anakwap a Yudaya lopite ŋolo alimunitor Ekapolon atemar tolemarae ŋituŋa a Yudaya aneni keŋ, aŋuna a ŋasecisya a Manase a daadaŋ a ŋuna abu iŋes tosec

⁴ka aŋuna abunio toarya ŋituŋa ŋulu amam ibore asecito. Aarit manase alo Yerusalem ŋituŋa ŋulu pa asecito, ido pa acamit Ekapolon akisyoni iŋes.

⁵Ŋiticisyo a Yeoiakim ŋuluce daadaŋ, ŋuna daadaŋ etiyat iŋes, igiritae lokitaabo ŋolo a ŋakiro a ŋirwosi a Yudaya.

⁶Abu nai Yeoiakim totwana ikwa atapapaa keŋ. Kilunyokin lokoku keŋ Yeoiakin lokicoloŋ keŋ kipuka Yudaya.

⁷Abu erwosit a Ijipit nyeboŋu nabo nakwap keŋ, anerae abu erwosit ŋolo a Babilon todema iŋes akwap ŋina sek arae ŋina keŋ daadaŋ, ameun anayonae a Ijipit akitodol naŋolol Eupurate.

⁸Arae ŋikaru a Yeoiakim ŋitomon ka ŋikanikauni apaki ŋina esyakinia akipuka Yudaya. Kipuka iŋes Yudaya alo Yerusalem ŋilapyo ŋiuni. Arae ekiro a toto keŋ Neusita nakoku a Elinasan a ŋolo alo Yerusalem.

⁹Etiyat iŋes ŋakiro ŋuna aronok aneni ke Ekapolon lopite ŋolo etiyator papa keŋ.

¹⁰Alorwa a ŋul, potu ŋajorei ŋuna a Nebukadinesar a erwosit a Babilon potu Yerusalem, kirikaut etaun.

¹¹Tolot erwosit Nebukadinesar Yerusalem apaki ŋina erikaunitototr ŋajorei keŋ Yerusalem.

¹²Abu erwosit Yeoiakin tocamu Nebukadinesar kikama iŋes kaapei ka toto keŋ, ŋiketiyak keŋ, ŋikapolok anapukan keŋ ka ŋulu apolokinito akai ka apukan. Yaarae Yeoiakin erae emabus alokaru a ŋolo a ŋikanikauni ipukat iŋes Yudaya.

¹³Kiwok Nebukadinesar ebari daadaŋ ŋolo ayai Kai ka Akuj ka ŋolo alokai ke erwosit. Tobwaŋabwaŋa iŋes ŋiboro ŋulu etiyatae a egolid ŋulu aya Kai ka Akuj, ŋulu koloŋ kitiyauni erwosit Solomon ŋolo a Ŋisirael. Apotu ŋakiro ŋun kitiyakin kitiyakinotor ŋuna asir sek Ekapolon kirwor.

¹⁴Tocuna Nebukadinesar ŋituŋa a Yerusalem daadaŋ, ŋikapolok daadaŋ, ŋikajiok daadaŋ, ŋikayeak ŋiboro ta ŋiketyakak a ŋasuwa, ŋituŋa ŋulu aponi kikamarae a nen arae ŋalipyo ŋatomon, ŋikulyak bon aponi kimyekinae anakwap a ŋin.

¹⁵Toriko Nebukadinesar Yeoiakin erwosit a Yudaya nakwap a Babilon. Torikoe tari toto keŋ a erwosit, ŋaberu keŋ, ŋikapolok anapukan keŋ ka ŋikarikok ŋulu a Yudaya daadaŋ. Aponi yaarae ikes alo Yerusalem akien nakwap a Babilon.

¹⁶Toriko erwosit a Babilon ŋikilyok daadaŋ ŋulu agogoŋok ŋulu apedorito ejie ŋulu arae ekimar kec ŋalipyo ŋakanikaarei; ŋikayeak ŋiboro ka ŋiketyakak ŋasuwa erae ekimar aliput. Agogoŋ ikes daadaŋ apedorito ejie.

¹⁷Kiwuak erwosit a Babilon Matania mamae keŋ a Yeoiakin toruwor erwosit kilunyokin lokicoloŋ a Yeoiakin, kilocok ekiro a Matania toruwor Sedekia.

¹⁸Arae ŋikaru a Sedekia ŋatomoniarei ka epei apaki ŋina esyakinia iŋes akipuka Yudaya. Kipuka iŋes Yudaya alo Yerusalem ŋikaru ŋitomon ka epei. Arae ekiro a toto keŋ Amutal nakoku a Yeremia a ŋolo alo Libina.

¹⁹Etiyat iŋes ŋakiro ŋuna aronok aneni ke Ekapolon, lopite jik ŋolo etiyator Yeoiakim.

²⁰Kire, apotu ŋituŋa a Yerusalem ka ŋituŋa a Yudaya kitoŋoa nooi Ekapolon, a ŋun, abu Ekapolon toŋer ikes alokiŋaren keŋ. Abu Sedekia toŋer akiwuap ŋakiro ŋuna a erwosit a Babilon.