Read ngakarimojong 2 Ŋakiro a ŋirwa 29 Bible Online

2 Ŋakiro a ŋirwa 29 - ngakarimojong bible

2 Ŋakiro a ŋirwa 29

¹Esyakini Esekia akipuka Yudaya erae ŋikaru keŋ ŋatomoniarei ka ŋikan. Kipuka iŋes Yudaya alo Yerusalem ŋikaru ŋatomoniarei ka ŋikanikaomwon. Arae ekiro a toto keŋ Abi nakoku a Sakariya.

²Etiyae iŋes ŋuna etalakarito Ekapolon, lopite jik ŋolo etiyaa papaa keŋ Daudi.

³Alokaru a ŋolo esyakinia Esekia akipuka Yudaya, elap ŋolo ke epei, abu Esekia toŋaa ŋipukei ŋulu ka Akai ke Ekapolon, ido tosubanak neni amunaara alopukei.

⁴Yau ŋisacaradotin ka ŋilepi, tocunak ikes nalapatu ŋina alo Kide Akai ke Ekapolon.

⁵Tema neni kec, “Kiirasi ŋilepi ŋakiro kaŋ! Kitaleunos ka kitaleutu Akai ke Ekapolon Akuj atapapaa kus, ido tolemasi ŋiboro daadaŋ ŋulu itoroniaritae anakibois a ŋina asegan.

⁶Apotu atapapaa yok toruworos ŋulu pa ekinyomito Akuj yok, apotu kitiyata ŋuna pa etalakarito iŋes, ido apotu toŋero iŋes, nyemitakis akibois ŋina iboiyo Ekapolon.

⁷Apotu daŋ ikes togolo ŋipukei ŋulu ayakasi lobarasan ŋolo ka Akai ka Akuj, kiritosi ŋitaae kiŋa. Apotu nyicunya ekinyate, kori nyeinakis neni ka Akuj a Isirael ainakinet adio ŋina epeyo anakibois a ŋina asegan.

⁸Aŋakiro a ŋun, abu Akuj toŋoik ŋituŋa a Yudaya ka Yerusalem, eturuwo ikes ŋulu ekuryaka nooi, ŋulu ikiinakinete asuro, aumokin ka ajamuwaro lopite ŋolo iteoto iyes ikes tokona.

⁹Ŋakiro ŋun ikes aponere toarere atapapa yok ka ikes aponere torikorere ŋidwe yok ŋulusapa, ŋulupesur ka ŋaberu yok.

¹⁰Acamit tokona ayoŋ acamun ke Ekapolon Akuj a Isirael, ikotere nyebu neni yok anyunyura keŋ ŋina aryenyaanan.

¹¹Ŋidwe kaŋ ŋulusapa, nyiruworosi ŋulu ijamaaka tokona, anerae ikiseu iyes Ekapolon aruwor ŋulu iwuasi alokiŋaren keŋ, ido kitiyanakis iŋes, kiŋarenikis ŋituŋa anakilip ka kicunya ekinyate.”

¹²Apotu nai ŋilepi lu kitemokinos akisyakin etic: Anateker a Ŋikoasi Maas lokoku ka Amasai ka Yoiel lokoku ka Asaria; anateker a Ŋimerari Kis lokoku ka Asaria ka Abidi lokoku a Yealelel; anateker a Ŋigerisoni Yoa lokoku a Sima ka Eden lokoku a Yoa;

¹³aloletok ka Elisapan Simiri ka Yeiel; aloletok ka Asap Sakariya ka Matania;

¹⁴aloletok a Eman Yeiel ka Simei; aloletok a Yedusan Semaia ka Usiel.

¹⁵Apotu ŋikilyok ŋul tocunakis ŋilepi ŋuluce, ido kitaleunos ka kitaleut daŋ Akai ka Akuj lopite ŋolo ecikitor erwosit ikes anakirot a ŋina a Ekapolon.

¹⁶Apotu ŋisacaradotin tolomasi nakibois ŋina asegan alo Kai ka Akuj kitaleut iŋes. Yaut ikes kiŋa alo Kai ka Akuj ŋiboro daadaŋ ŋulu pa etaleunitoe, kiwuakis nalapatu ŋina ka Akai ka Akuj, tolemasi ŋilepi ŋiboro ŋul a nen kiwokosi nayonae Kidiron.

¹⁷Esyakinete ikes akitaleunun erae ŋirwa ke elap epei elap ŋolo ke epei, ani edoli ŋirwa ke elap ŋikanikauni, tolomasi ikes lobarasan ŋolo ka Akai ke Ekapolon; todaun ŋirwa ŋice ŋikanikauni italeete ikes Akai ke Ekapolon bon, kirikakis edoli ŋirwa ke elap ŋitomon ka ŋikanikapei elap ŋolo ke epei.

¹⁸Tolomasi nai tooma neni ayai erwosit Esekia temasi, “Adaun isua akitaleun Akai ke Ekapolon daadaŋ, Namuroet ŋina epeyere ŋainakineta ka ŋiboro keŋ daadaŋ, emesa ŋolo iwuanakinio ŋamugati ka ŋiboro keŋ daadaŋ.

¹⁹Ŋiboro daadaŋ ŋulu abu erwosit Aas tolema alo Kai ka Akuj alorwa a ŋulu araakar iŋes erwosit, apaki ŋina abunio akikinyomit neni ka Akuj todaun, adaun isua akinyakakin ka akitaleun; eyakasi tokona ŋiboro ŋul kiŋaren Namuroet ŋina ke Ekapolon.”

²⁰Abu nai erwosit Esekia akoloŋit ŋina atupakini ŋin tonyou taparacu sek, tocunak ŋikapolok ŋulu a etaun, kitipeiyosi kaapei Kai ke Ekapolon.

²¹Apotu ikes yaasi Kai ka Akuj ka anakwap a Yudaya ŋimoŋin ŋikanikaarei, ŋimesekin ŋikanikaarei, ŋikaalei ŋulumesekin ŋikanikaarei ka ŋikorwa ŋikanikaarei ikwapei ŋainakineta ŋuna elemarere asecit anapukan. Abu erwosit kicik ŋisacaradotin ŋulu arae ŋiletok ka Aron akiya ŋainakineta ŋun Namuroet ŋina ke Ekapolon.

²²Apotu ŋisacaradotin toara ŋimoŋin, yaasi ŋaokot a ŋimoŋin kipakakis kidiama Namuroet; ekaku toara ŋimeesekin, kipakakis ŋaokot Namuroet, toara nai ŋikaalei ŋulumesekin kipakakis ŋaokot Namuroet.

²³Ani eruwor ŋikorwa ŋulu ayaunitae erae ainakinet ŋinalemaret asecit, apotu ŋisacaradotin yaut kiŋaren erwosit ka ŋituŋa, ido apotu ŋituŋa ka erwosit kidokokis ŋakan kec kidiama ŋikorwa ŋul.

²⁴Ekaku ŋun, apotu ŋisacaradotin toara ŋikorwa, yaasi ŋaokot a ŋikorwa kidiama Namuroet erae ainakinet ŋinalemaret asecit tomookunere Ŋisirael daadaŋ, anerae keris sek erwosit kelimu atemar tolemunae aŋuna a Ŋisirael a daadaŋ ŋainakineta ŋuna epeyo ka ŋainakineta ŋuna elemarere asecit.

²⁵Abu erwosit Esekia kiwuak ŋilepi Kai ke Ekapolon eyakatar ŋitworoi, ŋaduŋgui ka ŋagitae lopite ŋolo alimunitotor Daudi ka Gad ŋolo arae eketeyenikinan ŋolo ke erwosit ta Nasan ekadwaran, anerae abunit akiciket ŋin aneni ke Ekapolon, alotooma erwor a ŋikadwarak.

²⁶Apotu nai ŋilepi towua etenito eyakatar ŋiboro ŋulu ekote ŋulu sek esitiyae Daudi, ido ayakatar ŋisacaradotin ŋarupepe.

²⁷Tolimu nai erwosit Esekia atemar yaarae ainakinet ŋina epeyo kidiama Namuroet, ani isyakinio akipe ainakinet, kisyakis ŋituŋa aeo neni ke Ekapolon ekusete ka toramete ŋiboro ŋulu ekote ŋulu sek esitiyae Daudi erwosit a Isirael.

²⁸Apotu ŋituŋa daadaŋ kilipa, toeo ŋikaeok ka tokuta ŋikakutak ŋarupepe, kitiyata ŋituŋa ŋakiro ŋun daadaŋ jik akitodol ŋina anyamuwarya akim ainakinet.

²⁹Ani enyamuwari akim ainakinet, apotu erwosit ka ŋituŋa daadaŋ ŋulu arukitotor, kijuuroto kilipa.

³⁰Tolimokis erwosit Esekia ka ŋikapolok ŋilepi kipuro Ekapolon a ŋikirukisyo a Daudi ka a ŋulu ka Asap a eketeyenikinan. Toeo ŋilepi ka alelyanu, ido toryediko, kijuuroto kilipa.

³¹Tema nai Esekia, “Idaut tokona iyes akitaleun ŋawat kus aneni ke Ekapolon; toapuutu nai ne, yautu ŋamuronisya ka ŋainakineta ŋuna ka alakara Kai ke Ekapolon.” Yaut nai ŋituŋa ŋamuronisya kec ka ŋainakineta ŋuna ka alakara, ido apotu ŋituŋa daadaŋ ŋulu acamunito alotai kec yaut ŋainakineta ŋuna epeyo.

³²Arae ekimar a ŋainakineta a ŋuna epeyo a ŋuna apotu ŋituŋa yaut ŋimoŋin ŋatomonikanikaarei, ŋimeesekin amiat ka ŋikalei ŋulumesekin ŋamiae ŋaarei; arae ŋul daadaŋ ŋainakineta ŋuna epeyo aŋuna ke Ekapolon.

³³Abu ekimar a ŋainakineta a ŋuna etaleunitoe erae ŋamuronisya todol ŋimoŋin ŋamiae ŋakanikapei ka ŋamesekin ŋalipyo ŋauni.

³⁴Nai akudyoko nooi ŋisacaradotin, pa apedorito ikes akiyeŋ ŋainakineta ŋuna epeyo, aŋun, ikwapei ariŋaakar nyitaleuno ŋisacaradotin ŋice, apotu ŋiyeneta kec ŋilepi kiŋarakis ikes akitodol ŋina adaunor etic. Etiyaete ŋilepi ŋun, anerae ewuapito ikes ŋitalyo ŋulu ka akitaleununo akilo ŋisacaradotin.

³⁵Alalak nooi ŋainakineta ŋuna epeyo, ayakasi daŋ nen ŋasepwa a ŋainakineta a ŋuna ke ekisil ka ŋimaten ŋulu emoriyaritae kaapei ka ŋainakineta ŋuna epeyo. Ani irikakin ŋun, aponi toboŋokinoe nabo akilip alo Kai ke Ekapolon.

³⁶Apotu nai Esekia ka ŋituŋa daadaŋ tolelyana a ŋakiro a ŋuna abu Akuj kitiya aŋuna a ŋituŋa keŋ, anerae aponi kitiyae etal ŋol anapaki a ŋina auruwuana.