Read ngakarimojong 2 Ŋirw. 3 Bible Online

2 Ŋirw. 3 - ngakarimojong bible

2 Ŋirw. 3

¹Alokaru a ŋolo a ŋitomon ka ŋikanikauni ipukat Yeosapat akwap a Yudaya abu Yeoram lokoku ka Aab toruwor erwosit ka akwap a Isirael, kipuka iŋes Isirael alo Samaria ŋikaru ŋitomon ka ŋiarei.

²Etiyat iŋes ŋuna aronok alokiŋaren Ekapolon, nai pa ekwaan aronis keŋ ka ŋina a papa keŋ ka toto keŋ, anerae abu iŋes tolema epir ŋolo ka akuj Baal, epir ŋolo etiyauni papa keŋ.

³Tari kikote nen daŋ, abu iŋes torubak itiyae asecit ŋina ekwaan ka ŋina a Yeroboam a lokoku a Nebat, ŋina abunio iŋes torikokinia Ŋisirael nasecit. Abu iŋes nyimyek asecit ŋin.

⁴Abarit Mesa erwosit a Moab ŋamesekin. Atacenene iŋes erwosit a Isirael ocur a ŋikaalei a ŋamesekin ŋulu arae ŋalipyo amiat ka ŋajul a ŋimesekin a ŋulu arae ŋalipyo amiat.

⁵Nai ani etwani erwosit Aab, abu erwosit ŋolo epukat Moab toyeu aruruma, towoik erwosit ŋolo epukat Isirael.

⁶Abu nai erwosit Yeoram tonyou atipei alo Samaria, tocunak ŋasigarya a Isirael daadaŋ toloto Yudaya.

⁷Ani elosi iŋes alorot, abu kiyakiya akirot neni a Yeosapat a erwosit a Yudaya ebala, “Akayeki ayoŋ erwosit a Moab aruruma ka aŋer ŋakiro kaŋ; icamit iyoŋ orukosi akitijiore Moab a?” Toboŋok Yeosapat tema, “Acamit, orukosi, ikirae iwon ŋipei, eraakasi ŋituŋa kaŋ ŋulu kon, ka ŋaŋolei kaŋ eraakasi ŋuna kon.”

⁸Kiŋit Yeasapat Yoram tema, “Erot ali ikitori iwon ikilosi lojie?” Toboŋok erwosit Yeoram tema, “Itoryo lorot ŋolo ka aloŋisat a ŋina ka akwap a Edom.”

⁹Torukosi nai erwosit a Isirael ka ŋolo a Yudaya ta ŋolo ke Edom. Ani edoli ŋirwa ŋikanikaarei eriŋa ikes elosete, todaunos ŋakipi kec, todaun neni emasete ŋasigarya ka ŋibaren ŋulu ameto ikes.

¹⁰Kikalou erwosit a Isirael tema, “Okoe ikinyarau bare ca Ekapolon isua ŋirwosi ŋiuni akitaar ŋituŋa a Moab.”

¹¹Nai abu Yeosapat ŋolo arae erwosit a Yudaya tema, “Mam mono ekadwaran ŋolo ke Ekapolon eyai ne kiŋitae ŋuna eponito aneni ke Ekapolon a?” Toboŋok eketiyan epei ŋolo ke erwosit a Isirael tema, “Eyai ne Elisa lokoku a Sapat ŋolo paaran abukonokini ŋakipi nakan ke Eliya a ekadwaran.”

¹²Tolimu Yeosapat tema, “Eyai akirot ŋina ke Ekapolon neni keŋ.” Toloto nai erwosit a Isirael ka ŋolo a Yudaya ta ŋolo ke Edom neni ayai Elisa.

¹³Abu Elisa kiŋit erwosit Yeoram ŋolo a Isirael tema, “Inyoni iitanit iyoŋ aneni kaŋ? Tolot lokadwarak a papa kon ka toto kon.” Nai tolimok erwosit a Isirael iŋes tema, “Mam, erae Ekapolon ikinyarau isua ŋirwosi ŋiuni akitaar ŋituŋa a Moab.”

¹⁴Kikoŋ Elisa tema, “Ikwaŋinapei eyaria Ekapolon ŋolo etiron, ŋolo etiyae ayoŋ etic keŋ, kerae nyakerit ayoŋ erwosit Yeosapat ŋolo a Yudaya, pa kamitak ayoŋ tari akiŋolikin iyoŋ.

¹⁵Tonyarakinae tokona ayoŋ ekaeon, ” Ani eramakini ekaeon aduŋgu keŋ, min apedor ŋina ke Ekapolon neni ke Elisa.

¹⁶Kirworik iŋes tema, “Ebala Ekapolon, towadakisi ŋakare ŋuna alalak nayonae na,

¹⁷anerae ebala Ekapolon, ‘Nyiŋolikinete iyes ekuwuam kori akiru, nai ilelebunosi ŋakipi ŋakare ŋuna iwadito iyes nayonae, tomata iyes ka ŋaatuk kus ta ŋibaren kus ŋuluce.’

¹⁸Erae ŋun ŋakiro ŋuna epataka aneni ke Ekapolon, ebuni daŋ iŋes akipotokin akwap a Moab nakan kus.

¹⁹Ireunete iyes ŋitaunio daadaŋ ŋulu edukuk kojokan ka ŋulu apolok. Iukorete ŋikito daadaŋ ŋulu ipisitae, igolete ŋicowae a ŋakipi daadaŋ ka inyasunete ŋalup daadaŋ ŋuna itaeneneo, tobukonokis ŋamoru.”

²⁰Ani iwalari, edoli apaki ŋina einanakinere ŋamuronisya ŋuna ka ataparacu, toleleut ŋakipi atipei alowae a ŋolo ke Edom kiryama akwap ŋin.

²¹Ani iirarete ŋituŋa a Moab atemar eponito ŋirwosi akitijiore ikes, apotu tonyaraut ŋikilyok daadaŋ ŋulusorok ka ŋikasikou ŋulu apedorete ajiore, torekis lokukoru a akwap kec.

²²Ani enyounete ikes iwalari, ecaikini akoloŋ ŋakipi, kiŋolikis ŋituŋa a Moab ŋakipi alokiŋaren kec ereŋak puu esibito ŋaokot.

²³Tocelut ikes temasi, “Erae ŋaokot, kejioto ŋirwosi ŋuluuni make kearasi. Potu oloto oŋatasi ŋiboro!”

²⁴Nai ani edolete ikes neni eboiyo ajiore a Ŋisirael, tosutut Ŋisirael kitijikis Ŋimoabi akitodol ŋina abwaŋatar. Ani tari kelomasi ikes Moab, torubakis Ŋisirael itijiete ikes.

²⁵Kinyasut Ŋisirael ŋitaunio daadaŋ. Ani neni daadaŋ ajok akitare, abu ŋinituŋanan tocakaki nen amoru apei, akitodol ŋina aruworor neni itao ŋamoru bon. Ŋicowae daadaŋ aponi togoloi ka toyeparae ŋikito daadaŋ ŋulu episitae. Neni anyaritae Kiriareses iŋes bon edoŋito ŋarwatatain ŋuna adukitoe a ŋamoru ewuasi akitodol ŋina erikauniata ŋikajiok ŋulu a ŋacutae neni daŋ kinyasut.

²⁶Ani eanyuni erwosit a Moab atemar ekenu ejie, tocunaki ŋikilyok ŋulu atiŋito ŋileŋia ŋulu adolito ŋamiae ŋakanikaarei aŋuna ka aŋaar neni kitoro alowae a ŋolo ebakitor erwosit ŋolo ke Edom, nai apotu nyepedosi.

²⁷Abu nai iŋes toar lokoku keŋ ŋolokiyae ŋolo etemokino kilunyokin lokicoloŋ keŋ kipuka, kicuny iŋes erae amuronot anarwatata. Min anyunyura ŋina apolon nooi neni a Ŋisirael, kibelekinos toboŋosi nakwap kec.