Read ngakarimojong 1 Ŋakiro a ŋirwa 16 Bible Online

1 Ŋakiro a ŋirwa 16 - ngakarimojong bible

1 Ŋakiro a ŋirwa 16

¹Yaut ŋituŋa Asaduku ŋina ka Akuj, tolomuniata lotaun, ido kiwuakis tooma eema ŋolo sek aris Daudi kigurok nen aŋuna ka Asaduku; inakis neni ka Akuj ŋainakineta ŋuna epeyo ka ŋuna ke ekisil.

²Ani kedau Daudi ainakin neni ka Akuj ŋainakineta ŋuna epeyo ka ŋuna ke ekisil, kiterereŋ ŋituŋa alokiro ke Ekapolon;

³ido tokorak ŋamugati, akiriŋ adio ka ŋaboboryo ŋuna arukitoe esibit ŋamugati neni a ŋolokile ka ŋinaberu alo Isirael daadaŋ.

⁴Toseu nai Daudi ŋilepi ŋidi akirik akilip aneni ayai Asaduku ke Ekapolon, akidyek Ekapolon ka alakar neni a Ekapolon ta akipuro Ekapolon Akuj a Isirael.

⁵Ŋilepi ŋul ikes lu: Asap iŋes arae ekarikon kec, totupak Sakariya, bu Yeiel, Semiramos, Yeiel, Matisia, Eliab, Benaia, Obededom ka Yeiel. Arae etic a ŋul akiram ŋaduŋgui ka ŋagitae; arae etic ka Asap akiram ŋitworoi.

⁶Ŋisacaradotin lu ŋiarei Benaia ka Yasiel, arae etic kec akikut ŋarupepe a ŋinapaki alokiŋaren Asaduku ŋina ka Acamunet ka Akuj.

⁷Akoloŋit ŋin, togeu Daudi ainakin Asap ka ŋiyeneta keŋ ekiruk lo ŋolo ka alakar neni ke Ekapolon.

⁸Tolakaros neni ke Ekapolon, tonyarata ekiro keŋ, kiteyenikisi ŋituŋa a ŋakwapin ibore ŋini etiya iŋes.

⁹Toeikisi neni keŋ, toeikisi ŋieosyo ŋulukipuret iŋes; tolimosi ŋiticisyo keŋ daadaŋ ŋulu ka aumokin.

¹⁰Tolakaros aŋuna ikiraakar iwon ŋulu keŋ; tolelyana iyes daadaŋ ŋulu ilipete neni keŋ.

¹¹Kiwara Ekapolon ka kiwara agogoŋu keŋ; kiwara ayakau neni keŋ jwi jwi.

¹²Totamunito ŋiticisyo ŋulu ka aumokin ŋulu etiya iŋes, totamunito ŋakujuwuanisya ŋuna etiya iŋes ka ŋatubonokineta ŋuna abu iŋes tolimununu.

¹³Totamunito ŋun, iyes ŋiletok ka Aburaam a ŋolo arae eketiyan keŋ, totamunito ŋun, iyes ŋidwe a Yakob a ŋolo abu iŋes toseu.

¹⁴Erae iŋes Ekapolon Akuj yok; erae ŋatubonokineta keŋ ŋuna ka akwap a daadaŋ.

¹⁵Etamunit iŋes acamunet keŋ ŋikaru ka ŋikaru, acamunet keŋ ŋina abu iŋes tolimu aŋuna a ŋanyameta a aliput.

¹⁶Etamunit iŋes acamunet ŋina abu iŋes tocamunos ka Aburaam ka akiikinet keŋ ŋina abu kikoŋ neni ka Isaka.

¹⁷Abu Ekapolon kisiyook aŋuna a Yakob ŋuna aris iŋes ketubu ka neni a Isirael acamunet ŋina a ŋikaru ka ŋikaru.

¹⁸Tema Ekapolon neni a Yakob, “Akainakini ayoŋ iyoŋ akwap ŋina a Kanaan, ikwapei atutubet ŋina eruwor ŋina kon.”

¹⁹Apaki ŋina akudyokyoto ŋituŋa a Akuj; ŋina araakatar ikes ŋikudyo nooi, ŋina araakatar ikes ŋigelae anakwap a Kanaan,

²⁰apaki ŋina erimitotor ikes anakwapin ka anapukasinei.

²¹Abu Akuj nyecamak ikes kisicanae; aŋuna kec, abu Akuj kitoŋoiya ŋirwosi a ŋakwapin,

²²tolimok ikes ebe, “Nyitapa ŋituŋa kaŋ ŋuluseuna; nyitiyata aronis adio neni a ŋikadwarak kaŋ.”

²³Toeikisi ŋituŋa ka akwap a daadaŋ neni ke Ekapolon, kirworo a ŋinakoloŋit ŋuna ikilakunia iŋes iyes.

²⁴Tolimosi apolou keŋ neni a ŋakwapin a daadaŋ tolimosi ŋiticisyo keŋ ŋulu ka aumokin neni a ŋituŋa daadaŋ;

²⁵anerae epol nooi Ekapolon, ido emaikina kipuroe iŋes nooi, emaikina kitopolooroe iŋes nooi akilo ŋakujo daadaŋ.

²⁶Erae ŋakujo daadaŋ ŋuna eyakatar ŋituŋa ŋacaryo, nai Ekapolon iŋes abu tosub kidiama.

²⁷Erae iŋes ŋolo itopolooritae ka eiliili apolou keŋ nooi; eyakasi nakibois keŋ agogoŋu ka alelyanu.

²⁸Kipuro Ekapolon ŋituŋa daadaŋ ŋulu ka akwap, kipuro iŋes aŋuna ka apolou ka aŋuna ka agogoŋu keŋ.

²⁹Kipuro iŋes aŋuna ka apolou a ŋina emaikina kipurore ekiro keŋ. Yautu ŋainakineta, ido potu kiŋaren keŋ; kilipa neni ke Ekapolon inapito ŋilowi ŋulu asegak.

³⁰Tomarana alokiŋaren Ekapolon, iyes ŋisubuna daadaŋ anakwap. Esubunitae akwap egogoŋ nooi, emam ŋini epedori akisiyotokin.

³¹Emaikina ŋisubuna ŋulu anakuj tolelyana, emaikina ŋisubuna ŋulu alokwap tolakaros; emaikina ŋisubuna ŋulu anakuj ka ŋulu alokwap tolimosi ebe, “Ekapolon iŋes erae erwosit!”

³²Emaikina anam kirurumak ka ibore daadaŋ ŋini eyai tooma keŋ; emaikina ŋimanikorin tolakaros ka ibore daadaŋ ŋini eyai tooma kec.

³³Eeikinete nai ŋikito a ŋamon alotooma alelyanu alokiŋaren Ekapolon, anerae ebuni iŋes atubokin ŋituŋa.

³⁴Tolakaros neni ke Ekapolon, anerae ejok iŋes; erae amina keŋ ŋina nyiryaŋiryaŋa ŋina a ŋikaru ka ŋikaru.

³⁵Tolimosi daŋ ebe, “Toiunae isua, okoe Akuj akaiunan kosi, tocunakinae ka toiunae isua alotuŋa a ŋakwapin, ikotere isua ikilakar aŋuna ke ekiro kon a ŋolo asegan, kitopolooroe akipuro iyoŋ.

³⁶Akipuro toyai neni ke Ekapolon, Akuj ŋina a Isirael, ameun tokona tari ŋikaru ka ŋikaru.” Apotu nai ŋituŋa daadaŋ temasi, “Amen,” ido apotu kipuro Ekapolon.

³⁷Toesik Daudi Asap a nen ka ŋirukitos keŋ alokiŋaren Asaduku ŋina ka Acamunet ke Ekapolon, akitiya nen a ŋinapaki, lopite ŋolo amaikina itiyaere a ŋinakoloŋit.

³⁸Abu daŋ Daudi toesik Obededom a nen ka ŋirukitos keŋ ŋatomonikanikapei ka ŋikanikauni, akitiya kaapei ka ikes. Etic ece ŋolo etiyaete Obededom lokoku a Yedusun ka Osa, arae akitere ŋipukei.

³⁹Toesik Daudi alokiŋaren eema ŋolo ke Ekapolon anakibois a ŋinamukur a ŋina enyaritae Gibeon esacaradoti ŋolo anyaritae Sadok ka ŋisacaradotin ŋulu arukitotor,

⁴⁰ainakin anamuroet ŋainakineta ŋuna epeyo neni ke Ekapolon a ŋinapaki, taparacu ke eboŋ, lopite ŋolo egiritere ŋinibore lokisila ŋulu ke Ekapolon, ŋulu abu Ekapolon kicik Ŋisirael akiwuap.

⁴¹Arukito ŋisacaradotin ŋul ka Eman, Yedusun ka ŋulucetuŋa ŋulu aponi tonyarae a ŋirorwa alimonor alakara neni ke Ekapolon, anerae amina keŋ ŋina nyiryaŋiryaŋa, erae ŋina a ŋikaru ka ŋikaru.

⁴²Arae etic ke Eman ka Yedusun iŋes akikut ŋarupepe, akiram ŋitworoi ka akiram ŋiboro ŋulu eeore ŋieosyo ŋulu ipurore Akuj. Ainakinitae ŋidwe a Yedusun ŋulusapa akitere ŋipukei.

⁴³Ani irikakin ŋun, apotu ŋituŋa daadaŋ torotokis, tolot ŋinituŋanan lore keŋ, tolot Daudi daŋ lore keŋ akiterereŋ ŋituŋa ke ekal keŋ.