Read ngakarimojong 1 Ŋakiro a ŋirwa 5 Bible Online

1 Ŋakiro a ŋirwa 5 - ngakarimojong bible

1 Ŋakiro a ŋirwa 5

¹Arae lu ŋidwe a Ruben alokoku a Isirael a ŋolokiyae. (Arae iŋes ekiyae, nai aŋuna abunio Ruben tolomya aberu a papa keŋ apei ŋina pa eitit, aponi nyeinakin iŋes aruwor ŋolo epol alokaitotoi keŋ, aponi inakinae apolou neni a ŋidwe a Yosepu a ŋulusapa. Arae Yosepu lokoku a Isirael, aŋun, nyimarakinitae Ruben lororwa a ŋidwe a Isirael alopite a ŋolo ka apolou a ŋina euritere ikes;

²tari daŋ ŋina kebunio Yuda toruwor ŋolo egogoŋ nooi akilo ŋikaitotoi keŋ, ido neni keŋ kebu ekepukan tolomunia, Yosepu iŋes keponi inakinae apolou alodwe a Isirael a ŋulusapa.)

³Ŋidwe nai a Ruben alokoku a Isirael a ŋolokiyae ŋulusapa lu: Anok, Palu, ka Esiron ta Karimi.

⁴Abu Ruben touru Yoel ŋolo abu touru Semaia ŋolo abu touru Gog ŋolo abu touru Simei

⁵ŋolo abu touru Mika ŋolo abu touru Reaia ŋolo abu touru Baal

⁶ŋolo abu touru Beera ŋolo abu Tigilas-Pileser erwosit ŋolo ka Asiriya toriko nakwap keŋ. Arae Beera ekarikon ŋolo a Ŋirubeni.

⁷Arae lu ŋiyeneta keŋ, igiritae eryaaritae alopite a ŋolo a ŋanyameta kec: Yeiel ŋolo arae ekarikon, Sakariya

⁸ka Bela lokoku ka Asas a ŋolo arae lokoku a Sema a ŋolo arae lokoku a Yoel. Apotu ikes toloma akisyakin anakibois a ŋina anyaritae Aroer tari Nebo ka Baal-Meon.

⁹Alowae a ŋolo alo Kide, apotu ikes toloma akisyakin aneni isyakinia aloŋisat ŋina emyaarit tari naŋolol Eupurate. Alomete ikes nen, anerae kepotu ŋibaren kec topitut nooi alo Gilead.

¹⁰Ani edoli apaki ŋina araakar Saul ekepukan, apotu ikes toremo Ŋiagiri, ŋulu apotu ikes toreut; apotu ikes toloma neni sek eboiyoto Ŋiagiri, kilopiyasi akwap ŋin daadaŋ ŋina ayai Kide Gilead.

¹¹Alomito Ŋigadi diyete Ŋirubeni, alowae a ŋolo alo Kuju, nakwap ŋina anyaritae Basan, [1] todoiyorito tari Kide neni anyaritae Saleka.

¹²Yoel iŋes kerae ekapolon ka ŋolo ewuapit iŋes anapolou anyaritae Sapam. Arae Yanai ka Sapat ŋikapolok alo Basan.

¹³Arae lu ŋiyeneta kec imarunitae a ŋatekerin kec: Mikael, Mesulam, Seba, Yorai, Yakan ka Sia ta Eber. Arae ŋatekerin ŋun daadaŋ ŋakanikaarei.

¹⁴Arae ŋituŋa ŋulu emarun ŋul ŋipapae ka Abiail a ŋolo arae lokoku a Uri lokoku a Yaroa lokoku a Gilead lokoku a Yado ka lokoku a Bus.

¹⁵Ai ŋolo arae lokoku ka Abidiel ka lopapait a Guni iŋes arae ekapolon anateker kec.

¹⁶Apotu Ŋigadi kiboiyoto alo Gilead, alo Basan ka alotaunio a ŋulu aya nen ta adakar daadaŋ ŋina a Saron, todoiyosi neni daadaŋ apedorete ikes akidol.

¹⁷Kigiryo ŋirorwa ŋul daadaŋ eryaaritae a ŋolo esyaunan, apaki ŋina araakar Yosam erwosit ŋolo a Yudaya, torae Yeroboam ŋolo a ŋiarei erwosit ŋolo a Isirael.

¹⁸Keyakatar Ŋirubeni, Ŋigadi ka atutubet apei ŋina a ekabila a Manase ŋikajiok ŋulu adedeŋak, ŋulu keyakatar ŋaupala ka ŋileŋia, ido keyenete nooi akigum ŋikaleŋeleŋe, torae ŋulu keyenete ajiore. kerae ekimar kec ŋalipyo ŋatomoniomwon ka ŋaomwon ka ŋamiae ŋakanikaarei ka ŋatomonikanikapei, ido atenito ikes nooi aŋuna ke ejie.

¹⁹Apotu ikes toŋaanasi ŋajorei neni a Ŋiagiri, neni a Ŋiyetur, neni a Ŋinapis ka neni a Ŋinodab.

²⁰Abu Akuj kiŋarak ikes akitijiore ŋituŋa ŋul, kimyek Akuj Ŋiagiri ka ŋulu ariitotor ereunio, anerae apotu ŋikajiok ŋulu adedeŋak ŋul kilipa neni ka Akuj alojie, ido abu Akuj inak ikes akiloun aŋuna ekinyomitotor ikes Akuj.

²¹Apotu ikes toŋatut ŋibaren a ŋimoe a ŋul: Ŋikaala ŋalipyo ŋatomonikan, ŋamesekin ŋalipyo ŋamiae ŋaarei ka ŋatomonikan, ŋisigirya ŋalipyo ŋaarei ka ŋituŋa ŋulu arikitoe ŋalipyo amiat.

²²Apotu ikes toara ŋituŋa ŋulu alalak, anerae arae Akuj eŋarakinit ikes ajiore, ido apotu ikes toloma nakiboisyo a ŋituŋa a ŋul akitodol ŋina arikorere ikes nakwapin.

²³Alalak nooi ŋituŋa ŋulu ka atutubet a ŋituŋa a ekabila a Manase; apotu ikes toloma nakwap ŋina anyaritae Basan, todoiyosi Baal-Erimon, Senir ka lomoru Erimon.

²⁴Arae lu ŋikarikok ŋulu a ŋatekerin kec: Eper, Isi, Eliel, Asiriel, Yeremia ka Odapia ta Yadiel. Arae ikes ŋikajiok ŋulu adedeŋak, ŋikilyok ŋulu ayenen ka ŋikarikok ŋulu a ŋatekerin kec.

²⁵Nai apotu ikes tomwaŋa Akuj ŋina atapapaa kec, tomalaana aneni a ŋakujo a ŋituŋa ka akwap a ŋin, a ŋituŋa a ŋulu sek aris Akuj kirita alokiŋaren kec.

²⁶Aŋun, abu Akuj a Isirael kisimukek etau a Pul a ŋolo arae erwosit ka Asiriya (iŋes Tigilas-Pileser erwosit ŋolo ka Asiriya), ŋolo abu kirita Ŋirubeni, Ŋigadi ka atutubet a ŋituŋa a Manase anakwapin kec, kirita ikes toloto Ala, Abor, Ara ka naŋolol ŋina enyaritae Gosan, neni iboiyoto tari nakoloŋit na.