Read ngakarimojong 2 Ŋakiro a ŋirwa 2 Bible Online

2 Ŋakiro a ŋirwa 2 - ngakarimojong bible

2 Ŋakiro a ŋirwa 2

¹Totyaku Solomon akiduk Akai ka Akuj aŋuna ke ekiro ke Ekapolon ka akiduk akai ŋina ka apukan aŋuna keŋ.

²Abu iŋes toreik ŋikilyok ŋalipyo ŋatomonikanikaarei aruwor ŋiketiyak ka ŋikilyok ŋalipyo ŋatomonikanikauni aruwor ŋikebetak ŋamoru alokamukumukui, kiwuak ŋikilyok ŋalipyo ŋauni ka ŋamiae ŋakanikapei aruwor ŋulu epolokinito ŋiketiyak ŋul.

³Kiyakiya Solomon ŋakiro keŋ neni a Iiram ke erwosit a Tiro tema, “Ibu iyoŋ paaran kitiya ŋuna ajokak neni a papa kaŋ Daudi, ibu kiyakik iŋes ŋakito ŋuna a cedar, ikotere iŋes edukokini akai ŋina iboikin iŋes.

⁴Aapuu ayoŋ tokona adukokin Akai ŋina ilipere neni ke Ekapolon Akuj kaŋ, ido etaleu Akai ŋin aŋuna ka akicunyia ekinyate ŋolo akukunyon alokiŋaren Ekapolon ka ainakinia iŋes ŋamugati jwi jwi, apeyo ŋainakineta taparacu ka eboŋ, apeyo ŋainakineta ŋarwa ŋuna a Sabato ka ŋuna elomunia elap ta akitiya ŋasuban ŋuna ikicikakinitae isua akitiyaenen neni ke Ekapolon Akuj kosi. Erae ŋol etal ŋolo einakinitae Ŋisirael kitiyaete ŋikaru ka ŋikaru.

⁵Epol nooi Akai ŋina alosi ayoŋ akiduk, anerae epol nooi Akuj kosi akilo ŋakujo ŋunace daadaŋ.

⁶Nai, ŋae mono epedori adukokin Akuj Akai, anerae tari nakuj kidiama nooi etya neni etya, nyitemokino iŋes? Ŋae nai ayoŋ adukokini iŋes Akai, alemar akibois ŋina einanakinere iŋes ŋainanakineta?

⁷Aŋun, kiyakikinae ayoŋ ekile ŋolo eyeni nooi akitiya ŋiboro a egolid, a esilipa, a eburonis, a ŋasuwa ka a ŋiraŋgi a lu: A ŋolo kipurat-areŋan, a ŋolo areŋan puu ka a ŋausi a ŋunapusiyek. Ekile ŋolo itatamitae akicienakin ŋitorubei loboro, ikotere iŋes kitiyata kaapei ka ŋituŋa kaŋ ŋulu eya Yudaya ka Yerusalem, ŋulu abu papa kaŋ Daudi okoinak ayoŋ, ŋulu eyenete nooi akiciere ŋiboro.

⁸Kiyakikinae daŋ ayoŋ alo Lebanon tari ŋakito nu: Ŋuna a Cedar, ŋuna a Cipres ka ŋuna enyaritae alemugim, anerae ayeni ayoŋ atemar eyenete nooi ŋiketiyak kon akitub ŋakito. Epote nai ŋiketiyak kaŋ akitiya ka ŋulu kon,

⁹akitemonokin aŋuna kaŋ ŋakito ŋuna alalak, anerae Akai ŋina eapi ayoŋ akiduk, eruwor ŋina epol ka ŋina ibus nooi.

¹⁰Ainuni ayoŋ ŋiketiyak kon ŋulu etubete ŋakito ŋikinyom a ŋaganoi ŋakiloi ŋalipyo ŋaomwon ka ŋamiae ŋaomwon, ŋikinyom ŋulu ikote erau ŋakiloi ŋalipyo ŋaomwon ka ŋamiae ŋaomwon ka epiini ŋilitae ŋamiae ŋaomwon ka ŋatomoniomwon ta akimyet ŋilitae ŋamiae ŋaomwon ka ŋatomoniomwon.”

¹¹Abu nai Kiram erwosit ŋolo a Tiro toboŋok ŋakiro a Solomon, kigir abaruwa neni a Solomon eya ŋakiro nu, “Aŋuna eminar Ekapolon ŋituŋa keŋ, ikituruwo iyoŋ erwosit kec.”

¹²Tema daŋ Kiram, “Akipuro toyai neni ke Ekapolon Akuj a Isirael ŋina abu tosub nakuj ka akwap, ŋina adau ainakin erwosit Daudi ikoku ŋinisapat ŋini aoson, ŋini einakinitae aosou ka ayenut ŋuna ajokak ka ŋuna aronok, ŋini elosi akiduk Akai aŋuna a Ekapolon ka akai ŋina ka apukan aŋuna keŋ.

¹³“Eyakuu ayoŋ neni kon Uram-Abi, ekile ŋolo eyeni etic nooi,

¹⁴ŋolo arae toto keŋ ŋina alo a Dan ka papa keŋ arae ŋolo alo Tiro. Itatamitae iŋes akitiya ŋiboro a egolid, a esilipa, a eburonis, a ŋasuwa, a ŋamoru ka a ŋakito. Eyeni akitiya ŋiboro a ŋiraŋgi a lu: A ŋolo kipurat-areŋan, a ŋolo pus ka a ŋausi a ŋuna areŋak puu ta ŋuna amilimilak. Eyeni sek iŋes nooi etic ŋolo ka akicieanakin ŋitorubei loboro, itiyauni ibore lopite ŋolo eyakar ŋinibore einakinio iŋes akitiyaun. Ebuni iŋes akitiya ka ŋituŋa a papa kon Daudi, ekapolon kaŋ.

¹⁵Aŋun ekapolon kaŋ, kiyakikinae isua ŋulu ikirae ŋiketiyak kon ŋamuja nu ŋuna idau iyoŋ akiikin isua, ŋaganoi, ŋikinyom ŋulu ikote erau, epiini ka akimyet.

¹⁶Etubunio isua ŋakito daadaŋ ŋuna icamit iyoŋ alo Lebanon, yaunae neni kon eeniyanara. Iwokunete ŋakipi a anam ŋakito ŋun tari Yopa, ido ya iyoŋ ikes a nen tari Yerusalem.”

¹⁷Abu nai Solomon kimar ŋituŋa ŋulugelaanotin daadaŋ ŋulu eboiyete anakwap a Ŋisirael, lopite ŋolo sek emaritor papa keŋ Daudi ŋituŋa. Abu Solomon kimaru ŋituŋa erae ŋalipyo amiat ka ŋatomonikan ka ŋiuni ka ŋamiae ŋakanikapei.

¹⁸Kiwuak ŋalipyo ŋatomonikanikaarei toruwor ŋiketiyak, ŋalipyo ŋatomonikanikauni toruwor ŋikebetak ŋamoru alokamukumukui, ŋalipyo ŋauni ka ŋamiae ŋakanikapei toruwor ŋikapolok ŋulu isitiyaete ŋuluce.