Read ngakarimojong 2 Ŋakiro a ŋirwa 27 Bible Online

2 Ŋakiro a ŋirwa 27 - ngakarimojong bible

2 Ŋakiro a ŋirwa 27

¹Arae ŋikaru a Yosam ŋatomoniarei ka ŋikan isyakini akipuka. Abu iŋes kipuka Yudaya alo Yerusalem ŋikaru ŋitomon ka ŋikanikapei. Arae ekiro a toto keŋ Yerusa nakoku a Sadok.

²Abu Yosam kitiya ŋuna etalakarito Ekapolon, lopite ŋolopei etiyator papa keŋ Usia, nai nyelomara Yosam Kai ka Akuj akicuny ekinyate lopite ŋolo etiyator papa keŋ. Tari pa kitiyat Yosam ŋun, apotu ŋituŋa torubakis itiyaete ŋuna aronok.

³Arae Yosam abu todukok epuke ŋolo alo Kuju Akai ka Akuj ka iŋes aduki neni alalan a arwatata a ŋina alowae a ŋolo enyaritae Opel alomukura a Yerusalem.

⁴Abu iŋes toduk ŋitaunio nakwap ŋina a ŋikamukumukui ŋina a Yudaya, toduk daŋ ŋaduketa ŋunajiet ka ŋuna aoyak lokamukumukui ŋulu ayakasi ŋamon.

⁵Abu Yosam kitijik erwosit a Ŋiamoni, ido abu toreu ŋasigarya a Ŋiamoni. Apotu Ŋiamoni ekaru ŋol inakis Yosam ŋitalentae ŋulu ke esilipa amiat, ŋakiloi ŋalipyo ŋaarei ka ŋamiae ŋaarei ŋuna a ŋaganoi ka ŋakiloi ŋalipyo ŋaarei ka ŋamiae ŋaarei ŋuna a ŋikinyom a ŋulu ikote erau. Apotu Ŋiamoni yaut neni a Yosam etyae ŋolopei alokaru a ŋolo a ŋiarei ka a ŋolo a ŋiuni daŋ.

⁶Abu Yosam togogoŋior nooi, anerae ewuapit iŋes ejok ŋuna etalakarito Ekapolon Akuj keŋ.

⁷Ŋiticisyo a Yosam ŋuluce daadaŋ ka ŋijiesyo ŋulu kebu iŋes toji daadaŋ ta ŋuna kiwuapit iŋes, igiritae lokitaabo ŋolo a ŋakiro a ŋirwosi a Isirael ka Yudaya.

⁸Arae ŋikaru a Yosam ŋatomoniarei ka ŋikan isyakini akipuka. Abu iŋes kipuka Yudaya alo Yerusalem ŋikaru ŋitomon ka ŋikanikapei.

⁹Abu Yosam totwana, tonukae akuwan keŋ neni anukitae atapapaa keŋ alotaun a Daudi. Kilunyokin Aas ŋolo arae lokoku keŋ lokicoloŋ keŋ kipuka Yudaya.