Read ngakarimojong 2 Ŋakiro a ŋirwa 28 Bible Online

2 Ŋakiro a ŋirwa 28 - ngakarimojong bible

2 Ŋakiro a ŋirwa 28

¹Arae ŋikaru ka Aas ŋatomoniarei isyakini akipuka Yudaya. Abu iŋes kipuka Yudaya alo Yerusalem ŋikaru ŋitomon ka ŋikanikapei. Pa etiyae iŋes ŋuna etalakarito Ekapolon lopite ŋolo etiyator Daudi ŋolo arae papaa keŋ;

²nai abu iŋes kiwuap epite ŋolo a ŋirwosi a Isirael. Abu tari kitiyau ŋitorubei ŋulu a ŋakujo a ŋuna enyaritae ata Baal;

³ya tope ŋainakineta a nakadipaalat aŋina enyaritae ŋina alokoku a Inom. Abu tari kisitor ŋidwe keŋ ŋulusapa kidiŋ akim, iwuapit ŋitalyo ŋulu aronok ŋulu a ŋituŋa a ŋakwapin a ŋuna abu Ekapolon kirita apaki ŋina adolunioto Ŋisirael nakwap ŋina aya ikes.

⁴Abu iŋes tomuro ka inanak ŋainakineta anakiboisyo a ŋunamukur ka alokamukumukui ta alokwap ŋikito ca daadaŋ ŋulu alibito. [4]

⁵Aŋakiro a ŋun, abu Ekapolon Akuj keŋ tojalak Aas neni a erwosit ka Aram, a ŋolo abu kitiji iŋes kilou ka torik ŋituŋa ka Aas ŋulu alalak nooi, ya Damasko. Abu Ekapolon kipotok Aas neni a erwosit a Isirael a ŋolo abu kitiji iŋes kilou ka toar ŋituŋa ka Aas ŋulu alalak.

⁶Alotooma apeikoloŋit bon, abu Peka lokoku a Remalia toar ŋasigarya a Yudaya ŋuna adedeŋak ŋalipyo amiat ka ŋatomoniarei, anerae kepotu ŋituŋa a Yudaya toŋero Ekapolon Akuj atapapaa kec.

⁷Kebu esigarit ŋolo alo Epuraim ŋolo anyaritae Sikiri toar lokoku ke erwosit ŋolo anyaritae Maaseia ka Asirikam ŋolo apolokinit ŋasigarya ŋuna alokai ke erwosit ta Elikana ŋolo atupit anapolou erwosit a Yudaya.

⁸Apotu Ŋisirael toriko ŋituŋa a Yudaya ŋulu erae ŋiyeneta kec pei ŋalipyo ŋamiae ŋaarei, ŋaberu, ŋidwe ŋulusapa ka ŋulupesur. Apotu daŋ toŋatasi ŋiboro ŋulu alalak nooi, kiwokosi Samaria.

⁹Nai ayai Samaria ekadwaran ŋolo ke Ekapolon ŋolo anyaritae Oded. Abu iŋes toloma kiŋa etaun akisiryam ŋasigarya ŋuna aboŋunete alojie. Tema neni kec, “Aŋuna aŋoikinitor Ekapolon ŋolo erae Akuj atapapaa kus ŋituŋa a Yudaya, abu itojalak iyes ŋituŋa a Yudaya, nai iara iyes ikes nooi ka anyunyura, ido eira Akuj ŋakiro ŋun.

¹⁰Icamito nabo tokona iyes akituruwor ŋipi kus ŋituŋa a Yudaya ka Yerusalem, ŋikilyok ka ŋaberu. Nai nyikiilit mono iyes aŋuna isecitotor aneni ke Ekapolon Akuj kus a?

¹¹Kiirasi tokona ŋakiro kaŋ! Kinyakasi ŋituŋa ŋulu irikut iyes aneni a ŋiyeneta kus, anerae adolu neni kus anyunyura ŋina ke Ekapolon.”

¹²Apotu daŋ ŋikarikok ŋice a Epuraim lu kitoŋoa ŋituŋa ŋulu aboŋunete alojie: Asaria lokoku a Yoanan, Berekia lokoku a Mesililemos ka Amasa lokoku ka Adilai,

¹³temasi neni kec, “Nyemaikina iyes iyaut ŋirikon alojie tooma ne, anerae icamito iyes bu ekaile ŋolo ka asecit neni yok aneni ke Ekapolon, kiyatakis nasecisya ka nakiilit ŋuna sek eyakare iwon aneni ke Ekapolon. Epol sek nooi ekaile aneni yok ka epol sek nooi anyunyura ke Ekapolon alo Isirael.”

¹⁴Aŋun, apotu ŋasigarya kimyekis alokiŋaren ŋikapolok ka ŋituŋa daadaŋ ŋirikon alojie ka ibore ŋini aŋatunito ikes.

¹⁵Apotu nai ŋikilyok ŋulu anyarao a ŋirorwa kec tonyout yaasi ŋirikon alojie kitanapikis ŋilowi ŋulu aŋatunitae neni a ŋirikon alojie a ŋulu alerete a daadaŋ. Apotu ikes inakis ŋirikon alojie: ŋilowi, ŋamuk ka apotu kisimuja, kitamata, kimada ŋajemei kec ka todakakis ŋulu amam agogoŋu losigirya, kinyakakis lotuŋa ŋulu ka akwap kec ŋulu ayakasi Yeriko lotaun ŋolo a ŋidukan, toboŋosi nai ikes Samaria.

¹⁶Apaki ŋin, abu erwosit Aas kiyakiya ŋituŋa neni a erwosit ka Asiriya potu ŋituŋa keŋ akiŋarakin ŋituŋa a Yudaya,

¹⁷anerae kepotu nabo Ŋiedomi toremo ka toreut ŋituŋa a Yudaya, ido torikosi.

¹⁸Kepotu daŋ Ŋipilistin tomemoto ŋitaunio a Yudaya ŋulu ayakasi Sepela ka Negeb, ido keris kikamasi ŋitaunio lu: Bes-Semes, Aijalon, Gederos, Soko ka ŋirerya keŋ, Timina ka ŋirerya keŋ ka Gimiso ka ŋirerya keŋ ka kepotu Ŋipilistin kiboikinos lotaunio ŋul.

¹⁹Aris apaki ŋin keyau Ekapolon ŋican Yudaya aŋuna a erwosit Aas a ŋolo a Yudaya, anerae kebu Aas tocamak akitiya aronis alo Yudaya, ido abu kimyek akikinyomit neni ke Ekapolon.

²⁰Aŋun, abu erwosit Tigilaspilineser ŋolo ka Asiriya kiman Aas, inak ŋatyokisyo nooi akilo akisimukekin iŋes.

²¹Abu Aas tolema ŋiboro ŋice alo Kai ke Ekapolon ka anakais a ŋirwosi ta anakais a ŋikapolok, ido inak neni a erwosit ka Asiriya ikwapei ocur, nai abu nen daŋ nyiŋarak Aas.

²²Anapaki a ŋina ayakar Aas natyokisyo, abu toŋer jik akikinyomit neni ke Ekapolon.

²³Abu inak ŋamuronisya neni a ŋakujo a Damasko a ŋuna apotu kilout iŋes, ido abu tema, “Aŋuna aponiata ŋakujo a ŋirwosi ka Aram ka Asiriya kiŋarakis ŋirwosi ka Aram, ainakini ayoŋ ikes ŋamuronisya, ikotere ekeŋarakis ayoŋ.” Nai apotu ŋakiro ŋun yaut ŋican neni ka Aas ka neni a ŋituŋa keŋ daadaŋ.

²⁴Abu Aas tocunak ŋiboro daadaŋ ŋulu ayakasi Kai ka Akuj, totubutubu, ido togolok Akai ka Akuj, todukonok ŋamuroeta Yerusalem daadaŋ.

²⁵Abu Aas todukonok lotaunio a Yudaya daadaŋ ŋakiboisyo ŋunamukur aŋuna ka ainanakinia ŋainakineta neni a ŋakujo a ŋace, ido apotu ŋakiro ŋun kitoŋoa Ekapolon Akuj atapapaa keŋ.

²⁶Ŋiticisyo nai ka Aas ŋuluce daadaŋ ka daadaŋ ŋuna ewuapit iŋes ageun aŋuna esyaunak tari ŋuna esidyok, igiritae lokitaabo ŋolo a ŋakiro a ŋirwosi a Yudaya ka Isirael.

²⁷Abu Aas totwana, tonukae akuwan keŋ neni anukitae atapapaa keŋ lotaun Yerusalem, nai aponi iŋes nyenuki neni anukeneneo ŋirwosi a Isirael. Kilunyokin Esekia ŋolo arae lokoku keŋ lokicoloŋ keŋ kipuka Yudaya.