Read ngakarimojong 2 Ŋakiro a ŋirwa 18 Bible Online

2 Ŋakiro a ŋirwa 18 - ngakarimojong bible

2 Ŋakiro a ŋirwa 18

¹Abu Yeosapat toyakaunor ebari ŋolo alalan nooi ka abu torwoniar nooi. Apotu iŋes tocamunos ka Aab atemar kiitanakin ŋituŋa a ŋikalya kec.

²Ekaku a ŋikaru a ŋice, abu Yeosapat totiyaar tolot apeyo neni ka Aab Samaria. Toar Aab ŋamesekin ka ŋaatuk ŋuna alalak aŋuna a Yeosapat ka ŋituŋa ŋulu arukitotor, kimaima Aab Yeosapat akirem Ramos-Gilead.

³Kiŋit Aab erwosit a Isirael Yeosapat erwosit a Yudaya tema, “Ipedori iyoŋ arukor ka ayoŋ akitijiore Ramos-Gilead a?” Toboŋok Yeosapat tema, “Ikirae iwon ŋipei, erae ŋituŋa kaŋ ŋulu kon, ikimorikin isua ka iyes alojie.”

⁴Nai abu daŋ Yeosapat tema neni a erwosit a Isirael, “Kiŋitu mono ŋuna ebala Ekapolon.”

⁵Aŋun, abu erwosit a Isirael tonyarau ŋikadwarak ŋulu arae ekimar ŋamiae ŋaomwon; kiŋit ikes tema, “Ikilosi akitijiore ŋituŋa a Ramos-Gilead, kori nyikilosi?” Toboŋokis ikes temasi, “Apesi kitipeiyosi, anerae einakini Akuj Ramos-Gilead neni ke erwosit.”

⁶Nai abu Yeosapat kiŋit erwosit a Isirael tema, “Mam mono ekadwaran ece eyai ne ŋolo epedorere iwon akiŋitunia ŋakiro aneni ke Ekapolon a?”

⁷Toboŋok erwosit a Isirael Yeosapat tema, “Eyai nabo ekile epei, ŋolo epedorere iwon akiŋitunia ŋuna ebala Ekapolon, erae ekiro keŋ Mikaia, lokoku a Imela. Nai nyacamit ayoŋ ekile ŋol, anerae nyedwarenene iŋes ŋakiro ŋuna eketalakarito ayoŋ, edwarenene ŋuna a ŋican bon.” Tema Yeosapat, “Nyemaikina erwosit irworo ŋakiro ŋuna ikote ŋun.”

⁸Tonyarau nai erwosit a Isirael epei a ŋikapolok a akwap keŋ, tema, “Yau atipei Mikaia lokoku a Imela laalo.”

⁹Apaki ŋin, anapito erwosit a Isirael ka Yeosapat erwosit a Yudaya ŋilowi kec ŋulu ka apolou, kiboiyete analapatu a ŋina alotooma epuke ŋolo ke etaun alokicoloŋo kec a ŋulu ka apolou. Ayai alapatu ŋin lopuke ke etaun Samaria, ido apotu ŋikadwarak daadaŋ todwara a nen alokiŋaren kec.

¹⁰Apaki ŋin, keris Sedekia lokoku a Kenaana kitiyau ŋamomwar a ŋasuwa, ido abu iŋes tema, “Ebala Ekapolon, ‘A ŋamomwar a nu, itiji iyoŋ ŋituŋa ka Aram akitodol ŋina imunyarya.’ ”

¹¹Apotu ŋikadwarak ŋuluce daadaŋ todwara ŋakiro ŋunapei ŋun temasi, “Ape, kitijik ŋituŋa a Ramos-Gilead, ireuni iyoŋ ikes, anerae einakini Ekapolon Ramos Gilead neni kon a erwosit.”

¹²Tema ekiyakia ŋolo eyakitae anyarare Mikaia neni a Mikaia ebe, “Kiira nu, ikwaan ŋakiro ŋuna erwor ŋikadwarak ŋuluce, erae ŋuna italakarito erwosit, kirwor iyoŋ daŋ ŋakiro ŋuna ikwaan ka ŋuna kec, ŋuna italakarito erwosit.”

¹³Nai abu Mikaia tema neni keŋ, “Ikwapei eyarya Ekapolon, erwori ayoŋ ŋuna akalimokini ayoŋ Akuj kaŋ.”

¹⁴Ani edoluni Mikaia neni ke erwosit, kiŋit erwosit iŋes tema, “Mikaia, elosyo isua akitijiore ŋituŋa a Ramos-Gilead, kori nyikilosi?” Toboŋok Mikaia iŋes tema, “Apesi kitipeiyosi kitijikis ikes kilout; einakini Ekapolon Ramos-Gilead neni a erwosit.”

¹⁵Nai abu erwosit kiŋit iŋes tema, “Ŋakisikoŋiet ŋayai emaikina ayoŋ ekesikoŋ iyoŋ, ikotere ikilimok iyoŋ ayoŋ ŋuna a kire alokiro ke Ekapolon?”

¹⁶Tolimok nai Mikaia iŋes tema, “Abu ayoŋ eŋolik ŋituŋa a Isirael daadaŋ ielar lokamukumukui ikwa ŋamesekin ŋuna emam ekeyokon, ido abu Ekapolon tema, ‘Mam lu ekapolon kec, itemokino ikes tolot ŋinituŋanan lore keŋ a ekisil.’ ”

¹⁷Tema erwosit a Isirael neni a Yeosapat, “Pa mono akalimokinit ayoŋ iyoŋ atemar mam ŋakiro ŋuna ajokak ŋuna edwari iŋes aŋuna kaŋ mati ŋuna a ŋican bon a?”

¹⁸Tema nai Mikaia neni keŋ, “Kiira ŋakiro ke Ekapolon nu, abu ayoŋ eŋolik Ekapolon iboi alokicoloŋ keŋ a ŋolo ka apedor, ewuasi ŋimalaikan ŋulu anakuj daadaŋ aloteten ka alokedyeny keŋ.

¹⁹Tema nai Ekapolon, ‘Ŋae epedori amodiyar Aab erwosit a Isirael lojie, ikotere elosi toarae alo Ramos-Gilead?’ Tolimu nai emalaika epei ŋakiro ŋace, ido tolimu ece ŋace,

²⁰akitodol ŋina abunio etau kiŋaren towo alokiŋaren Ekapolon tema, ‘Amodiyari ayoŋ iŋes.’ Kiŋit Ekapolon iŋes tema, ‘Ikwaani?’

²¹Toboŋok etau tema, ‘Alosi ayoŋ oinak ŋikadwarak ka Aab daadaŋ kirworo alyokonu.’ Tema Ekapolon, ‘Ape tomodiya iŋes. Ipedori iyoŋ amodiyar iŋes.’ ”

²²Toŋetak Mikaia ŋakiro keŋ ebala, “Erae ŋakiro nu ŋuna atakanut, adau Ekapolon akituruwor ŋikadwarak kon ŋulu irworosi alyokonu neni kon. Nai alimu Ekapolon elope atemar iryamuni iyoŋ ŋican.”

²³Tolot nai Sedekia lokoku a Kenaana neni a Mikaia kibap lokeli, kiŋit tema, “Ai etori etau ke Ekapolon aneni kaŋ ebuni akisirwor iyoŋ?”

²⁴Toboŋok Mikaia iŋes tema, “Iyenuni iyoŋ ŋakiro nu akoloŋit ŋina ilosyo iyoŋ akiŋop nagule ŋina alokidiŋ akai.”

²⁵Tonyarau nai erwosit a Isirael epei a ŋikapolok a akwap keŋ tema, “Ape ya Mikaia, kinyaka iŋes neni ka Amon a ekapolon a etaun ka neni a Yoas alokoku a erwosit,

²⁶tolimok iyoŋ ikes atemar, ŋakiro ŋuna irworo erwosit ikes nu, ‘Kiwuakisi etuŋanan lo lojera, inanakis iŋes ŋamugati ka ŋakipi ŋadikudyo akitodol ŋina aboŋunio ayoŋ alojie emam ŋace.’ ”

²⁷Tolimok Mikaia iŋes tema, “Ani kire kiboŋu iyoŋ alojie emam ŋace, iŋes atemar nyirworo Ekapolon neni kon aneni kaŋ.” Toropak iŋes erwor keŋ tema, “Kiirasi ŋituŋa daadaŋ ŋakiro ŋuna adau ayoŋ alimun!”

²⁸Aŋun, apotu erwosit a Isirael ka Yeosapat erwosit a Yudaya kitipeiyosi Ramos-Gilead.

²⁹Tema erwosit a Isirael neni a Yeosapat, “Anapi ayoŋ etusubun ecaryoit alosi lojie, nai emaikina iyoŋ tonap ŋilowi kon ŋulu ka apolou.” Abu nai erwosit a Isirael tonap kitusubun ecaryoit, ido tolot lojie.

³⁰Apaki ŋin, keris erwosit ka Aram kicik ŋikapolok a ŋasigarya keŋ ŋulu a ŋagaari a ŋuna iritae a ŋaŋolei ebe, “Nyilot akitijiore ituŋanan idio ŋinicaryoit, kori ŋini itopolooritae, nai kitijioto erwosit a Isirael.”

³¹Ani iŋolikinete ŋikapolok ŋulu ameto ŋagaari ŋuna eritae a ŋaŋolei ŋul Yeosapat, temasi, “Erae lo kire erwosit a Isirael.” Aŋun, apotu ikes toloto akitijiore Yeosapat; kiworou Yeosapat, kiŋarak Ekapolon iŋes, kitoboŋo Akuj ikes aneni a Yeosapat.

³²Ani eyenunete ŋikapolok ŋul atemar meere ŋol erwosit a Isirael, apotu kimyekis akiwuapit Yeosapat.

³³Nai kebu esigarit epei ŋolo ka Aram topeto ekaleŋeleŋet keŋ, kicwanya Aab toŋicar aloboro keŋ aŋulu ke ejie a ŋulu anapit iŋes, togum iŋes. Tema erwosit neni a ekameton agaari keŋ, “Kibelekin, yaarae ayoŋ a lojie, anerae akawani ayoŋ.”

³⁴Tomwanu ejie nooi akoloŋit ŋin, torubak erwosit a Isirael iboi anagaari keŋ iŋoliyarit neni ayakasi Ŋiarameani akitodol eboŋ. Ani edoiyori akoloŋ, kiridak iŋes.