Read ngakarimojong 1 Ŋakiro a ŋirwa 28 Bible Online

1 Ŋakiro a ŋirwa 28 - ngakarimojong bible

1 Ŋakiro a ŋirwa 28

¹Abu Daudi tocunak ŋikapolok a Ŋisirael daadaŋ Yerusalem, ŋikapolok ŋulu a ŋikabilae, ŋikapolok a ŋatukon a ŋituŋa a ŋulu etiyaete etic a erwosit, ŋikarikok a ŋasigarya a ŋalipulipui, ŋikarikitok a ŋasigarya a ŋamiamiae, ŋikapolokinitok ŋiboro daadaŋ ka ŋibaren ŋulu ke erwosit ka ŋulu apolokinito ŋidwe keŋ, kaapei ka ŋulu apolokinito akai ka apukan ka ŋikajiok ŋulu etirok ta ŋikajiok daadaŋ ŋulu ayenikis ejie.

²Abu nai erwosit Daudi towo alokiŋaren kec tema, “Topupokinae ayoŋ, ŋikaitotoi kaŋ ka ŋituŋa kaŋ. Ayai lotau kaŋ adukokin Akai ŋina eruwor neni iwuakinio Asaduku ŋina ka Acamunet ke Ekapolon, akibois ŋina eruwor neni icakit Akuj yok, abu ayoŋ etemonok ŋiboro ŋuluduket Akai ŋin.

³Nai abu Akuj tema neni kaŋ, ‘Nyemaikina iyoŋ toduk Akai aŋuna ke ekiro kaŋ, anerae irae iyoŋ ekajion ŋolo idau abukor ŋaokot.’

⁴Kikote neni daŋ, abu Ekapolon Akuj a Ŋisirael okoseu ayoŋ alotuŋa a ŋulu ke ekal kosi a daadaŋ aruwor erwosit a Ŋisirael ŋikaru ka ŋikaru. Abu Akuj toseu ekabila a Yuda akirik Ŋisirael, ido alotuŋa a Yuda, abu toseu ekal a papa kaŋ, alodwe a papa kaŋ a ŋulusapa, abu tocamak akituruwor ayoŋ erwosit a Ŋisirael a daadaŋ.

⁵Alodwe kaŋ a ŋulusapa a daadaŋ, ikwapei akainakinia Akuj ŋulu alalak, adau Akuj aseun Solomon akiboikin lokicoloŋ toruwor erwosit a Isirael daadaŋ, alotooma apukan ŋina erae ŋina ke Ekapolon.

⁶Abu Akuj tema neni kaŋ, ‘Erae Solomon lokoku kon iŋes akadukokini ayoŋ Akai kaŋ ka ŋalapatui keŋ, anerae adau ayoŋ aseun iŋes aruwor lokoku kaŋ, aruwor ayoŋ papa keŋ.

⁷Etogogoŋi ayoŋ apukan keŋ ŋikaru ŋulu alalak erae pa keryairya iŋes anakiwuapit ŋakiciketa ka ŋikisila kaŋ, kiwuap lopite ŋolo iwuapitor tokona.’

⁸Aŋun nai tokona, alokiŋaren Ŋisirael daadaŋ, alokiŋaren atukot ŋina ke Ekapolon ka topupi Akuj yok, kiwuap ka kiwar ŋakiciketa daadaŋ ŋuna ke Ekapolon Akuj kon; ikotere akwap na ŋina ajokan eruwor ŋina kon, ido kimyekinia erae ŋina a ŋiletok kon ŋikaru ka ŋikaru.

⁹“Iyoŋ Solomon lokoku kaŋ, tocamu Akuj a papa kon, kitiyanak iŋes ke ekonitau a daadaŋ icamakinit ka a ŋatameta a ŋuna einakina, anerae eyeni Ekapolon ŋuna eya lotai daadaŋ ka daadaŋ ŋuna etami ituŋanan akitiyakin. Ani kiwar iyoŋ iŋes, iryamuni iyoŋ iŋes, nai ani kiŋer iyoŋ iŋes, ikiŋeri iŋes iyoŋ ŋikaru ka ŋikaru.

¹⁰Totamatama tokona, anerae adau Ekapolon aseun iyoŋ adukokin Akai keŋ ikwapei akibois ŋina asegan.Togogoŋior, ido kitiya etic.”

¹¹Inak nai Daudi Solomon lokoku keŋ etorube ŋolo etemunitere akiduk ŋaduketa daadaŋ ŋuna ka Akai ka Akuj: Ŋakais, ŋagulei ŋuna a ŋiboro, kidiama Akai, ŋagulei ŋuna alotooma ka akibois ŋina ka akisyonio. [4]

¹²Abu inak iŋes etorube daadaŋ ŋolo abu etau ka Akuj kiwuak natameta keŋ aŋuna a ŋalapatui aŋuna ka Akai ke Ekapolon ka ŋolo a ŋagulei a daadaŋ a ŋuna anawae Akai ka Akuj ka ŋolo a ŋagulei a ŋuna eŋadao ŋiboro ka Akai ka Akuj ta ŋolo a ŋagulei a ŋuna eŋadao ŋainakineta ŋuna einakinitae Ekapolon.

¹³Abu tolimok iŋes epite ŋolo a ŋatukon a ŋisacaradotin ka ŋilepi ta ŋolo ke etic a daadaŋ alo Kai ke Ekapolon, tolimok daŋ ŋakiro daadaŋ ŋuna a ŋiboro a ŋulu isitiyao alotic ke Ekapolon.

¹⁴Abu tolimok iŋes etyae ke egolid a ŋolo emaikina kisitiyae akitiyaunia ŋiboro ŋulu a ŋolotic alo Kai ka Akuj, tolimok daŋ etyae ke esilipa a ŋolo emaikina kisitiyae akitiyaunia ŋiboro ŋulu a ŋolotic alo Kai ka Akuj.

¹⁵Tolimok etyae ke egolid a ŋolo amaikina kisitiyae akitiyaunia ŋawoeta a ŋitaae, tolimok etyae ŋolo a egolid a ŋinawoet ka ŋitaae keŋ, etyae ŋolo ke esilipa a ŋinawoet ka ŋitaae keŋ, lopite ŋolo esitiyaere ŋinibore anakilip,

¹⁶tolimok iŋes etyae ke egolid a ŋolo amaikina kisitiyae akitiyaunia ŋolomesa aŋuna ka arekin ŋamugati kidiama kec, tolimok etyae ke esilipa a ŋolo amaikina kisitiyae akitiyaunia ŋimesae ŋulu ke esilipa,

¹⁷tolimok etyae ke egolid a ŋolo ajokan a ŋolo amaikina kisitiyae akitiyaunia ŋaumae, ŋabesenio, ŋikopoi, ŋabakulei ka etyae ke egolid a ŋolo itiyaunere ŋinibore aloboro a ŋul,

¹⁸tolimok etyae ke egolid a ŋolo ajokan a ŋolo amaikina kitiyaunere Namuroet ŋina icunyere ekinyate ka etyae ŋolo amaikina kitiyaunere ŋagaari ŋuna a Ŋisubuna a ŋulu aya ŋabebenuk ŋuna apetara imukorito Asaduku ŋina ka Acamunet ke Ekapolon.

¹⁹Tema nai erwosit Daudi, “Igiritae ŋakiro ŋun daadaŋ, erae Ekapolon abu okolimok ayoŋ, epite daadaŋ ŋolo emaikina etic tolosyo.”

²⁰Tema nabo Daudi neni a Solomon alokoku keŋ, “Togogoŋior ka totitinyor, kitiya etic. Nyikuryaniar, kori nyicamu ikikadakini, anerae irukito iyoŋ ke Ekapolon Akuj kaŋ. Nyikimyekini iŋes iyoŋ, mati jik kirikakin etic daadaŋ ŋolo ka Akai ke Ekapolon.

²¹Itemokinitoe ŋatukon ŋuna a ŋisacaradotin ka ŋilepi aŋuna ke etic a daadaŋ a ŋolo ka Akai ka Akuj, itemokinitoe ŋituŋa daadaŋ ŋulu eyenete ŋolotic daadaŋ akiŋarakin iyoŋ alotooma ŋolotic daadaŋ; iwuapete ŋikapolok ka ŋituŋa daadaŋ ŋuna daadaŋ ilimokini iyoŋ ikes.”