Read ngakarimojong 2 Ŋakiro a ŋirwa 31 Bible Online

2 Ŋakiro a ŋirwa 31 - ngakarimojong bible

2 Ŋakiro a ŋirwa 31

¹Ani irikakin ŋakiro ŋun daadaŋ, apotu Ŋisirael daadaŋ ŋulu ayakasi nen toloto lotaunio a Yudaya, toukonosi ŋamoru ŋuna asipitoe erae ŋitorubei a ŋakujo, totubutubokis kwap ŋitorubei a ŋakujo a ŋuna anyaritae Asera, tomunaasi ŋamuroeta ka ŋakiboisyo ŋuna aya nenimukur ŋuna elipere neni a ŋakujo alo Yudaya daadaŋ, alo Benjamin ka alo Epuraim ta alo Manase. Ani kedaut amunaar daadaŋ, toboŋosi ŋituŋa a Isirael lotaunio ka nakwapin kec.

²Abu nai Esekia kiwuanak ŋatukon a ŋisacaradotin ka ŋilepi, inak ŋinatukot ŋiticisyo ŋulu amaikina kitiya. Ŋiticisyo ŋul ikes aayenen ŋainakineta ŋuna epeyo, ŋainakineta ŋuna ke ekisil, akisilip alo Kai ka Akuj, aeo ka alakanar neni ka Akuj anakiboisyo a ŋuna egelegelya alo Kai ka Akuj.

³Abu erwosit tolemu alobaren keŋ ke elope ŋimoŋin ka ŋimesekin erae ŋainakineta ŋuna epeyo taparacu ka eboŋ, ŋapakio ŋuna a Sabato ka ŋuna elomunia elap ŋolokitete ta ŋapakio ŋace daadaŋ aŋuna a ŋasuban a ŋuna amaikina kitiyae ikwapei igiritere tooma ŋikisila ŋulu ke Ekapolon.

⁴Tolimok erwosit ŋituŋa ŋulu eboiyete alo Yerusalem alemun ŋainakineta ŋuna emaikina inakinae ŋisacaradotin ka ŋilepi, ikotere ikes itiyaete apaki daadaŋ etic ŋolo ke Ekapolon lopite ŋolo elimunitere alotooma ŋikisila ŋulu ke Ekapolon.

⁵Ŋinapei adolioto ŋakiro ke erwosit lotuŋa, apotu Ŋisirael tolemut ŋainakineta ŋuna alalak nooi, ŋuna a ŋikinyom a ŋulu alemunete ikes ekiŋaren, epiini, akimyet, ao, ka ŋamuja ŋace daadaŋ ŋuna a ŋimanikorin kec; yaut ikes ŋainakineta ŋuna alalak nooi, yaut atutubet apei alotooma ŋitomon a ŋinibore.

⁶Apotu daŋ ŋituŋa a Isirael ka ŋulu a Yudaya ŋulu eboiyete alotaunio a Yudaya yaut atutubet apei alotooma ŋatomon anaatuk kec ka anamesekin kec, yaut daŋ ŋainakineta ŋace ŋuna alalak nooi ŋuna apotu ikes inakis neni ke Ekapolon Akuj kec, totukonokis nen a ŋatukon.

⁷Esyakinete ikes akituk ŋainakineta ŋun elap ŋolo a ŋiuni, kirikakis elap ŋolo a ŋikanikaarei.

⁸Ani epote Esekia ka ŋikapolok akiŋolikin ŋatukon ŋun, apotu kipuro Ekapolon ka kiterereŋo ŋituŋa a Ekapolon Ŋisirael.

⁹Abu nai erwosit kiŋit ŋisacaradotin ka ŋilepi ŋakiro a ŋainakineta a ŋuna atukonoritae a ŋun;

¹⁰ido abu Asaria lapapait a Sadok, esacaradoti ŋolo Apolon nooi tema neni a erwosit, “Ŋinapei esyakiniata ŋituŋa ayaunun ŋainakineta Kai ke Ekapolon, imujio isua akimuj ŋina ikitemokino ka eŋadaar ŋina alalan nooi. Eŋadaar isua akimuj ŋina alalan nooi, anerae abu Ekapolon kiterereŋ ŋituŋa keŋ.”

¹¹Tolimu nai Esekia atemar kitemokinoe alo Kai ka Akuj ŋagulei ŋuna iŋadao akimuj, ido aponi kitemokinoe.

¹²Aponi nai anakiwuapit ŋakiro a erwosit, yaunae nen ŋainakineta, ŋatutubeta ŋuna alemyo alotooma ŋitomon a ŋinibore ka ŋainakineta ŋace ŋuna apotu ikes inakis neni ke Ekapolon; aponi toseunae Elepait ŋolo anyaritae Canania apolokin ŋainakineta ŋun ka lokaato keŋ Simei akiwuap iŋes alotic a ŋol.

¹³Aponi daŋ toseunae ŋilepi ŋitomon akiŋarakin Canania ka Simei alotic a ŋol. ŋilepi ŋul ikes lu: Yeiel, Asasia, Naas, Asael, Yerimos, Yosabad, Eliel, Isimakia, Maas ka Benaia.

¹⁴Aponi Kore lokoku a Imina a Elepait a ŋolo ete epuke ka Akai ka Akuj ŋolo enyaritae epuke ŋolo alo Kide kiwuakinae akijaunun ŋainakineta ŋuna eyaunite ŋituŋa anacamit kec neni ke Ekapolon ka akoranar ŋainakineta ŋun ta ŋuna etaletoi.

¹⁵Alotaunio a ŋice a ŋulu ayakasi ŋisacaradotin, apotu ŋilepi lu: Eden, Miniamin, Yesua, Semaia, Amaria ka Sekania kiŋarakis Kore akikor akimuj. Apotu ikes tokora akimuj eriyan neni a ŋisacaradotin ka ŋilepi iwuapito epite ŋolo ayakatar ŋatukon kec ka neni a ŋulu amojoŋito ta neni a ŋisorok.

¹⁶Apotu daŋ ikes tokora akimuj neni a ŋisapa a ŋulu arae ŋikaru kec ŋiuni ka ŋice, pa iwuapitae ŋirorwa atapapaa kec ka neni a daadaŋ a ŋulu alomanarete Kai ka Akuj akitiya ŋiticisyo kec ŋulu egelegelya a ŋinakoloŋit ikwapei amaikina ŋinatukot akitiyaa.

¹⁷Apotu ikes kigira ŋisacaradotin iwuapitae ŋirorwa a ŋikalya atapapaa kec kigira ŋilepi ŋulu arae ŋikaru kec ŋatomoniarei ka ŋice daŋ, iwuapitae epite ŋolo ayakatar ŋiticisyo kec ka ŋatukon kec.

¹⁸Egiritae ŋisacaradotin ka ŋidwe kec ŋulucicik daadaŋ, ŋaberu kec daadaŋ, ŋidwe kec ŋulusapa ka ŋulupesur daadaŋ, iŋes atemar ŋituŋa a ŋinituŋanan daadaŋ; anerae emukekinito ikes akitaleunun ŋawat kec.

¹⁹Ani eruwor ŋisacaradotin ŋulu eboiyete alotaunio a ŋulu ayakasi ŋiletok ka Aron, kori ŋulu eboiyete anadakarisinei a ŋitaunio a ŋul, ewuanakinitae ŋikilyok ŋulu ekinyoma akikor akimuj lokilyok daadaŋ ŋulu arae ŋisacaradotin ka neni a ŋilepi daadaŋ a ŋulu egiritae ŋirorwa kec.

²⁰Abu Esekia kitiya ŋakiro ŋun alo Yudaya daadaŋ, abu iŋes kitiya ŋuna ajokak ka ŋuna eyookino ka ewuapit Ekapolon Akuj keŋ.

²¹Etic daadaŋ ŋolo abu iŋes kitiya aŋuna ka Akai ka Akuj ka anakiwuapit ŋikisila ta Ŋakiciketa, abu iŋes kitiya a etau keŋ a daadaŋ anakitopoloorit ka anainakina neni ka Akuj keŋ. Aŋun, abu apukan keŋ tolot kiŋaren ejok.