Read ngakarimojong 1 Ŋakiro a ŋirwa 27 Bible Online

1 Ŋakiro a ŋirwa 27 - ngakarimojong bible

1 Ŋakiro a ŋirwa 27

¹Epite lo iŋes egiritere Ŋisirael, ŋikapolokinitok a ŋikalya, ŋikapolokinitok a ŋasigarya a ŋalipulipui, a ŋamiamiae ka ŋikapolok kec, ŋulu eŋarakinito erwosit anakiro a daadaŋ a ŋuna a ŋatukon a ŋasigarya a ŋuna etiyaete a ŋololap alotooma ekaru daadaŋ. Ayakasi ŋinatukot ŋasigarya ŋalipyo ŋatomoniarei ka ŋaomwon.

²Atukot ŋina ka apei, alolap a ŋolo ke epei, arae Yasobeam lokoku a Sabidiel apolokinit. Ayakasi natukot keŋ ŋikilyok ŋalipyo ŋatomoniarei ka ŋaomwon.

³Arae Yasobeam lopapait a Peres, ido iŋes apolokinit ŋikapolok a ŋasigarya daadaŋ alolap a ŋolo esyaunan.

⁴Atukot ŋina a ŋaarei, alolap a ŋolo a ŋiarei, arae Eaoit ŋolo anyaritae Dodai apolokinit, arae Mikilo atupit iŋes anapolokinit atukot ŋina a ŋaarei. Ayakasi natukot keŋ ŋikilyok ŋalipyo ŋatomoniarei ka ŋaomwon.

⁵Ekapolokiniton ŋasigarya alolap a ŋolo a ŋiuni, arae Benaia lokoku a Yeoiada a ŋolo arae esacaradoti. Ayakasi natukot keŋ ŋikilyok ŋalipyo ŋatomoniarei ka ŋaomwon.

⁶Arae Benaia epei a ŋulutomoniuni a ŋulu etirok ka arae iŋes apolokinit ŋul ŋatomoniuni. Arae lokoku keŋ Amisabad iŋes apolokinit atukot Abenaia.

⁷Atukot ŋina a ŋaomwon, alolap a ŋolo a ŋiomwon, arae Asael lokaato a Yoab apolokinit; abu ekaku lokoku keŋ Sebadia kilunyokin lokicoloŋ keŋ toruwor ekapolokiniton atukot ŋin. Ayakasi natukot keŋ ŋikilyok ŋalipyo ŋatomoniarei ka ŋaomwon.

⁸Atukot ŋina a ŋakan, alolap a ŋolo a ŋikan, arae Eisirait ŋolo anyaritae Samus iŋes apolokinit. Ayakasi natukot keŋ ŋikilyok ŋalipyo ŋatomoniarei ka ŋaomwon.

⁹Atukot ŋina a ŋakanikapei, alolap a ŋolo a ŋikanikapei, arae Ira lokoku a Ikes a ŋolo arae Etekoit iŋes apolokinit. Ayakasi natukot keŋ ŋikilyok ŋalipyo ŋatomoniarei ka ŋaomwon.

¹⁰Atukot ŋina a ŋakanikaarei, alolap a ŋolo a ŋikanikaarei, arae Epelonit ŋolo alo Epuraim, ŋolo anyaritae Eles iŋes apolokinit. Ayakasi natukot keŋ ŋikilyok ŋalipyo ŋatomoniarei ka ŋaomwon.

¹¹Atukot ŋina a ŋakanikauni, alolap a ŋolo a ŋikanikauni, arae Eusait ŋolo anateker a Ŋiserai, ŋolo anyaritae Sibekai iŋes apolokinit. Ayakasi natukot keŋ ŋikilyok ŋalipyo ŋatomoniarei ka ŋaomwon.

¹²Atukot ŋina a ŋakanikaomwon, alolap a ŋolo a ŋikanikaomwon arae Eanasoit ŋolo alokabila a Benjamin, ŋolo anyaritae Abieser iŋes apolokinit. Ayakasi natukot keŋ ŋikilyok ŋalipyo ŋatomoniarei ka ŋaomwon.

¹³Atukot ŋina a ŋatomon, alolap a ŋolo a ŋitomon, arae Enetopasit ŋolo anateker a Ŋiserai, ŋolo anyaritae Maarai apolokinit. Ayakasi natukot keŋ ŋikilyok ŋalipyo ŋatomoniarei ka ŋaomwon.

¹⁴Atukot ŋina a ŋatomon ka apei, alolap a ŋolo a ŋitomon ka epei, arae Epirasonit ŋolo anyaritae Benaia, ŋolo alokabila ke Epuraim apolokinit. Ayakasi natukot keŋ ŋikilyok ŋalipyo ŋatomoniarei ka ŋaomwon.

¹⁵Atukot ŋina a ŋatomon ka ŋaarei, arae Enetopasit ŋolo alokal ka Osiniel, ŋolo anyaritae Elidai apolokinit. Ayakasi natukot keŋ ŋikilyok ŋalipyo ŋatomoniarei ka ŋaomwon.

¹⁶Arae lu ŋikarikok a ŋikabilae alo Isirael: Ŋolo apolokinit Ŋirubeni iŋes Elieser lokoku a Siciri; ŋolo apolokinit Ŋisimeoni iŋes Sepatia lokoku a Maaka;

¹⁷ŋolo apolokinit ŋilepi iŋes Asabia lokoku a Kemuel; ŋolo apolokinit ŋituŋa ka Aron iŋes Sadok;

¹⁸ŋolo apolokinit ŋituŋa a Yuda iŋes Eliu lokaato keŋ a Daudi; ŋolo apolokinit ŋituŋa a Isakar iŋes Omiri lokoku a Mikael;

¹⁹ŋolo apolokinit ŋituŋa a Sebulon iŋes Isimaia lokoku ka Obadia; ŋolo apolokinit ŋituŋa a Naputali iŋes Yerimos lokoku ka Asiriel;

²⁰ŋolo apolokinit ŋituŋa ke Epuraim iŋes Osea lokoku ka Asasia; ŋolo apolokinit ŋituŋa ka atutubet ka apei a ŋituŋa a Manase iŋes Yoel lokoku a Pedaia;

²¹ŋolo apolokinit ŋituŋa ka atutubet a ŋinace a ŋituŋa a Manase alo Gilead iŋes Ido lokoku a Sakariya; ŋolo apolokinit ŋituŋa a Benjamin iŋes Yasiel lokoku ka Abiner;

²²ŋolo apolokinit ŋituŋa a Dan iŋes Asarel lokoku a Yeroam. Arae ŋul ŋikapolok ŋulu apolokinito ŋikabilae a Ŋisirael.

²³Abu Daudi nyimar ŋikilyok ŋulu arae ŋikaru kec ŋatomoniarei ka ŋulu pa adolito ŋikaru kec ŋatomoniarei, anerae aris Ekapolon kiik akitalalaun Ŋisirael tolalaar ekimar kec ikwa ŋikacer.

²⁴Abu Yoab lokoku a Seruia kisyak akimar ŋikilyok, nai abu nyirikak akimar, kikote neni daŋ, abu anyunyura ka Akuj min neni a Ŋisirael aŋuna ka akimar, aŋun, aponi nyigiri ekimar ŋolo eyookino lokitaabo ŋolo egiri erwosit Daudi ŋakiro a ŋirwa a ŋulu epukator iŋes.

²⁵Asimapes lokoku ka Adiel iŋes apolokinit ŋakais ŋuna eŋadao ŋiboro ŋulu ka apukan. Yonasan lokoku a Usia iŋes apolokinit ŋakais ŋuna eŋadao ŋiboro ŋulu ka apukan, ŋakais ŋuna aya nakiboisyo ŋunace, lotaunio lorerya ka ŋuna aya naduketa ŋunajiet.

²⁶Esiri lokoku a Kelub iŋes apolokinit ŋiketiyak ŋulu etaete ŋimanikorin.

²⁷Simei ŋolo arae Eramasait iŋes apolokinit ŋimanikorin ŋulu ke epiini. Sabidi ŋolo arae Esipimait iŋes apolokinit ŋakais ŋuna eŋadatae epiini.

²⁸Baal-Aman ŋolo arae Egederait iŋes apolokinit ŋikito ka Olipa ka ŋikia ŋulu aya nawaetin a ŋimukura a ŋulu alo To. Yoas iŋes apolokinit ŋakais ŋuna eŋadatae akimyet ŋina ecuyo anaraito ka Olipa.

²⁹Sitirai ŋolo arae Esaronait iŋes apolokinit ŋibaren ŋulu eyokiyo Saron. Sapat lokoku ka Adilai iŋes apolokinit ŋibaren ŋulu eyokiyo nakadipaalae.

³⁰Obil ŋolo arae Emeronosait iŋes apolokinit ŋisipanin a ŋikaala. Yedeia ŋolo arae Emeronosait iŋes apolokinit ŋisipanin a ŋisigirya.

³¹Yasis ŋolo arae Eagirait iŋes apolokinit ŋisipanin a ŋamesekin. Arae ŋul daadaŋ ŋikapolokinitok ŋulu a ŋiboro ka a ŋibaren a erwosit Daudi.

³²Ayai lokoku amamae a Daudi ŋolo anyaritae Yonasan, arae iŋes ekeŋarakiniton, ido arae ekile ŋolo apiiryana, nabo arae ŋolo ayeni ŋakiro. Yekiel lokoku ka Acimoni iŋes ainakinitae akitiya aŋuna a ŋidwe ke erwosit a ŋulusapa.

³³Aisopel iŋes arae ekeŋarakiniton erwosit. Usai ŋolo arae Earikait iŋes arae ekone ke erwosit.

³⁴Ekaku ka Aisopel, abu Yeoiada lokoku a Benaia ka Abiasar kilunyokinos lokicoloŋ keŋ. Yoab iŋes apolokinit ŋasigarya daadaŋ ŋuna ka apukan.