Read ngakarimojong 1 Ŋakiro a ŋirwa 18 Bible Online

1 Ŋakiro a ŋirwa 18 - ngakarimojong bible

1 Ŋakiro a ŋirwa 18

¹Ekaku ka apaki a ŋina auruwuana, kitijik Daudi Ŋipilistin kilou ikes, todemu Ŋipilistin etaun ŋolo enyaritae Gas ka ŋirerya ŋulu edunyatar.

²Abu Daudi kilou tari Ŋimoabi, ido abu iŋes kipuka Ŋimoabi totaca ocur neni keŋ.

³Abu daŋ Daudi kitijik erwosit ŋolo anyaritae Adadeser ŋolo a Soba, todoiyo ejie tari Amas, apaki ŋina alosyo Adadeser akikamar ŋakiboisyo ŋuna ayakasi diyete aŋolol ŋina enyaritae Eupurate.

⁴Todemu Daudi Adadeser ŋagaari aliput, ŋikametok a ŋaŋolei ŋalipyo ŋakanikaarei ka ŋasigarya ŋuna alosete a ŋakejen ŋalipyo ŋatomoniarei. Kiŋwal Daudi ŋaŋolei kec ŋuna erito ŋagaari, kimyek ŋaŋolei amiat bon.

⁵Ani epote Ŋiarameani, ŋituŋa ŋulu alo Damasko akiŋarakin erwosit Adadeser ŋolo alo Soba, toar Daudi Ŋiarameani ŋalipyo ŋatomoniarei ka ŋiarei.

⁶Kisiboik nai Daudi ŋasigarya keŋ Damasko, nakwap a Ŋiarameani; ido apotu Ŋiarameani toruworos ŋulu epukat Daudi, kisyakis akitac ocur neni a Daudi. Abu Ekapolon inak Daudi akilounun ŋimoe keŋ aneni daadaŋ abunio iŋes kitijikinio ikes.

⁷Toŋatu Daudi ŋaupala ŋuna ke egolid ŋuna atiŋito ŋasigarya ka Adadeser. Yau Daudi ŋaupala ŋun Yerusalem.

⁸Abu Daudi toŋatu eburonis ŋolo alalan alo Beta ka alo Berosai alotaunio ka Adadeser.

⁹Ani iirari Toi erwosit ŋolo ka Amas atemar elou Daudi asigar ka Adadeser daadaŋ,

¹⁰Kiyakiya iŋes lokoku keŋ ŋolo anyaritae Yoram neni a Daudi a erwosit akimal ka akitalakar Daudi aŋuna elounia Adadeser. Kenipit sek Adadeser Toi ka aŋorot kitiji jik. Ya Yoram neni a Daudi ŋiboro ŋulu etiyaunitae a esilipa, a egolid ka a eburonis.

¹¹Abu Daudi inak ŋiboro ŋul daŋ neni ke Ekapolon kaapei ka esilipa ta egolid ŋolo erirauni iŋes anakwapin aŋuna abu iŋes kilou; ŋolo aris sek iŋes keinaki Ekapolon.

¹²Kirirauni sek Daudi esilipa ŋol ka egolid ŋol anakwapin a nu: Alo Edom, alo Moab, aneni a Ŋiamoni, aneni a Ŋipilistin, aneni a Ŋiamaleki ka aloboro a ŋulu aŋatuni iŋes aneni ka Adadeser alokoku a Reob a ŋolo arae erwosit a Soba.

¹³Torwoniar Daudi nooi kedau aboŋun alojie a ŋolo aarya Ŋiedomi ŋalipyo ŋatomon ka ŋikanikauni anakadipaalat a ŋina ka Acumbi.

¹⁴Aŋun, abu Daudi kipuka Isirael daadaŋ, abu iŋes kitiya ŋuna ajoikinito ŋituŋa ka ŋuna eyookino alotuŋa keŋ a daadaŋ.

¹⁵Yoab lokoku a Seruia iŋes apolokinit ŋasigarya daadaŋ, ido Yeosapat lokoku ka Ailud iŋes arae ekeŋadan ŋakiro ŋuna igirir;

¹⁶Sadok lokoku ka Aitub ka Aimelek lokoku ka Abiasar, ikes arae ŋisacaradotin; torae Sapisa ekaran;

¹⁷Benaia lokoku a Yekoiyada iŋes apolokinit Ŋikeresi ka Ŋipelesi; ido arae ŋidwe a Daudi ŋulusapa ŋikapolok alotic a ŋolo ke erwosit.