Read ngakarimojong 2 Ŋakiro a ŋirwa 22 Bible Online

2 Ŋakiro a ŋirwa 22 - ngakarimojong bible

2 Ŋakiro a ŋirwa 22

¹Apotu ŋituŋa a Yerusalem kituruwosi lokoku a Yeoram ŋolo cici ŋolo anyaritae Aasia erwosit, kilunyokin lokicoloŋ a papa keŋ, anerae kepotu Ŋipilistin ka Ŋiarabi toara ŋidwe a Yeoram ŋulusapa daadaŋ ŋulu apolok. Aŋun, abu Aasia lokoku a Yeoram kipuka Yudaya ikwapei erwosit.

²Arae ŋikaru ka Aasia ŋatomoniarei ka ŋiarei apaki ŋina esyakinia akipuka; kipuka iŋes Yudaya alo Yerusalem ekaru epei. Arae ekiro a toto keŋ Atalia, napapait a Omri.

³Abu Aasia daŋ kiwuap akitiya ŋuna aronok ŋuna etiyae ekal ka Aab, anerae etatami toto keŋ iŋes akitiya ŋuna aronok.

⁴Abu Aasia kitiya ŋuna aronok alokiŋaren Ekapolon, lopite ŋolo sek etiyaa ekal ka Aab, anerae ekaku ketwana papa keŋ, apotu ŋituŋa a ekal ka Aab toruwor ŋiketatamak Aasia akitodol ŋina amunaaryata iŋes.

⁵Abu daŋ Aasia tocamu ŋakiro a ŋituŋa a ekal ka Aab, apotu iŋes kaapei ka Yeoram lokoku ka Aab a erwosit a Isirael yaasi ŋasigarya kec akitijiore erwosit Asael ŋolo ka Aram aneni anyaritae Ramos-Gilead. Apotu ŋasigarya ka Aram towana Yeoram alojie a ŋol.

⁶Toboŋo erwosit Yeoram lotaun Yesireel akimad ŋajemei ŋuna abu iŋes toryamu anasigarya ka Aram ejio alo Rama, apaki ŋina ajioto ikes ka Asael erwosit ŋolo ka Aram. Abu erwosit Aasia lokoku a Yeoram a ŋolo a Yudaya tolot aanyun Yeoram lokoku ka Aab alotaun Yesireel aneni aryebar.

⁷Analosit Aasia aanyun Yeoram, abu Akuj kitemok ŋuna ka atwanare keŋ. Ani edoli Aasia Yesireel, abu torukosi ka Yeoram akisiryam Yeu lokoku a Nimisi, ŋolo sek keris Ekapolon Akuj keseu amunyar ekal ka Aab.

⁸Ani eriŋa Yeu itiyae ŋuna abala Ekapolon iŋes kitiya neni a ŋituŋa a ekal ka Aab, kiryamunos iŋes ka ŋikarikok ŋulu a Yudaya erukito ka ŋidwe ŋulusapa ŋulu a ŋikaitotoi a Aasia, ŋituŋa ŋulu sek etiyanakinete Aasia. Abu Yeu toar ŋituŋa ŋul daadaŋ.

⁹Kisiwara Yeu ŋasigarya keŋ Aasia, kikamunae Aasia alo Samaria aneni kebu toem akiŋop. Apotu ŋasigarya yaut Aasia neni a Yeu ka aponi toarae. Tonuka ikes Aasia, anerae apotu temasi, “Erae iŋes lopapait a Yeosapat a ŋolo abu kiwar a etau keŋ a daadaŋ akiwuap Ekapolon.” Abu todaun alokal ka Aasia ituŋanan ŋini epedori akipuka Yudaya.

¹⁰Ŋinapei ayenunia Asalia ŋina arae toto a erwosit Aasia atemar aari lokoku keŋ, totub atemar toarae ŋituŋa daadaŋ ŋulu ke ekal a erwosit Aasia a ŋolo a Yudaya.

¹¹Nai abu Yeoseba nakoku a Yeoram a erwosit, ŋina arae nakaato a erwosit Aasia torae daŋ aberu a esacaradoti a ŋolo anyaritae Yeoiyada kinunaiya Yoas lokoku ka Aasia alokidiŋ ŋidwe ŋulu ke erwosit ŋulu acamitae akiar; kiwua Yeosaba iŋes ka aketen keŋ anagule alo Kai ka Akuj, ikotere Asalia nyear.

¹²Kiboiyoto Yoas ka aketen keŋ eŋopito alo Kai ka Akuj ŋikaru ŋikanikapei ŋulu araakar Asalia epukat Yudaya.