Read ngakarimojong 2 Ŋakiro a ŋirwa 21 Bible Online

2 Ŋakiro a ŋirwa 21 - ngakarimojong bible

2 Ŋakiro a ŋirwa 21

¹Ekaku, abu Yeosapat totwana ikwapei atapapaa keŋ, ido aponi tonukae lotaun a Daudi neni anukitae atapapaa keŋ. Abu Yeoram lokoku keŋ kilunyokin lokicoloŋ keŋ kipuka Yudaya.

²Ayakar Yeoram ŋikaitotoi keŋ ŋidwe a Yeosapat a papa keŋ, ŋirorwa kec ikes lu: Asaria, Yeiel, Sakariya, Asaria, Mikael ka Sepatia. Arae ŋul daadaŋ ŋidwe a Yeosapat a erwosit a Yudaya ŋulusapa.

³Abu papa kec inak ikes ŋainakineta ŋuna alalak nooi ŋuna a esilipa, a egolid ka ŋiboro ŋice ŋulu epol egyelit, abu inak ikes tari ŋitaunio alo Yudaya ŋulu adukitoe ŋaduketa ŋunajiet, nai abu Yeosapat inak apukan neni a Yeoram, anerae Yeoram arae ekiyae keŋ.

⁴Kedau Yeoram akisicat apukan keŋ ejok anakwap a ŋina sek epukat papa keŋ, abu toar ŋikaitotoi keŋ daadaŋ kaapei ka ŋikapolok ŋice ŋulu anakwap a Isirael.

⁵Arae ŋikaru a Yeoram ŋatomoniuni ka ŋiarei apaki ŋina esyakinia iŋes akipuka, kipuka iŋes Yudaya alo Yerusalem ŋikaru ŋikanikauni.

⁶Abu Yeoram kiwuap ŋakiro ŋuna aronok ŋuna etiyato ŋirwosi a Isirael, kitiya Yeoram lopite ŋolo etiyator ekal ŋolo ka Aab, anerae arae aberu keŋ nakoku ka Aab. Abu Yeoram kitiya ŋuna aronok alokiŋaren Ekapolon.

⁷Tari kikote neni daŋ, pa acamit Ekapolon akinyasun apukan a ekal a Daudi, anerae eikinit sek iŋes eketiyan keŋ Daudi atemar etoropari ŋiletok keŋ ipukato ŋikaru ka ŋikaru.

⁸Ŋirwa ŋulu epukator Yeoram Yudaya, apotu ŋituŋa ŋulu ka akwap a Edom toŋero epite ŋolo epukator erwosit a Yudaya ikes; topakaros ikes kipukakinos make.

⁹Aŋun, tonyout Yeoram ka ŋikarikok a ŋasigarya keŋ ka ŋikametok ŋaŋolei ŋuna a ŋagaari, toloto nakwaare akitijikin Ŋiedomi ŋulu keris kirikaut iŋes kaapei ka ŋikametok ŋaŋolei ŋuna a ŋagaari keŋ.

¹⁰Aŋun, eriŋa ŋituŋa ke Edom eŋerito atemar kipuka Yudaya akwap kec. Ŋituŋa a Libina daŋ toŋero ŋirwa ŋulupei atemar kipuka ikes erwosit a Yudaya, anerae kebu Yeoram toŋer Ekapolon Akuj atapapaa keŋ.

¹¹Abu Yeoram toduk ŋaduketa ŋunakilipet ŋakujo nakiboisyo ŋunamukur alo Yudaya. Abu kibata ŋituŋa a Yerusalem kituruwo ŋulu pa ekinyomito Akuj, apotu ŋituŋa a Yudaya toŋero Akuj.

¹²Aponi yaunae abaruwa neni a Yeoram aneni ke Eliya a ekadwaran ebala, “Ŋakiro ŋuna irworo Ekapolon Akuj a papaa kon a Daudi ikes nu ebe, ‘Nyiwuapa iyoŋ ŋuna amaikina kiwuap lopite ŋolo abunio papa kon Yeosapat kiwuapya, kori lopite ŋolo abunio Asa erwosit a Yudaya kiwuapya.

¹³Nai iwuap iyoŋ ŋuna itiyaete ŋirwosi ŋulu a Isirael ka ituruwo iyoŋ ŋituŋa a Yudaya ka ŋulu iboiyete alo Yerusalem ŋulu nyikinyomito Akuj lopite ŋolo aponiata ŋituŋa a ekal ka Aab kitiyata ka daŋ aŋuna iarya iyoŋ ŋikaitotoi kon, ŋituŋa a ekal a papa kon ŋulu ajokak akilo iyoŋ,

¹⁴kiira tokona, eyauni Ekapolon akisicanet ŋina apolon nooi lotuŋa kon, lodwe kon, naberu kon ka neni a ŋinibore daadaŋ iyakar iyoŋ.

¹⁵Iyoŋ daŋ elope idyakakin nooi edeke ŋolo a ŋiboro a akook ŋolo iata a ŋinakoloŋit akitodol ŋina itolomunia edeke ŋol ŋiboro a kook kiŋa.’ ”

¹⁶Abu Ekapolon inak Ŋipilistin ka Ŋiarabi ŋulu ayakasi diyete Esiopia kimana Yeoram.

¹⁷Apotu Ŋipilistin ka Ŋiarabi ŋul toremo Yudaya, yaasi ŋiboro daadaŋ ŋulu aya kai a erwosit, yaasi tari ŋidwe a erwosit ŋulusapa ka ŋaberu a erwosit. Mam Isapat abu Yeoram kidoŋioto, mati Aasia bon lokoku keŋ ŋolo cici.

¹⁸Ekaku a ŋakiro a ŋun daadaŋ, abu Ekapolon kitedyakak Yeoram edeke ŋolo a ŋiboro ka akook, ŋolo amam ekitoe.

¹⁹Alotooma ŋikaru ŋiarei, abu edeke ŋol kikam Yeoram erono nooi akitodol ŋina eridakinia eryeba nooi. Apotu ŋituŋa keŋ nyinokokis akim akitoodiun akitopoloorit iŋes lopite ŋolo enokonokiniata akim akitopoloorit atapapaa keŋ.

²⁰Arae ŋikaru a Yeoram ŋatomoniuni ka ŋiarei isyakini akipuka Yudaya. Abu iŋes kipuka Yudaya alo Yerusalem ŋikaru ŋikanikauni. Mam ituŋanan abu kiyaloloŋ aŋuna keŋ apaki ŋina atwania. Aponi tonukae iŋes lotaun a Daudi, nai meere neni anukitae ŋirwosi ŋuluce.