Read ngakarimojong 2 Ŋakiro a ŋirwa 35 Bible Online

2 Ŋakiro a ŋirwa 35 - ngakarimojong bible

2 Ŋakiro a ŋirwa 35

¹Abu Yosia kitiya ŋasuban ŋuna a Paska aŋuna ke Ekapolon alo Yerusalem. Apotu ŋituŋa a Yosia toara ŋibaren ŋulu a ŋasuban a Paska erae ŋirwa ke elap ŋitomon ka ŋiomwon elap ŋolo ke epei.

²Abu Yosia kiwuanak ŋisacaradotin loticisyo kec, ido kisimukek ikes akitiya etic ŋolo ka Akai ke Ekapolon.

³Tolimok ŋilepi ŋulu etatamete Ŋisirael daadaŋ ka ŋulu aris kitaleun neni ke Ekapolon ebe, “Kiwuakisi Asaduku ŋina asegan ŋina ka Acamunet Kai ka Akuj ŋina abu Solomon lokoku a Daudi ŋolo arae erwosit toduk; nyemaikina iyes torubakis iryoŋito iŋes. Kitiyanakisi tokona Ekapolon Akuj kus ka ŋituŋa keŋ Ŋisirael.

⁴Kitemonokinos tokona a ŋatekerin kus ka a ŋatutubeta kus lopite ŋolo ikilimokinitere anakiro a ŋuna igirit Daudi erwosit ŋolo a Ŋisirael ka ŋuna igirit Solomon lokoku keŋ.

⁵Toloto towua alo Kai ka Akuj a ŋatekerin a ŋituŋa kus, ido emaikina ŋilepi eyakasi natukot a ŋulutuŋa.

⁶Toara ŋikaalei ŋulu a ŋasuban a Paska, kitaleutu ŋawat kus ka kitemonokisi ŋibaren aŋuna a ŋituŋa ka akwap kus, kitiyata ŋun lopite ŋolo elimunitor Ekapolon aneni a Moses.”

⁷Abu nai Yosia tolemu ŋainakineta ŋuna a Paska aŋuna a ŋituŋa a ŋuluce a daadaŋ a ŋulu aya nen, tolemu ŋikaalei ŋulumesekin ka ŋulumee ŋalipyo ŋatomoniuni, tolemu ŋimoŋin ŋalipyo ŋauni; alemunio ŋibaren ŋul daadaŋ alobaren a Yosia.

⁸Apotu ŋikapolok ŋulu epukatotor Yosia daŋ tolemut a acamit kec ŋainakineta aŋuna a ŋituŋa ka aŋuna a ŋisacaradotin ta aŋuna a ŋilepi. Apotu Ilika ka Sakariya ta Yeiel, ŋulu apolokinito ŋiticisyo ŋulu ka Akai ka Akuj tolemut aŋuna a ŋisacaradotin ŋainakineta kec ŋuna a Paska ŋikaalei ŋulumesekin ka ŋulumee ŋalipyo ŋaarei ka ŋamiae ŋakanikapei ta ŋimoŋin ŋamiae ŋauni.

⁹Apotu daŋ ŋikarikok a ŋilepi Konania ka ŋikaitotoi keŋ lu: Semaia, Nesanel, Asabia ka Yeiel ta Yosabad tolemut aŋuna a ŋilepi ŋainakineta kec ŋuna a Paska, ŋikaalei ŋulumesekin ka ŋulumee ŋalipyo ŋakan ka ŋimoŋin ŋamiae ŋakan.

¹⁰Ani kirikakin akitemonokin ibore daadaŋ, apotu ŋisacaradotin towua anakiboisyo kec, towua ŋilepi daŋ a ŋatukon kec, lopite ŋolo alimunitor erwosit.

¹¹Toarae nai ŋikaalei ŋulu a Paska, towuatanakis ŋisacaradotin Namuroet ŋaokot ŋuna ainakinio ikes, ido toyeŋa ŋilepi ŋibaren ŋul.

¹²Apotu ikes tosetasi nawae ŋainakineta ŋuna epeyo aŋuna ka ainakin neni a ŋatuketa a ŋatekerin, ikotere ŋun eayete neni ke Ekapolon, ikwapei igiritere lokitaabo ŋolo a ŋikisila a Moses. Apotu ikes kitiyata ikwaŋinapei neni a ŋimoŋin a ŋulu ayaunitae erae ŋainakineta.

¹³Topeo ŋilepi ŋibaren ŋulu a Paska ŋul, iwuapito ŋikisila, ido kipoto a ŋamoti, a ŋidaramwa ka a ŋasipiryae ŋainakineta ke etal, tokorakis nai atipei akiriŋ lotuŋa.

¹⁴Kedaut ŋilepi etic ŋol daadaŋ, apotu kitemonokis akiriŋ aŋuna kec ka aŋuna a ŋisacaradotin a ŋiletok ka Aron, anerae atiŋiyara ŋisacaradotin alotic akitodol ŋina awaria akwap, apeyete ikes ŋainakineta ŋuna epeyo ka apeyete ŋasepwa ŋuna amaikina topeoi.

¹⁵Apaki ŋin, ayakasi ŋikaeok ŋulu anateker ka Asap kaapei ka ŋilepi ŋuluce nakiboisyo ŋuna amaikina ikes eyakasi, lopite ŋolo alimunitor Daudi. Ŋilepi ŋulu arae ŋikaeok ikes Asap ka Eman ta Yedusun eketeyenikinan ŋolo a erwosit. Ayakasi daŋ ŋiketeok ŋipukei a Akai ka Akuj lopukei ŋulu ewuakinitae ikes. Apotu ŋul daadaŋ torubakis eyakasi nen, anerae etemonokinete ŋilepi ŋuluce ŋasuban a Paska aŋuna kec.

¹⁶Aŋun, aponi ibore daadaŋ kitiyae akoloŋit ŋin aŋuna ka kilip neni a Ekapolon, ikotere erubakinio itiyaeneneo ŋasuban ŋuna a Paska ka eayeneneo ŋainakineta ŋuna epeyo Namuroet ŋina ke Ekapolon lopite ŋolo alimunitor erwosit Yosia.

¹⁷Apotu Ŋisirael ŋulu ayakasi nen kitiyata ŋasuban ŋuna a Paska apaki ŋin ka ŋasuban ŋuna a ŋamugati a ŋuna emam ŋakinyalet, kitiyata ikes ŋasuban ŋuna a ŋamugati a ŋuna emam ŋakinyalet todol ŋirwa ŋikanikaarei itiyaete.

¹⁸Mam ŋasuban a Paska ŋuna ekwaan ka ŋun ŋuna keponi kitiyae alo Isirael mati ŋuna a ŋirwa a ŋulu a Samuel a ekadwaran; mam epei daŋ alorwosi a Ŋisirael ŋolo kebu kitiya ŋasuban ŋuna a Paska, lopite ŋolo abunio Yosia kitiyaata ka ŋisacaradotin, ŋilepi ka ŋituŋa a Yudaya ka ŋulu a Isirael ta ŋulu eboiyete alo Yerusalem.

¹⁹Etiyao ŋasuban ŋun edolete ŋikaru ŋulu epukator Yosia Yudaya ŋitomon ka ŋikanikauni.

²⁰Kedau erwosit Yosia akitiya ŋakiro ŋun daadaŋ aŋuna ka Akai ka Akuj, abu Neko erwosit a Ijipit tolot akitijiore ŋituŋa a Yosia aneni anyaritae Karikemis alodiyete aŋolol Eupurate. Abu Yosia tolot lojie ŋol.

²¹Nai kebu Neko kiyakiya ŋituŋa neni a Yosia tema, “Alibura eyai kidiŋ iyoŋ ka ayoŋ erwosit a Yudaya? Nyabunit ayoŋ neni kon nakoloŋit na, nai abunit ayoŋ akitijiore ŋituŋa ŋulu erae ŋimoe kaŋ; akalimoki Akuj ayoŋ akitiya ŋun atipei. Toesik akitepeg Akuj ŋina ikirukit ka ayoŋ, ikotere nyikimunya iyes.”

²²Nai abu Yosia toŋer akimyekin Neko, kitusubun meere erwosit aŋuna ka akitijikin Neko, toŋer akiirar ŋakiro ŋuna erworo Akuj aneni a Neko. Abu tolot kitijikis Neko anakadipaalat a ŋina a Megido.

²³Toguma Ŋijipitian Yosia a ekaleŋeleŋet, tolimok Yosia ŋikapolok a ŋasigarya keŋ tema, “Yaarae ayoŋ a ne, akawani ayoŋ nooi.”

²⁴Aŋun, apotu ŋasigarya keŋ todakasi iŋes anagaari keŋ a ŋina sek ayai, kiwuakis nagaari keŋ ace yaut Yerusalem neni abu totwanik. Aponi tonukae iŋes neni anukitae atapapaa keŋ. Apotu ŋituŋa a Yudaya ka ŋulu a Yerusalem daadaŋ kigworo aŋuna a Yosia.

²⁵Abu Yeremia toe ŋieosyo ŋulu kigworet aŋuna a Yosia ka akitodol akoloŋit na, eosi ŋikilyok ka ŋaberu ŋulu eyenete aeo ŋieosyo ŋul etamunito Yosia, apotu kituruwosi ŋun etal alo Isirael ka igiritae lokitaabo ŋolo a ŋieosyo a ŋulu ka akiwolol.

²⁶Ŋiticisyo a Yosia ŋuluce daadaŋ, ŋakiro ŋuna ka anupit keŋ nooi neni a Ekapolon, akiwuapit keŋ nooi ŋikisila a Ekapolon ŋulu egiritae lokitaabo

²⁷ka ŋiticisyo keŋ daadaŋ ŋulu esyaunak ka ŋulu esidyok, igiritae lokitaabo ŋolo a ŋakiro a ŋirwosi a Isirael ka Yudaya.