Read ngakarimojong 2 Ŋakiro a ŋirwa 1 Bible Online

2 Ŋakiro a ŋirwa 1 - ngakarimojong bible

2 Ŋakiro a ŋirwa 1

¹Abu Solomon lokoku a Daudi kisicat apukan keŋ ejok, arukito iŋes ke Ekapolon Akuj keŋ, ido abu Akuj kituruwo iŋes arwonit.

²Abu Solomon tonyarau Ŋisirael daadaŋ: Ŋikarikok a ŋasigarya a ŋalipulipui, a ŋamiamiae, ŋikatubok ŋakiro, ŋikarikok a Ŋisirael daadaŋ ka ŋikarikok a ŋikalya a Ŋisirael.

³Apotu nai Solomon ka atukot a ŋituŋa daadaŋ ŋulu arukito ka iŋes toloto nakibois ŋinamukur [1] ŋina eyai Gibeon; anerae ayai nen eema ka Akuj ŋolo elipere, ŋolo kebu Moses eketiyan a Ekapolon kitiyau ekiŋaren analoŋisat.

⁴(Nai aris Daudi keyau Asaduku ŋina ka Akuj alo Kirias-Yearim apaki ŋin nakibois ŋina aris Daudi kitemok aŋuna ka Asaduku; anerae aris Daudi kigurok eema ŋolo ka Asaduku Yerusalem.)

⁵Apaki ŋin, ariŋa Namuroet ŋina etiyaunitae ke eburonis eyai Gibeon kiŋaren eema a Ekapolon. Arae Besalel lokoku a Uri ŋolo arae lokoku a Ur iŋes kitiyauni Namuroet ŋin; aŋun, apotu Solomon ka ŋituŋa daadaŋ kilipa neni ke Ekapolon anakibois a ŋin.

⁶Kitipeiyo Solomon nen, kiŋaren Ekapolon, Namuroet ŋina etiyaunitae ke eburonis, ŋina ayai tooma eema ŋolo elipere, ido inak ŋainakineta ŋuna epeyo aliput, topeoi alokidiama Namuroet ŋin.

⁷Akoloŋit ŋin nakwaare, totakanu Akuj neni a Solomon, tema neni keŋ, “Kiŋitae ayoŋ ibore ŋini icamit iyoŋ okoinak ayoŋ iyoŋ.”

⁸Toboŋok Solomon Akuj tema, “Idau iyoŋ akitoodikin amina kon ŋina apolon, ŋina nyiryaŋiryaŋa neni a Daudi a papa kaŋ, ido ikituruwo ayoŋ erwosit ŋolo elunyokin lokicoloŋ keŋ.

⁹Okoe Ekapolon Akuj, kisiyook akiikinet kon ŋina ibu kiik Daudi papa kaŋ, anerae ikituruwo iyoŋ ayoŋ erwosit ŋolo apolokinit ŋituŋa ŋulu alalak nooi ŋulu nyimarun ikwa apuwa ŋina ka akwap.

¹⁰Inakinae ayoŋ aosou ka ayenut, ikotere apedori akirik ŋituŋa lu, anerae ŋae epedori akipuka ŋituŋa kon lu ŋulu alalak?”

¹¹Toboŋok Akuj Solomon tema, “Aŋuna eraakar acamit ke etau kon ŋin, ido nyiŋita iyoŋ ayoŋ ŋiboro ŋulu alalak, ebari, kori apolou, nyiŋita daŋ atemar tomunyarae ŋimoe kon, nabo daŋ nyiŋita iyoŋ ayoŋ ainakin iyoŋ akiyar ŋina aoyan, nai iŋita iyoŋ aosou ka ayenut, ikotere ipukae ŋituŋa kaŋ ŋulu adau ayoŋ ainakin iyoŋ toruwor erwosit kec,

¹²adau ayoŋ ainakin iyoŋ aosou ka ayenut. Akainakini daŋ ayoŋ iyoŋ ŋiboro, ebari ka apolou, ŋulu emam erwosit aryamu ŋinapei koloŋ, ido emam erwosit eryamuni ekaku kon.”

¹³Ekaku a ŋun, abu Solomon totiyaun anamukure a ŋina a Gibeon, alokiŋaren eema ŋolo elipere, tolot Yerusalem, ido kipuka Isirael.

¹⁴Tocunak Solomon iwapei ŋagaari ka ŋaŋolei, arae ekimar a ŋagaari a ŋuna ayakar iŋes aliput ka ŋamiae ŋaomwon ka arae ekimar a ŋaŋolei ŋalipyo ŋatomon ka ŋaarei. Abu iŋes kiwuak ŋagaari ka ŋaŋolei lotaunio ŋulu edaritere ikes ka ŋace kiwuak Yerusalem neni eboiyo iŋes.

¹⁵Abu erwosit kitepetu esilipa ka egolid alo Yerusalem ikwa ŋamoru ka abu kitalala ŋikito a cedar nooi ikwa ŋikito ŋulu ke eki ŋulu eya Sepela.

¹⁶Agyelununui Solomon ŋaŋolei nakwap keŋ alo Ijipit ka alo Kue, ido arae ŋimucurus ŋulu a erwosit ikes agyelununeete ŋaŋolei ŋun alo Kue.

¹⁷Agyelununuyo ŋagaari alo Ijipit a ŋicekelya a ŋulu a esilipa a ŋamiae a ŋakanikapei, ido agyelununuyo ŋaŋolei a ŋicekelya a ŋulu ke esilipa a amiat ka ŋatomonikan. Agyelanarete ŋimucurus a erwosit ŋul ŋaŋolei ka ŋagaari lorwosi ŋulu a Ŋiitaiti ka ŋulu ka Aram.