Read ngakarimojong 2 Ŋirw. 7 Bible Online

2 Ŋirw. 7 - ngakarimojong bible

2 Ŋirw. 7

¹Toboŋok Elisa tema, “Kiira ŋakiro ŋuna irworo Ekapolon! Moi taparacu esaa lopei lo, igyelete iyes alopuke a Samaria ŋaganoi ŋuna ajokak nooi ŋuna a ŋakiloi a ŋauni ka ŋikinyom Ŋulu ikote erau ŋulu a ŋakiloi a ŋakanikapei a ecekel ke epei.”

²Tolimu ekapolokiniton ŋasigarya ŋuna ke erwosit tema, “Nyitiyakinosi ŋakiro ŋun tari daŋ keyau Akuj akiru atipei!” Toboŋok Elisa iŋes tema, “Iŋolikini iyoŋ elope a ŋokonyen kon itiyakinosi ŋun, nai nyinyami iyoŋ akimuj ŋin.”

³Ayakasi kiŋa epuke ŋolo ke etaun a Samaria ŋikilyok ŋiomwon ŋulu adyakasi atapon. Apotu ikes kirworikis make temasi, “Kaanukiro mono ikiboiyo iwon a ne akidiŋ akidarit atwanare?

⁴Kikitema tokona iwon, ‘Oloto tooma etaun,’ eyai robo eron tooma etaun; ikitwaki ca iwon a nen daŋ. Aŋun, itemokino iwon oloto neni a ŋasigarya ka Aram, karukwa ikisyoniyete ikes iwon oyara! Ani bo ca ketamut akiar daŋ, otwaka!”

⁵Ani ŋinibore ikaikakinia akwap eboŋ, tonyout ŋikilyok ŋul, toloto neni aya ŋasigarya ka Aram, nai ani eapikinete ikes neni eboiyoto ŋasigarya ŋun, toryamut akwap esil emam ituŋanan eyai.

⁶Kepotu ikes tobwaŋas anerae kebu Ekapolon ekiŋaren kisiira ŋasigarya ka Aram eruye ŋolo asibit akicodoret ŋina ka ajore a ŋina apolon nooi, ŋina edokitere ŋaŋolei ka ŋagaari ŋuna iritae a ŋaŋolei. Kepotu nai ŋasigarya ka Aram kirworikis ecelasi temasi, “Ketac erwosit a Isirael ŋirwosi a Ŋiitaiti ka ŋulu a Ŋijipitian akitijiore iwon!”

⁷Aŋun, tosuros ikes ikaikakini akwap eboŋ toesikis ŋiboro kec daadaŋ: Ŋiemae, ŋaŋolei ka ŋisigirya, kidoŋo ŋiboro kec daadaŋ neni sek eboiyoto ikes, toema ikes a ŋawat make.

⁸Ani kelomasi ŋikilyok ŋulu ka atapon nalomar a ŋasigarya ka Aram, toloto ikes loeema epei kimuja ka tomata, tolemasi esilipa ka egolid ta ŋilowi yaasi kiwua. Toboŋosi nabo toloto loeema ece, tolemasi ŋiboro yaasi kiwua.

⁹Kirworikinos nai ikes make temasi, “Nyejokak ŋakiro ŋuna ikitiyae iwon. Erae akoloŋit na ŋina ka arereŋu a ŋina ajokan; ani kimunoni iwon ŋakiro nu tari ŋina iwalarya akwap, ikiseci iwon; oloto olimokisi ekal ŋolo ke erwosit.”

¹⁰Potu nai ikes tolimokis ŋakiro ŋun neni a ŋiketeok epuke ŋolo ke etaun temasi, “Ikipotu isua oloto neni eboiyoto ŋasigarya ka Aram, nai ikipotu orukautu nen esil emam ituŋanan ipei daŋ, mati ŋaŋolei ka ŋisigirya eenitae ta ŋiemae imyekinitae a nen.”

¹¹Apotu nai ŋiketeok epuke ŋolo ke etaun kiserakis ŋakiro ŋun lotuŋa ŋulu ayakasi kai ka apukan.

¹²Tonyou erwosit nakwaare tolimok ŋiketiyak keŋ tema, “Akalimokini ayoŋ iyes ŋakiro ŋuna etukito ŋasigarya ka Aram akitiya neni yok. Eyenete ikes atemar ikinyamit akoro iwon; iŋes alosyoto akiŋop anariet. Etamete ikes atemar, kori ikilomari iwon kiŋa etaun akiwarit akimuj, tosodo nai ikes ikikamaasi iwon ikiar ka kikamasi etaun.”

¹³Tolimu eketiyan keŋ epei tema, “Ŋisirael ŋulu idoŋito lotaun lo, elosete atwakare kikokis ŋuluce daadaŋ ŋulu adaut atwakare. Aŋun, eyakiyaasi ŋikilyok ŋikan ka ŋaŋolei ŋuna idoŋito, ikotere oyenutu ŋakiro ŋuna kitiyakinosi.”

¹⁴Toseut ikes ŋikilyok ŋiarei ŋulu adokito ŋaŋolei, tosodi erwosit kiyakiya ikes neni sek aya ŋasigarya ka Aram tema, “Toloto toriputu ŋakiro ŋuna ketakanikis neni a ŋasigarya ka Aram.”

¹⁵Torotokis ikes kiwuapa ŋasigarya ka Aram todolo Yorodan, toryamut ŋilowi ecakanakina erot daadaŋ. Arae ŋilowi ŋul ŋulu kimasanarete ŋasigarya aŋuna ka asuronot. Toboŋut nai ŋikilyok ŋulu eyakit erwosit tolimokis eemut neni ke erwosit.

¹⁶Tonyout nai ŋituŋa ŋulu ke etaun a Samaria toloto aŋatar ŋiboro aneni sek eboiyoto ŋasigarya ka Aram. Togyelanarae ŋaganoi ŋuna ajokak nooi ŋuna a ŋakiloi a ŋauni ka ŋikinyom ŋulu ikote erau ŋulu a ŋakiloi a ŋakanikapei a ecekel ke epei, lopite ŋolo alimunitor Ekapolon aneni ke Elisa.

¹⁷Abu sek erwosit toseu ekapolokiniton ŋasigarya ŋuna eyokiyete iŋes, kicikak iŋes apolokin epuke ŋolo ke etaun, kipudaasi ŋituŋa esigarit ŋol alopuke a ŋolo ke etaun, totwan, lopite ŋolo sek aris Elisa kelimunio apaki ŋina abunitor erwosit neni keŋ.

¹⁸Aris sek Elisa kirwor neni ke erwosit ebala, “Moi taparacu esaa lopei lo igyelete iyes alopuke a Samaria ŋikinyom ŋulu ikote erau ŋulu a ŋakiloi a ŋakanikapei ka ŋaganoi ŋuna ajokak nooi ŋuna a ŋakiloi a ŋauni a ecekel ke epei.”

¹⁹A nen, ekapolokiniton ŋasigarya toboŋok Elisa tema, “Nyitiyakinosi ŋakiro ŋun tari daŋ keyau Akuj akiru atipei!” Apaki ŋin tolimok Elisa iŋes tema, “Iŋolikini iyoŋ elope a ŋakonyen kon itiyakinosi ŋun, nai nyinyami iyoŋ akimuj ŋin.”

²⁰Apotu kire ŋun kitiyakinos neni keŋ, kipudaasi ŋituŋa iŋes alopuke ke etaun totwan.