Read ngakarimojong 2 Ŋakiro a ŋirwa 36 Bible Online

2 Ŋakiro a ŋirwa 36 - ngakarimojong bible

2 Ŋakiro a ŋirwa 36

¹Apotu nai ŋituŋa a Yudaya yaut Yeoas lokoku a Yosia kituruwosi erwosit, kilunyokin lokicoloŋ a papa keŋ alo Yerusalem.

²Arae ŋikaru a Yeoas ŋatomoniarei ka ŋiuni apaki ŋina esyakinia akipuka Yudaya; kipuka iŋes Yudaya alo Yerusalem ŋilapyo ŋiuni.

³Abu Neko erwosit a Ijipit toen Yeoas, ya iwace alo Yerusalem, toreik ŋituŋa a Yudaya akitac ocur neni keŋ, totacae neni keŋ ŋatalantae amiat ŋulu ke esilipa ka etalantait ŋolo ke egolid.

⁴Kilunyok Neko ŋolo arae erwosit a Ijipit Eliakim lokaato a Yosia toruwor erwosit a Yudaya ka Yerusalem, kilocok tari ekiro keŋ toruwor Yeoiakim; nai ya Neko Yeoas Ijipit.

⁵Arae ŋikaru a Yeoiakim ŋatomoniarei ka ŋikan apaki ŋina esyakinia akipuka Yudaya. Kipuka iŋes Yudaya alo Yerusalem ŋikaru ŋitomon ka epei. Abu iŋes kitiya ŋakiro ŋuna aronok aneni ke Ekapolon Akuj keŋ.

⁶Abu Nebukadinesar erwosit a Babilon bu kikama akwap a Yudaya, toroc Yeoiakim ŋakejen a ŋiriko a ŋulu etiyatae a eburonis, ikotere ya iŋes Babilon.

⁷Abu daŋ Nebukadinesar tolema ŋiboro ŋice alo Kai ke Ekapolon, ya Babilon kiwuak kai ka akuj keŋ alo Babilon.

⁸Ŋiticisyo a Yeoiakim ŋuluce daadaŋ, ŋakiro ŋuna ka asiilyo ŋuna etiyat iŋes ka daadaŋ ŋuna etoroniyaritere iŋes, igiritae lokitaabo ŋolo a ŋakiro a ŋirwosi a Isirael ka Yudaya. Abu nai Yeoiakin kilunyokin lokicoloŋ keŋ kipuka Yudaya.

⁹Arae ŋikaru a Yeoiakin ŋitomon ka ŋikanikauni apaki ŋina esyakinia akipuka Yudaya. Kipuka iŋes Yudaya alo Yerusalem ŋilapyo ŋiuni ka ŋirwa ŋitomon. Etiyat iŋes ŋakiro ŋuna aronok aneni ke Ekapolon.

¹⁰Ani edoli ŋirwa ŋulu ka akicereet ekaru ŋol, abu erwosit Nebukadinesar kiyakiya ŋituŋa aomere Yeoiakin ka aponi yaarae iŋes Babilon kaapei ka ŋiboro ŋulu epol egyelit, ŋulu ayakasi Kai ke Ekapolon. Kilunyok Nebukadinesar Sedekia lokaato a Yeoiakin lokicoloŋ toruwor erwosit a Yudaya ka Yerusalem.

¹¹Arae ŋikaru a Sedekia ŋatomoniarei ka epei apaki ŋina esyakinia akipuka Yudaya. Kipuka iŋes Yudaya alo Yerusalem ŋikaru ŋitomon ka epei.

¹²Etiyat iŋes ŋakiro ŋuna aronok aneni ke Ekapolon Akuj keŋ. Abu iŋes toŋer akitiditeun bon aneni a Yeremia a ekadwaran a ŋolo abu kirwor ŋakiro ke Ekapolon neni keŋ.

¹³Abu daŋ Sedekia toŋer Nebukadinesar ŋolo sek abu kisikoŋ alokiro ka Akuj atemar iwuapi ŋakiro a Nabukadinesar; abu iŋes kitogogoŋ akou keŋ ka kitininik ŋatameta keŋ towou akiwuap ŋuna a Ekapolon Akuj a Ŋisirael.

¹⁴Apotu ŋisacaradotin daadaŋ ŋulu apolokinito ŋuluce kaapei ka ŋituŋa ŋuluce daadaŋ toruwor nooi ŋulu pa ekinyoma. Apotu kiwuapa ŋakiro ŋuna asiilyanak daadaŋ ŋuna etiyaete ŋituŋa a ŋakwapin a ŋunace, aŋun, apotu kitorona Akai ke Ekapolon alo Yerusalem ŋina sek aris Ekapolon kitaleu.

¹⁵Abu Ekapolon Akuj atapapaa a ŋituŋa a Yudaya ka Yerusalem torubak iyakiyanari ŋikadwarak akisirworiun ŋituŋa a Yudaya ka Yerusalem, anerae esyonit Akuj ikes kaapei ka Akai keŋ.

¹⁶Nai apotu ikes tokienatar ŋikadwarak ŋulu ka Akuj, toŋero ŋakiro ka Akuj ŋuna erworosi ŋikadwarak ka tojamuwasi ŋikadwarak ŋulu ka Akuj akitodol ŋina abunio anyunyura ka Akuj ŋina apolon nooi lotuŋa keŋ ŋul, todaun epite ece ŋolo eiunotor ikes.

¹⁷Aŋun, abu Akuj tocamak erwosit a Babilon ebuni akirem ikes. Abu toar ŋisorok kec anakibois kec a ŋina asegan, abu nyisyon esorokit, kori asorokit, ekasikout, kori akimat, kori ituŋanan idio daadaŋ ŋini apalag. Abu Akuj kipotok ŋituŋa ŋul daadaŋ neni a Nebukadinesar toar.

¹⁸Ya Nebukadinesar Babilon ŋiboro daadaŋ ŋulu ka Akai ka Akuj, ŋulu apolok ka ŋulucicik, ebari ŋolo ka Akai ka Akuj, ebari ŋolo ke erwosit ka ŋolo a ŋikapolok a ŋuluce.

¹⁹Apotu Ŋibabiloniyae kicunya Akai ka Akuj, toritakis arwatata a Yerusalem kwap ka kicunyasi ŋakais ŋuna ka apukan daadaŋ ka tomunaasi ŋiboro ŋulu apol egyelit daadaŋ alo Yerusalem.

²⁰Toriko Nebukadinesar Babilon ŋituŋa daadaŋ ŋulu keponi nyeari, ido apotu ŋul toruwor ŋiketiyak keŋ ka ŋulu a ŋidwe keŋ a ŋulusapa akitodol ŋina esyakinere apukan ŋina a Perisia.

²¹Aŋun, apotu ŋakiro ke Ekapolon ŋuna erworo ekadwaran Yeremia kiyookinos. Abala Yeremia ebe, “Idoŋi akwap a Yudaya emam ŋituŋa ŋikaru ŋatomonikanikaarei, ikotere etacakin lorwa ŋulu a Sabato, anerae kepotu ŋituŋa tojoŋoto akieŋunun ŋirwa ŋulu a Sabato.”

²²Alokaru a ŋolo a epei ipukat erwosit Kirus Perisia, abu Ekapolon kisiyook ŋakiro ŋuna sek alimunit iŋes aneni a ekadwaran Yeremia. Abu Ekapolon kiwuak lotau a erwosit Kirus a ŋolo a Perisia, alimun ŋakiro ŋuna aponi kigirae ka kiyakiyarae tosyomae ikeunitae ŋakiro keŋ neni a ŋituŋa a apukan keŋ a daadaŋ. Abasi ŋakiro ebe,

²³“Ebala erwosit Kirus ŋolo a Perisia ebe, ‘Adau Ekapolon Akuj ŋina anakuj ainakin ayoŋ akipuka ŋakwapin daadaŋ anakwap, ido akaseu ayoŋ adukokin aŋuna keŋ Akai aŋuna keŋ Yerusalem nakwap a Yudaya. Tokona nai, iyes daadaŋ ŋulu irae ŋituŋa ka Akuj, apesi Yerusalem, elipi ayoŋ Akuj toruko kaapei ka iŋes.’ ”