Read ngakarimojong 1 Ŋakiro a ŋirwa 9 Bible Online

1 Ŋakiro a ŋirwa 9 - ngakarimojong bible

1 Ŋakiro a ŋirwa 9

¹Keponi kigirae Ŋisirael daadaŋ a ŋatekerin eryaaritae a ŋuna esyaunak, ido igiritae ŋakiro kec lokitaabo ŋolo a ŋirwosi a Isirael. Keponi ŋituŋa a Yudaya yaarae nakwap a Babilon ikwapei akisicanet aŋuna a ŋasecisya kec.

²Ŋituŋa lu ikes kepotu kisyaut aboŋun lotaunio ka loboro kec aneni arikoritae: Ŋisirael ŋice ŋulu pa arae ŋisacaradotin, ŋisacaradotin, ŋilepi ka ŋiketiyak Kai ka Akuj.

³Ŋituŋa ŋice alokabilae a lu ikes apotu kiboiyosi Yerusalem: Ŋulu alokabila a Yuda, ŋulu alokabila a Benjamin ka ŋulu alokabila ka Epuraim ta ŋulu alokabila a Manase.

⁴Ŋulu alokabila a Yuda ikes lu: Asai lokoku ka Amiud a ŋolo arae lokoku ka Omiri. Arae Omiri lokoku a Imiri a ŋolo arae lokoku a Bani a ŋolo arae lopapait a Peres alokoku a Yuda.

⁵Ŋulu alokabila a Yuda a ŋolo anyaritae Silo ikes lu: Asaia ŋolo arae ekiyae a Yuda ka ŋidwe ka Asaia ŋulusapa.

⁶Ŋolo alokabila alokoku a Yuda a ŋolo anyaritae Sera iŋes Yeuel. Arae ekimar a ŋituŋa a Yuda ŋamiae ŋakanikapei ka ŋatomonikanikaomwon.

⁷Ŋulu alokabila a Benjamin ikes lu: Salu lokoku a Mesulam a ŋolo arae lokoku ka Odapia. Arae Odapia lokoku ka Asenua.

⁸Ŋice ikes Ibineia lokoku Yeroam, Ela lokoku a Usi a ŋolo arae lokoku a Miciri, Mesulam lokoku a Sepatia a ŋolo arae lokoku a Reuel. Arae Reuel lokoku a Ibiniya.

⁹Arae ekimar a ŋituŋa a Benjamin imarunitae eryaaritae a ŋanyameta ŋamiae ŋakanikaomwon ka ŋatomonikan ka ŋikanikapei, ido arae ŋituŋa ŋul daadaŋ ŋikarikok a ŋatekerin kec.

¹⁰Ŋituŋa a ŋikalya a ŋisacaradotin ikes lu: Yedaya, Yeoyarib, Yakin,

¹¹Asaria lokoku a Ilikia a ŋolo arae lokoku a Mesulam. Arae Mesulam lokoku a Sadok a ŋolo arae lokoku a Meraios a ŋolo arae lokoku ka Aitub. Aitub iŋes arae ekapolon ŋolo ete Akai ka Akuj.

¹²Ŋice ikes Adaya lokoku a Yeroam a ŋolo arae lokoku a Pasur. Arae Pasur lokoku a Malikiya; ayai Masai lokoku ka Adiel a ŋolo arae lokoku a Yasera. Arae Yasera lokoku a Mesulam a ŋolo arae lokoku a Mesilemis, ido arae Mesilemis lokoku a Imer.

¹³Arae ekimar a ŋisacaradotin a ŋulu apolokinito ŋatekerin aliput ka ŋamiae ŋakanikaarei ka ŋatomonikanikapei. Arae ikes ŋikilyok ŋulu ayenete ŋiticisyo daadaŋ nooi alo Kai ka Akuj.

¹⁴Ŋituŋa a ŋikyalya a ŋilepi ikes lu: Semaia lokoku ka Asub a ŋolo arae lokoku Asirikam. Arae Asirikam lokoku ka Asabia a ŋolo arae Emerarit.

¹⁵Ŋice ikes Bakibakar, Eres, Galal ka Matania lokoku a Mika a ŋolo arae lokoku a Siciri. Arae Siciri lokoku ka Asap.

¹⁶Ŋice ikes Obadia lokoku a Semaia a ŋolo arae lokoku a Galal. Arae Galal lokoku a Yedusun. Ŋice ikes Berekia lokoku ka Asa a ŋolo arae lokoku ka Elikana a ŋolo eboi alorerya a ŋulu a Ŋinetopasi.

¹⁷Arae lu ŋikedarak ŋipukei alo Yerusalem: Salum, Akub ka Talimon ta Aiman kaapei ka ŋiyeneta kec. Salum iŋes arae ekarikon kec.

¹⁸Ŋinapei koloŋ jik tari lorwa ŋul, kerae ŋatekerin a ŋilepi kiboiyete alo Kide epuke ŋolo ke Ekapolon. Kerae sek ikes ŋikedarak ŋipukei ŋulu a ŋalomarisinei a ŋilepi.

¹⁹Arae Salum lokoku a Kore a ŋolo arae lokoku ka Ebiasap a ŋolo arae lokoku a Kora. Arae iŋes kaapei ka ŋiyeneta keŋ ŋulu ka ateker a Kora ŋikapolokinitok etic ka ŋikedarak ŋalapatui ŋuna aya kiŋaren Eema ŋolo ke Ekapolon, lopite ŋolo araakatar atapapaa kec ŋikapolokinitok akibois ŋina ke Ekapolon, ŋikedarak epuke ŋolo ka akibois ke Ekapolon.

²⁰Ekiŋaren sek, Pineas lokoku ke Eleasar iŋes apolokinit ŋulu edarito epuke, ayai Ekapolon kaapei ka iŋes.

²¹Sakariya lokoku a Meselemia iŋes arae ekedaran ŋolo ke epuke a ŋolo elomarere loeema ŋolo elipere.

²²Arae ekimar a ŋulu aseunitae akidar epuke ŋolo ka alapatu ŋamiae ŋaarei ka ŋitomon ka ŋiarei. Egiritae ikes isibakitae a ŋanyameta kec ka a ŋirerya a ŋulu eboiyoto ikes. Arae Daudi ka Samuel eketeyenikinan ikes apotu kiwuakis ŋituŋa lotic ŋol ŋolo ekinyomitere ŋulutuŋa.

²³Aŋun, apotu ikes kaapei ka ŋipapae kec toruwor ŋikapolokinitok ŋipukei ka Akai ke Ekapolon, Akai ŋin iŋes eema ŋolo ayai Ekapolon.

²⁴Ayakasi ŋikedarak ŋipukei ŋul lowaetin ŋiomwon: Lowae ŋolo alo Kide, lowae ŋolo alo To, lowae ŋolo alo Kuju ka lowae ŋolo alo Kwap.

²⁵Aboonokin ŋikaitotoi kec eponeneete alorerya akiŋaranakin ikes etic ŋirwa ŋikanikaarei.

²⁶Nai ayakasi ŋilepi ŋiomwon, alotooma ŋikedarak ŋipukei ŋul, ŋulu ecikakinitae akitere ŋagulei ka neni eŋadao ebari alo Kai ka Akuj.

²⁷Arae etic kec akiboi akuwar kya alodiyete Akai ka Akuj, anerae amaikina ikes iteete Akai, arae ikes ayakatar ekipuŋguwo ŋolo aŋaere Akai a ŋinataparacu.

²⁸Ŋice alokedarak ŋipukei, arae ŋulu apolokinito ŋiboro ŋulu esitiyao alo Kai ka Akuj; arae etic kec akimar ŋiboro ŋul apaki ŋina eyaunere Kai ka apaki ŋina eyaarere kiŋa Akai.

²⁹Apolokinito ŋice etic ŋolo a ŋikicoloŋo ka ŋiboro daadaŋ ŋulu ka akibois a ŋina asegan kaapei ka akiricit ŋiboro lu: Ŋakirya, epiini, akimyet ka ekinyate ta ŋikito ŋulu itukukunyete akimuj.

³⁰Nai arae etic a ŋisacaradotin a ŋice akinyal ŋikito ŋulu itukukunyete akimuj.

³¹Ayai Elepait ŋolo anyaritae Matisia, arae iŋes ekiyae a Salum a ŋolo arae Ekorait. Aponi iŋes inakinae etic ŋolo ka akipore ŋamugati ŋuna einanakinio neni ke Ekapolon.

³²Ŋikoasi ŋice, ainakinitae etic ŋolo ka akitemonokin ŋamugati ŋuna ewuanakinio lomesa a ŋinakoloŋit edoli Sabato.

³³Ŋilepi ŋulu arae ŋikaeok, arae ŋikarikok a ŋikalya a ŋilepi, ŋulu eboiyete anagulei a ŋuna ka Akai ka Akuj. Mam etic ece ainakinitae ikes, anerae etiyaete ikes naparan ka nakwaare.

³⁴Arae ŋiketiyak ŋul daadaŋ ŋikarikok a ŋikalya a ŋilepi a lopite a ŋolo imarunitere eryaaritae a ŋanyameta kec. Eboiyete ikes alo Yerusalem.

³⁵Arae Yeiel abu kisyak etaun ŋolo anyaritae Gibeon, ido abu iŋes kiboi a nen. Anyaritae ekiro ka aberu keŋ Maaka.

³⁶Ŋidwe a Yeiel ŋulusapa lu: Ŋolokiyae iŋes Abidon, totupakis Sur, Kis, Baal, Ner, Nadab,

³⁷Gedor, Aio ka Sakariya ta Mikilos.

³⁸Mikilos iŋes abu touru Simeam. Apotu ikes daŋ kiboiyoto alodiyete ŋiyeneta kec alo Yerusalem.

³⁹Abu Ner touru Kis, touru Kis Saul, ido touru Saul Yonasan, Maliki-Sua ka Abinadab ta Esi-Baal.

⁴⁰Touru Yonasan Meri-Baal ŋolo abu touru Mika.

⁴¹Ŋidwe a Mika ŋulusapa lu: Pison, Melek ka Tarea ta Aas.

⁴²Abu Aas touru Yara, touru Yara Alemes ka Asimapes ta Simiri, ido abu Simiri touru Mosa.

⁴³Touru Mosa Binea, touru Binea Repaia, touru Repaia Eleasa ka touru Eleasa Asel.

⁴⁴Ayakar Asel ŋidwe ŋulusapa ŋikanikapei, ŋirorwa kec lu: Asirikam, Bokeru, Isimael, Searia ka Obadia ta Anan. Ŋidwe ka Asel ŋulusapa ŋul.