Read ngakarimojong 2 Ŋakiro a ŋirwa 15 Bible Online

2 Ŋakiro a ŋirwa 15 - ngakarimojong bible

2 Ŋakiro a ŋirwa 15

¹Abu etau ŋolo ka Akuj min neni ka Asaria alokoku ka Oded.

²Tolot Asaria neni ka Asa tema, “Kiirasi ŋakiro kaŋ, iyoŋ Asa ka ŋituŋa a Yudaya daadaŋ ta ŋulu a Benjamin. Irukito iyes ke Ekapolon erae ca kirukito iyes ka iŋes. Ani kiwara iyes iŋes, ikimyekini iŋes iyes toryamut iŋes, nai ani kimyekis iyes iŋes, ikimyekini iŋes daŋ iyes.

³Eboiyoto Ŋisirael ekaoyan pa eyenete Akuj ŋina a kire, emamukatar esacaradoti ŋolo itatami ikes ka emamukatar ŋikisila.

⁴Nai apotu ikes alocan kec toboŋut neni a Ekapolon Akuj a Ŋisirael, kiwara iŋes, ido apotu toryamut iŋes.

⁵Alorwa a ŋul, pa apatana akilare iwace, anerae ayai egurigur ŋolo apolon lotuŋa daadaŋ ŋulu a ŋakwapin.

⁶Aarete ŋituŋa ka akwap ka apei ŋulu ka akwap a ŋinace, aarete ŋulu ke etaun ke epei ŋulu a ŋoloce, etiyasi ŋun, anerae Akuj abu yau neni kec ŋican ŋul ka ŋakiro ŋun ŋuna aronok daadaŋ.

⁷Nai ani eruwor iyes, totitinyikisi, nyijamakis ŋuna itiyaete iyes, anerae ikiinakinio iyes eropit anakiro a ŋuna itiyaete iyes.”

⁸Ani iirari Asa ŋakiro ŋun, ŋuna adwari Asaria lokoku ka Oded, abu atitinyu min neni keŋ. Tolema ŋitorubei a ŋakujo anakwap a Yudaya ka Benjamin daadaŋ ta alotaunio a ŋulu abu iŋes kikama anakwap a ŋina a ŋikamukumukui, a ŋina ke Epuraim. Abu iŋes todukok nabo Namuroet ŋina ke Ekapolon kiŋaren ebarasan ŋolo ayai kiŋaren Akai a Ekapolon.

⁹Ekaku a ŋun, abu iŋes tocunak ŋituŋa daadaŋ ŋulu a Yudaya ka Benjamin ka ŋulu keponito akiboi Yudaya alo Epuraim ka Manase ta alo Simeon. Kepotu ŋituŋa ŋulu alalak nooi potu alo Isirael akiboi Yudaya, anerae kepotu toanyut atemar erukito Asa ke Ekapolon Akuj keŋ.

¹⁰Apotu ŋituŋa ŋul tocunakinos Yerusalem elap ŋolo a ŋiuni alokaru a ŋolo a ŋitomon ka ŋikan ipukat Asa Yudaya.

¹¹Apotu ikes apaki ŋin inakis neni ke Ekapolon ŋamuronisya ŋimoŋin ŋamiae ŋakanikaarei ŋamesekin ŋalipyo ŋakanikaarei. Arae ŋibaren ŋul ŋulu keŋatunete ikes.

¹²Tocamunos ikes akilip a ŋitai kec a daadaŋ ka anakiyar kec a daadaŋ neni ke Ekapolon Akuj atapapaa kec.

¹³Ituŋanan daadaŋ ŋini eŋeri akilip neni ke Ekapolon Akuj a Ŋisirael, amaikina toarae, kerae ŋini esorokana, kori ŋini emojoŋit, ekile kori aberu.

¹⁴Kikoŋo ikes neni ke Ekapolon ecelasi ikeunito ŋitoilon, tokusete ŋarupepe ka ŋabureryaŋae a ŋimesekin.

¹⁵Tolelyana ŋituŋa a Yudaya daadaŋ aŋuna ka akikoŋ a ŋin, anerae apotu ikes kikoŋo a ŋitai kec a daadaŋ ka apotu kiwara Ekapolon alotooma acamit kec daadaŋ, ido apotu toryamut Ekapolon, inak Ekapolon ikes ekisil alowaetin a akwap kec a daadaŋ.

¹⁶Abu erwosit Asa tolema tari toto keŋ Maaka anaraakau arwosit, anerae kebu toto ka Asa kitiya asiilyo, kitiyau etorube ka akuj a ŋina anyaritae Asera. Abu Asa totubutubok kwap etorube ŋol, kicakicak, ido kicuny ŋanyile anayonae a ŋina enyaritae Kidiron.

¹⁷Nai abu Asa nyelema ŋaduketa alo Isirael ŋuna aya neni amukur ŋuna elipere ŋakujo. Kikote neni daŋ, ekinyomit Asa alotau keŋ Ekapolon alorwa a daadaŋ a ŋulu ka akiyar keŋ.

¹⁸Abu iŋes yau Kai ka Akuj ŋainakineta ŋuna kebu papa keŋ Abiya kikoŋ ainakin aŋuna ka Akai ka Akuj ka ŋuna abu iŋes kikoŋ ainakin aŋuna ka Akai ka Akuj, ŋiboro ŋul ikes: Esilipa, egolid ka ŋiboro ŋulukipoet ta ŋulukimujet.

¹⁹Mam ejie ece abu min Yudaya akitodol lokaru ŋolo a ŋatomoniuni ka ŋikan ipukat Asa Yudaya.