Read ngakarimojong 1 Ŋakiro a ŋirwa 15 Bible Online

1 Ŋakiro a ŋirwa 15 - ngakarimojong bible

1 Ŋakiro a ŋirwa 15

¹Ani kedau Daudi akiduk ŋakais keŋ lotaun a Daudi, abu kitemonok akibois aŋuna ka Asaduku ka Akuj, ido abu kigurok eema aŋuna ka Asaduku a ŋin.

²Tema nai iŋes, “Mam ituŋanan ice, ŋini edakuni Asaduku mati ŋilepi bon, anerae abu Ekapolon toseu ikes adakit Asaduku ke Ekapolon ka akitiya etic keŋ ŋikaru ka ŋikaru.”

³Abu nai Daudi tocunak Ŋisirael daadaŋ Yerusalem aŋuna ka ayaun Asaduku ke Ekapolon alo Kirias-Yearim, nakibois ŋina abu Daudi kitemok aŋuna ka Asaduku a ŋin.

⁴Tonyarau iŋes ŋiletok ka Aron kaapei ka ŋilepi aloletok a ŋituŋa a lu:

⁵Aloletok a Koas, aponi tonyaraunae lu: Uriel ikwapei ekarikon ka ŋiyeneta keŋ amiat ka ŋatomoniarei.

⁶Aloletok a Merari, aponi tonyaraunae Asaya ikwapei ekarikon ka ŋiyeneta keŋ ŋamiae ŋaarei ka ŋatomoniarei.

⁷Aloletok a Gerisom, aponi tonyaraunae Yoel ikwapei ekarikon ka ŋiyeneta keŋ amiat ka ŋatomoniuni.

⁸Aloletok ke Elisapan, aponi tonyaraunae Semaya ikwapei ekarikon ka ŋiyeneta keŋ ŋamiae ŋaarei.

⁹Aloletok ke Eburon, aponi tonyaraunae Eliel ikwapei ekarikon ka ŋiyeneta keŋ ŋatomonikanikauni.

¹⁰Aloletok a Usiel, aponi tonyaraunae Aminadab ikwapei ekarikon ka ŋiyeneta keŋ amiat ka ŋitomon ka ŋiarei.

¹¹Ekaku, abu Daudi tonyarau Sadok ka Abiasar ŋulu arae ŋisacaradotin ka tonyarau ŋilepi lu: Uriel, Asaya, Yoel, Semaya, Eliel ka Aminadab.

¹²Tema neni kec, “Iyes iraakasi ŋikarikok a ŋituŋa ke ekal a Lepi, emaikina iyes ka ŋilepi ŋuluce kitaleunos, ido toloto yaut Asaduku ke Ekapolon a ŋolo erae Akuj a Isirael, nakibois ŋina adau ayoŋ akitemokin aŋuna keŋ.

¹³Arae aŋuna pa kiponiata iyes ŋilepi yaut iŋes ekiŋaren ne, iŋes abunio Akuj toŋo nooi aŋuna yok, anerae pa aponi iwon kidarae Asaduku ŋin lopite ŋolo amaikina kidarere.”

¹⁴Aŋun, apotu ŋisacaradotin ka ŋilepi kitaleunos aŋuna ka ayaun Asaduku ke Ekapolon a ŋolo erae Akuj a Isirael.

¹⁵Apotu nai ŋilepi todakut Asaduku ka Akuj eryoŋito aloseketa, iwuakinitae kidiama ŋakito, lopite ŋolo sek ecikitor Moses ikes anakirot ke Ekapolon.

¹⁶Tolimok daŋ Daudi ŋikarikok a ŋilepi toseut ŋikaitotoi kec aruwor ŋikaeok, toeoto ŋieosyo ŋulu ka alelyanu isitiyaete ŋiboro ŋulu eramyo, ikwapei ŋagitae, ŋaduŋgui ka ŋitworoi.

¹⁷Aŋun, apotu ŋilepi toseut Eman lokoku a Yoel aneni a ŋikaitotoi keŋ, apotu toseut Asap lokoku a Berekia; toseut alokaitotoi kec alo Merari-Esan lokoku a Kusaia

¹⁸aŋuna ka akiŋarakin ikes akiram ŋiboro ŋulu eore. Apotu ŋilepi toseut alokidiŋ kec ŋilepi lu: Sakariya, Yasiel, Semiramos, Yeiel, Uni, Eliab, Benaia, Maaseia, Matisia ka Elipeleu ta Mikineia; toseut Obededom ka Yeiel ŋulu arae ŋikedarak ŋipukei.

¹⁹Arae etic ke Eman, Asap ta Esan aeore eramete ŋitworoi ŋulu etiyaunitae ke eburonis;

²⁰arae etic a Sakariya, Asiel, Semiramos, Yeiel, Uni, Eliab, Maaseia ka Benaia aeore eramete ŋaduŋgui, lopite ŋolo aeore ikyaaritae eete.

²¹Arae etic a Matisia, Elipeleu, Mikineia, Obededom, Yeiel ka Asasia aeore eramete ŋagitae lopite ŋolo aeore etikiunitoe eete.

²²Kenania ekarikon a ŋilepi iŋes apolokinit aeore; arae ŋol etic keŋ, anerae ayeni iŋes aeore nooi.

²³Arae Berekia ka Elikana ŋiketeok epuke ŋolo elomarere neni ayai Asaduku ŋina ka Acamunet.

²⁴Arae etic a ŋisacaradotin a lu: Sebania, Yosapat, Nesanel, Amasai, Sakariya, Benaia ka Elieser akikut ŋarupepe alokiŋaren Asaduku ka Akuj. Etic ka Obededom ka Yeia ece iŋes akidar epuke ŋolo elomarere neni ayai Asaduku ŋina ka Acamunet.

²⁵Aŋun, apotu Daudi ka ŋikasikou a Ŋisirael ta ŋikarikok a ŋikajiok a ŋalipulipui, toloto akiom Asaduku ŋina ka Acamunet ke Ekapolon, oma alokai ka Obededom eeosi ka alelyanu.

²⁶Aŋuna abunio Akuj kiŋarakinia ŋilepi ŋulu adakito Asaduku ŋina ka Acamunet ke Ekapolon, apotu ikes toara erae amuronot ŋimoŋin ŋikanikaarei ka ŋimesekin ŋikanikaarei.

²⁷Apaki ŋin, anapit Daudi ekaaso ŋolo ajokan ŋolo amilimilan, lopite ŋolo anapitotor ŋilepi daŋ daadaŋ ŋulu adakito Asaduku ŋina ka Acamunet, kaapei ka ŋikaeok ta Kenania ŋolo arae ekarikon a ŋikaeok. Anapit daŋ Daudi arapet ŋina amilimilan.

²⁸Aŋun apotu Ŋisirael daadaŋ yaut Asaduku ŋina ka Acamunet ke Ekapolon, ecelasi, tokusete ŋabureryaŋa a ŋimesekin, ŋarupepe, toramete ŋitworoi ka tobolyas ŋagitae ka ŋaduŋgui.

²⁹Ani elomunere Asaduku ŋina ka Acamunet lotaun a Daudi, toripiya Mikal nakoku a Saul alodirisa, kiŋolik erwosit Daudi epori ka idoŋae, ido abu iŋes tojamuwa Daudi alotau keŋ.