Read ngakarimojong 2 Ŋakiro a ŋirwa 30 Bible Online

2 Ŋakiro a ŋirwa 30 - ngakarimojong bible

2 Ŋakiro a ŋirwa 30

¹Abu Esekia kiyakiya ŋituŋa Isirael ka Yudaya, kigir daŋ ŋabaruwae neni a ŋituŋa a Epuraim ka Manase, anyaraun ikes potu Kai ke Ekapolon Yerusalem kinumunuma ŋasuban ŋuna a Paska aŋuna ke Ekapolon Akuj a Ŋisirael.

²Arae ŋun aŋuna keponiata erwosit ka ŋikapolok ta ŋituŋa daadaŋ alo Yerusalem tocamut akinumunum ŋasuban ŋuna a Paska elap ŋolo a ŋiarei,

³(anerae pa apedorito ikes akinumunum apaki ŋina sek amaikina kinumunumere, anerae akudyoko ŋisacaradotin ŋulu kitaleuno ka amam ŋituŋa apotu tocunakin Yerusalem).

⁴Abu ayeunet ŋin totakan erae ŋina eyookino aneni ke erwosit ka alotuŋa a daadaŋ.

⁵Apotu ikes totubut atemar kiserakinae ŋakiro ŋun neni a Ŋisirael daadaŋ ŋinapei alo Beeriseba tari Dan, tonyaraunae ŋituŋa potu Yerusalem kinumunuma ŋasuban ŋuna a Paska aŋuna ke Ekapolon Akuj a Ŋisirael, anerae alopite a ŋolo egiritere ŋakiro a ŋasuban a ŋun, kekudyoko ŋituŋa ŋulu aponeneete akinumunum ŋasuban ŋun.

⁶Analimunet ke erwosit ka ŋikapolok, apotu ŋituŋa ŋulu eyakitae toloto Isirael daadaŋ ka Yudaya daadaŋ, yaasi ŋabaruwae ŋuna egiritae ŋakiro nu, “Okoe Ŋisirael, toboŋutu neni ke Ekapolon Akuj ka Aburaam, a Isaka ka Isirael, ikotere Akuj ebuni neni kus a ŋulu idoŋito, a ŋulu ipotu toiunos anapedor a ŋirwosi a ŋulu ka Asiriya.

⁷Nyikwaanikinosi ka atapapaa kus ka ŋiyeneta kus ŋulu apotu tojoŋoto akikinyomit neni ke Ekapolon Akuj atapapaa kec, ido abu Akuj kituruwo ikes ŋulu ikiinakinete aumokin lopite ŋolo iteoto iyes tokona.

⁸Nyitogogoŋo tokona ŋakyes kus lopite ŋolo etogogoŋitotor atapapaa kus, nai inakinos neni ke Ekapolon, potu nakibois keŋ ŋina asegan, ŋina adau iŋes akitaleun ŋikaru ka ŋikaru, ido kitiyanakis Ekapolon Akuj kus, ikotere elemari iŋes aŋoit keŋ ŋina aryenyaanan aneni kus.

⁹Ani kiboŋut iyes neni ke Ekapolon, epedorete nai ŋulu erikorito ŋikaitotoi ka ŋidwe kus akisyon ikes kitoboŋut nakwap na, anerae ejok ka isyoniono Ekapolon Akuj kus, nyikimyekini iŋes iyes erae kiboŋut iyes neni keŋ”

¹⁰Aŋun, apotu ŋituŋa ŋulu eyakitae akiya ŋabaruwae toloto ageun alotaun ke epei tari ŋoloce anakwap a ŋina a ekabila a Epuraim ka a ŋina a ekabila a Manase, todolo tari lokabila a Sebulun; nai apotu ŋituŋa a ŋakiboisyo a ŋun tokyanatar ka tojamuwasi ŋakiro kec.

¹¹Tari ŋina aponiata ikes kitiyata ŋun, apotu ŋituŋa ŋidikudyo ŋulu a ekabila ka Aser, a Manase ka Sebulon kitiditeunos make, toloto Yerusalem.

¹²Alo Yudaya daŋ, abu Akuj inak ŋituŋa acamun ke epeitau anakimorikina akitiya ŋuna alimunito erwosit ka ŋikapolok anakirot a ŋina ke Ekapolon.

¹³Apotu ŋituŋa ŋulu alalak tocununos Yerusalem elap ŋolo a ŋiarei akinumunum ŋasuban ŋuna a ŋamugati a ŋuna emam ŋakinyalet.

¹⁴Apotu ikes kisyakis etic, tolemasi ŋamuroeta ŋuna ayakasi Yerusalem, kielasi ŋamuroeta daadaŋ ŋuna ecunyere ekinyate, kimasakis nayonae Kidiron.

¹⁵Ani edoli ŋirwa ke elap ŋitomon ka ŋiomwon, elap ŋolo a ŋiarei, toara ikes ikale ŋini a Paska. Kiruma ŋileec ŋisacaradotin ka ŋilepi, aŋun, apotu kitaleun ka yaut Kai ke Ekapolon ŋainakineta ŋuna epeyo.

¹⁶Tosodo nai kibaka lopite ŋolo elimunitere alotooma Ŋikisila a Moses a ŋolo arae ituŋanan ŋini ka Akuj. Inakis nai ŋilepi ŋisacaradotin ŋaokot a ŋamuronisya, towuatakis ŋisacaradotin Namuroet.

¹⁷Aŋuna akudyokyoto alotuŋa a ŋulu acunakina ŋituŋa ŋulu etaleuno, apotu ŋilepi toara ŋikaalei ŋulu a Paska aŋuna a ŋituŋa a ŋulu pa etaleuno, ido inakis neni ke Ekapolon.

¹⁸Tari daŋ ŋina alalaata ŋituŋa ŋulu aponito alokabila a Epuraim, a Manase, a Isakar ka Sebulon ŋulu pa etaleuno, ido apotu tonyama akiriŋ a ŋikaalei a Paska, nyiwuapa ŋuna egiritae, abu Esekia kilip aŋuna kec tema, “Elipi ayoŋ Ekapolon ŋolo ejok kisyoni ikes daadaŋ,

¹⁹ŋulu einakinosi alotai kec akiwarit ŋuna ka Akuj Ekapolon a ŋina erae Akuj atapapaa kec, tari daŋ pa kitaleuno ikes lopite ŋolo elimunitotor ŋikisila ŋulu ka akibois a ŋina asegan.”

²⁰Abu nai Ekapolon kiira ŋakiro ke Esekia, kisyoni ŋituŋa.

²¹Apotu nai Ŋisirael ŋulu acunakina Yerusalem torubakis ŋirwa ŋikanikaarei itiyaete ŋasuban ŋuna a ŋamugati a ŋuna emam ŋakinyalet, tolelyana nooi, ido aeosi a ŋinakoloŋit ŋilepi ka ŋisacaradotin isitiyaete ŋiboro ŋulu eore neni ke Ekapolon.

²²Kirwor Esekia neni a ŋilepi a daadaŋ ŋakiro ŋuna esimukekinak nooi, anerae etoodiunito ŋilepi ayenut kec nooi etic ŋolo ke Ekapolon. Apotu ŋilepi kimuja ŋirwa ŋikanikaarei ŋinerin a ŋibaren ŋulu ainakinitae ikes, inanakis ŋainakineta ŋuna ke ekisil ka kipuro Ekapolon Akuj atapapaa kec eosi.

²³Apotu nai ŋituŋa daadaŋ tocamut akitiya ŋirwa ŋice ŋikanikaarei ŋasuban ŋun, aŋun, apotu torubakis itiyaete ka alelyanu ŋirwa ŋikanikaarei.

²⁴Apotu ŋirwa ŋul kitiyakin, anerae abu erwosit Esekia ŋolo a Yudaya inak ŋituŋa ŋimoŋin aliput ka ŋamesekin ŋalipyo ŋakanikaarei aŋuna a ŋainakineta, apotu ŋikapolok daŋ inakis ŋituŋa ŋimoŋin aliput ka ŋimesekin ŋalipyo ŋatomon. Apotu ŋisacaradotin ŋulu alalak nooi kitaleunos.

²⁵Apotu ŋituŋa a Yudaya daadaŋ: Ŋisacaradotin, ŋilepi, kaapei ka ŋituŋa daadaŋ ŋulu aponito alo Isirael ka ŋituŋa ŋulugelaanotin ŋulu aponito alo Isirael ta ŋulugelaanotin ŋulu eboiyete alo Yudaya tolelyana.

²⁶Abu alelyanu ŋina apolon nooi toyakaun Yerusalem, anerae ŋinapei alorwa a Solomon alokoku a Daudi a ŋolo arae erwosit a Ŋisirael, mam alelyanu abu toyakaun Yerusalem ŋina ekoni ŋin.

²⁷Ekaku nai, apotu ŋisacaradotin ka ŋilepi tonyout, kiterereŋo ŋituŋa, kiira Akuj ŋitoilon kec; todol akilip kec neni ka Akuj nakibois keŋ ŋina iboiyo iŋes.