Read ngakarimojong 2 Ŋakiro a ŋirwa 12 Bible Online

2 Ŋakiro a ŋirwa 12 - ngakarimojong bible

2 Ŋakiro a ŋirwa 12

¹Kedau Reoboam akisicat apukan keŋ ka agogoŋior ikwapei erwosit a Yudaya, abu iŋes kaapei ka Ŋisirael daadaŋ toesikis akiwuapit ŋikisila ŋulu ke Ekapolon.

²Alokaru a ŋolo a ŋikan ipukat erwosit Reoboam Yudaya, abu Sisak erwosit a Ijipit torem Yerusalem, anerae apotu Ŋisirael tojoŋoto akikinyomit Ekapolon.

³Ani ebuni Sisak akirem Yerusalem, ayakar ŋagaari aliput ka ŋamiae ŋaarei ka ŋikilyok ŋatomonikanikapei ŋulu aya naŋolei ta ŋulu alosete a ŋakejen ŋulu pa emarun, aponito ikes alo Ijipit ka ŋituŋa ŋulu alo Libia, alo Sukiim ka alo Esiopia.

⁴Kikama Sisak ŋitaunio ŋulu aya ŋaduketa ŋunajiet alo Yudaya, tolot kitijik tari Yerusalem.

⁵Abu nai ekadwaran ŋolo anyaritae Semaia tolot neni a Reoboam ka neni a ŋikarikok a Yudaya a ŋulu acunakina Yerusalem apaki ŋin aŋuna akeritotor Sisak, tema neni kec, “Ŋakiro ŋuna irworo Ekapolon ikes nu ebe, ‘Idaut iyes akimyekin ayoŋ; aŋun, ekemyekini ayoŋ iyes tokona anapedor a Sisak.’ ”

⁶Apotu nai ŋikarikok a Ŋisirael ka erwosit kitiditeunos make temasi, “Iyookino ŋuna itiyae Ekapolon.”

⁷Ani eanyuni Ekapolon atemar etiditeunosi ikes make, abu tolimok Semaia ŋakiro nu ebe, “Aŋuna etiditeunotor ikes make, nyamunyari ayoŋ ikes, nai alakuni ayoŋ ikes apaki napei na. Nyaesikini ayoŋ Yerusalem ananyunyura kaŋ, nyemyekini ayoŋ Sisak kisican Yerusalem.

⁸Kikote neni daŋ, epolokini Sisak ikes, ikotere eyenunete atyeketait ŋina eyai nakitiyanakin ayoŋ ka nakitiyanakin ŋirwosi a ŋakwapin.”

⁹Ani eremi erwosit a Ijipit ŋolo anyaritae Sisak Yerusalem, abu kiwok ebari ŋolo ayai Kai ke Ekapolon ka ebari ŋolo ayai kai ke erwosit, ya iŋes ŋiboro daadaŋ, ya tari ŋaupala ŋuna etiyaunit Solomon a egolid.

¹⁰Nai abu erwosit Reoboam kitiyau ŋaupala ŋace ke eburonis, kilunyok neni a ŋuna aponi tolemarae. Inak neni a ŋulu apolokinito ŋulu eteete ŋipukei a akai a erwosit.

¹¹Apaki daadaŋ ŋina alosyo erwosit Kai ke Ekapolon, atiŋeneneete ŋiketeok keŋ ŋaupala torukosi ka iŋes, ani ekaku, kinyakasi ŋaupala nagule ŋina eyokiyere akai a erwosit.

¹²Aŋuna abunio Reoboam kitiditeun bon, abu Ekapolon tojoŋo anyunyurikinit iŋes ikotere nyemunya ikes todaunos jik; kikote neni daŋ, aya ŋakiro ŋace ŋuna ajokak alo Yudaya.

¹³Abu nai Reoboam kisicat apukan keŋ alo Yerusalem, torubak ipukat erae erwosit. Arae ŋikaru keŋ ŋatomoniomwon ka epei apaki ŋina esyakinia akipuka, kipuka iŋes Yudaya alo Yerusalem ŋikaru ŋitomon ka ŋikanikaarei. Arae Yerusalem etaun ŋolo abu Ekapolon toseu alotaunio a ŋikabilae a Ŋisirael a daadaŋ atemar kilipere iŋes. Arae ekiro a toto a Reoboam Naama, arae iŋes Amonait.

¹⁴Abu Reoboam kitiya aronis, anerae kebu iŋes nyemitak alotau keŋ akiwarit ŋuna ke Ekapolon.

¹⁵Ŋiticisyo nai a Reoboam daadaŋ ka ŋuna kebu iŋes kitiya, ameun ŋuna esyaunak tari ŋuna esidyok, igiritae lokitaabo ŋolo a ŋakiro a ekadwaran Semaia ka ŋolo a ŋakiro a Ido a ŋolo arae eketeyenikinan, lokitaaboi ŋulu igirito ikes ŋakiro a ŋanyameta. Apaki ŋin, aya ŋijiesyo ŋulu arubakinito eya neni a Reoboam ka Yeroboam.

¹⁶Abu Reoboam totwana, ido aponi tonukae iŋes lotaun a Daudi. Abu lokoku keŋ Abiya kilunyokin lokicoloŋ keŋ kipuka Yudaya.