Read ngakarimojong 2 Ŋakiro a ŋirwa 6 Bible Online

2 Ŋakiro a ŋirwa 6 - ngakarimojong bible

2 Ŋakiro a ŋirwa 6

¹Tema nai Solomon, “Edaunit sek Ekapolon alimor atemar eboiyenene iŋes anadis a ŋina nyecai.

²Adau tokona ayoŋ adukokin iyoŋ Akai ŋina apolon nooi ŋina ailiilon, akibois ŋina iboiyeneneo iyoŋ ŋikaru ka ŋikaru.”

³Kiŋoliya nai erwosit lowae ŋolo aya ŋituŋa, kiterereŋ iŋes ŋituŋa a Isirael daadaŋ; apaki ŋin, awuasi ŋituŋa.

⁴Tema erwosit, “Kipuroe Ekapolon Akuj a Ŋisirael, ŋina esiyook anapedor keŋ ŋuna abu kiik neni a papa kaŋ a Daudi ebala,

⁵‘Ameun akoloŋit ŋina ayaunia ayoŋ ŋituŋa kaŋ Ŋisirael anakwap a ŋina a Ijipit, mam etaun edio ŋolo aseu ayoŋ alokabila ke edio a ŋolo a Ŋisirael, ŋolo emaikina todukokinae Akai, ikotere ekiro kaŋ eyakaun nen; mam ituŋanan idio aseu ayoŋ aruwor ekarikon a ŋituŋa kaŋ a Ŋisirael.

⁶Nai aseu ayoŋ Yerusalem, ikotere ekiro kaŋ toyakaun nen ka aseu ayoŋ Daudi kipuka ŋituŋa kaŋ Ŋisirael.’

⁷Ericit papa kaŋ Daudi ŋakiro nu alotau keŋ, ŋakiro ŋuna ka adukokin Akai aŋuna a ekiro ke Ekapolon Akuj ŋina a Ŋisirael.

⁸Nai abu Ekapolon tema neni a papa kaŋ a Daudi, ‘Aŋuna eyakatar ŋakiro nu lotau kon, akiduk Akai aŋuna a ekiro kaŋ, ibu iyoŋ kitiya ejok anakiwuakinit ŋakiro ŋun lotau kon.

⁹Kikote neni daŋ, meere iyoŋ iduki Akai ka Akuj, nai lokoku kon ŋolo erae iyoŋ iuruuni, iŋes eduki Akai aŋuna a ekiro kaŋ.’

¹⁰Esiyook tokona Ekapolon ŋakiro ŋuna abu kiik; anerae elunyokin tokona ayoŋ napukan a papa kaŋ Daudi, eboikin lokicoloŋ ŋolokipukaet Ŋisirael, lopite ŋolo eikinitor Ekapolon, ido adau ayoŋ adukun Akai aŋuna a ekiro ke Ekapolon a Akuj a ŋina a Ŋisirael.

¹¹Ewuak ayoŋ Kai ŋin Asaduku ŋina erae tooma keŋ eyai Acamunet ke Ekapolon ŋina acamunotor iŋes ka ŋituŋa a Isirael.”

¹²Towo nai Solomon alokiŋaren Namuroet ŋina ke Ekapolon iteete ŋituŋa a Isirael daadaŋ, kikyaa ŋakan, topeta.

¹³Apaki ŋin, keris iŋes keduku a eburonis imukure ka arae aoyau ka alapatu a ŋin ŋimitae ŋulu aapiyarito ŋiarei, torae anakou ka neni iteotor ŋimitae ŋulu aapiyarito ŋiarei ka aoyau alokwap tari kidiama aapiyarit emita, kedukokinitae imukure ŋin nalapatu ŋina alokiŋa Akai ka Akuj, towo iŋes a nimukure a ŋin. Toryedik nai Solomon a nen alokiŋaren atukot a Ŋisirael, kikyaa ŋakan keŋ topeta.

¹⁴Kilip tema, “Okoe Ekapolon Akuj a Ŋisirael, mam Akuj ŋina ikwaan ka iyoŋ anakuj, kori anakwap, ŋina iricit Acamunet anamina a ŋina nyiryaŋiryaŋa aŋuna a ŋiketiyak kon a ŋulu erubakinito iwuapito erot keŋ a ŋitai kec a daadaŋ.

¹⁵Idau iyoŋ akisiyookin akiikinet kon neni a eketiyan kon a Daudi papa kaŋ; kire jik ibu iyoŋ Akuj tolimu akiikinet ŋin ka isiyook iyoŋ ŋun anapedor kon, lopite ŋolo eyakatar nakoloŋit na.

¹⁶Aŋun nai, okoe Ekapolon, Akuj a Ŋisirael, kisiyook aŋuna a eketiyan kon a Daudi papa kaŋ, ŋuna ibu iyoŋ kiik iŋes ibala, ‘Mam nyikipiyori iyoŋ aryamun ituŋanan aneni kaŋ ŋini ilunyokin lokicoloŋ, kipuka ŋituŋa a Isirael; erae ca kerae ŋidwe kon ŋulusapa ŋulu ecoikinito daadaŋ ŋuna itiyaete, ŋulu iwuapito ŋakiro kaŋ lopite ŋolo ibunio iyoŋ kitiyaa.’

¹⁷Aŋun nai, okoe Ekapolon, Akuj a Ŋisirael, kimyek akirot kon kiyookin, akirot ŋina ibu iyoŋ kiik eketiyan kon papa kaŋ Daudi.

¹⁸“Nai ipedori mono kire iyoŋ Akuj akiboi alokwap ka ŋituŋa a? Nyelolom tari nakuj daadaŋ akiboiyo iyoŋ. Aŋun, ikokini nai Akai ka Akuj na ŋina aduku ayoŋ epedori akitemokin iyoŋ akiboiyo ai?

¹⁹Kiira akilip a eketiyan kon ka adyekitoi keŋ okoe Ekapolon Akuj kaŋ. Kiira akigworo ka akilip ŋina ilipya eketiyan kon alokiŋaren kon nakoloŋit na.

²⁰Elipi kite iyoŋ Akai na nakwaare ka naparan, kite akibois na ŋina ibu iyoŋ tolimu ebe, ‘Neni eyakaun ekiro kaŋ ne,’ ikotere nai iirari iyoŋ eketiyan kon ilipi neni kon iŋoliunit nakibois na.

²¹Kiira adyekitoi a eketiyan kon ka ŋina a ŋituŋa kon a Ŋisirael apaki ŋina ilipyata iŋoliunito nakibois na. Okoe kiirarae isua anakuj aneni iboiyo iyoŋ; topupok ido ikisyon.

²²“Ani kesec ituŋanan idio aneni a ekidunyet keŋ, ido inakinae akikoŋiet adio kikoŋ, bu kikoŋ alokiŋaren Namuroet kon alo Kai a na,

²³ekelipit kiira iŋes anakuj, kitiya ŋuna iyookino aneni kon neni keŋ, totubok ŋiketiyak kon kisileereu ŋini esecit, kisican iŋes aŋuna itiyat. Ekelipit kisileereu ŋulu iyookino erae ŋulu iyookino, torop ikes alotooma akiyookino kec.

²⁴“Apaki daadaŋ ŋina ereuniata ŋimoe kec ŋituŋa kon Ŋisirael aŋuna aseciata aneni kon, ido toboŋut ŋituŋa kon neni kon, kiŋita akisyonio alokiro kon ilipete ka edyakanarosi neni kon alo Kai a na,

²⁵ekelipit kiira anakuj, ido kisyoni asecit a ŋituŋa kon a Ŋisirael, kinyaku ikes nakwap ŋina ibu iyoŋ inak neni atapapaa kec.

²⁶“Apaki daadaŋ ŋina egolokinor nakuj, ido nyilim akiru aŋuna aseciata ikes aneni kon, ido nai kilipa ikes iŋoliunito nakibois na ikoŋete enyarito ekiro kon, tokiwa asecit aŋuna isicania iyoŋ ikes,

²⁷ekelipit kiira anakuj, ido kisyoni asecit a ŋiketiyak kon, a ŋituŋa kon a Ŋisirael. Kitatam ikes ŋipitesyo ŋulu ajokak ŋulu emaikina ikes kiwuapa; kiyakik akiru nakwap kec ŋina idau iyoŋ ainakin neni a ŋituŋa kon ikwapei akwap ŋina eruwor ŋina kec.

²⁸“Ani keyakaun eron nakwap, kori edeke, kori kerem ŋimanikorin, kori emaase, kori ekutelek; ani kiritasi ŋimoe ikes alotaun kec a edio; ŋulucan ca daadaŋ epote neni kec, kerae edeke daŋ,

²⁹akilip ca daadaŋ ka adyekitoi ca daadaŋ ŋina elimuni idio kec, kori ŋina elimunete ŋituŋa kon Ŋisirael, toyenete ca ikes alotai kec ŋican ŋulu eyakatar, ido kikyaa ŋinituŋanan ŋakan keŋ iŋoliyarit lowae ŋolo eyai Akai na;

³⁰ekelipit kiira anakuj aneni erae akibois ŋina iboiyo iyoŋ. Ekelipit kisyoni ka kitiya neni a ŋinituŋanan lopite ŋolo itiyaa iŋes, ikwapei iyenia iyoŋ ŋuna eya lotau a ŋinituŋanan, (anerae iyoŋ bon iyeni ŋitai a ŋituŋa a daadaŋ).

³¹Aŋun nai, ikitopoloorete ikes iyoŋ ka iwuapete ŋakiro kon ŋirwa daadaŋ ŋulu iboiyoto ikes anakwap a ŋina ibu iyoŋ inak atapapa kosi.

³²“Ikwaŋinapei, ani keya ŋituŋa ŋulugelae ŋulu nyerae ŋipei ka ŋituŋa kon Ŋisirael, ŋulu eponito anakwap ka ace a ŋina alwanan aŋuna ke ekiro kon a ŋolo epol nooi ka aŋuna a ŋiticisyo kon a ŋulu itiya iyoŋ a ŋulu ka aumokin ka ŋuna ka apedor kon ka ŋuna itenitor akiŋarakin; ani kepotu ŋituŋa ŋul, kilipa iŋoliunito Kai na,

³³ekelipit kiira anakuj aneni erae akibois ŋina iboiyo iyoŋ akilip kec, ido kitiya lopite daadaŋ ŋolo ikinyaritotor iyoŋ ŋigelaanot ŋul, ikotere ŋituŋa daadaŋ anakwap eyenunete ekiro kon ka ikikerete iyoŋ, lopite ŋolo ikikeritotor ŋituŋa kon Ŋisirael. Ŋakiro ŋun nai iteyenikinitere ŋituŋa atemar adaun akituruwor Akai ŋina adau ayoŋ akiduk ŋinakilipet neni kon.

³⁴“Ani kelomasi ŋituŋa kon kiŋa akitijiore ŋimoe kec, alopite a daadaŋ a ŋolo iyakiyarya iyoŋ ikes, ido kilipa ikes neni ke Ekapolon iŋoliunito lotaun ŋolo idau iyoŋ aseun ka Kai na ŋina adau ayoŋ akiduk aŋuna ka akilipya neni kon,

³⁵ekelipit kiira anakuj akilip kec ka adyekitoi kec, ido kiŋarak ikes anatyonis a ŋin.

³⁶“Ani keseca ikes neni kon, anerae mam ŋini nyesecenene, ido toŋoik iyoŋ ikes, kipotok lomoe kec, ikotere erikorete ŋimoe ikes nakwap kec erae ŋikikamara alojie, yaarae ikes neni elwana, kori neni eapi;

³⁷ani nai ketamut ikes anakwap a ŋina erikoryo ŋuna kepotu kitiyata, ido tokiwa, todyekanaros neni kon anakwap a ŋulu arikorete ikes, temasi, ‘Ikisec isua ka ikitiya ŋuna nyiyookino; ikitiya isua ŋuna a ŋileec;’

³⁸ani kekiwa ikes alotai kec a daadaŋ ka anakiyar kec a daadaŋ anakwap a ŋina a ŋimoe kec a ŋulu arikorete ikes erae ŋikikamara alojie, ido kilipa ikes neni kon iŋoliunito nakwap kec, ŋina ibu iyoŋ inak atapapaa kec ka lotaun ŋolo idau iyoŋ aseun ta Kai ŋina adau ayoŋ akiduk aŋuna ka akilipya neni kon;

³⁹ekelipit kiira anakuj aneni erae akibois ŋina iboiyo iyoŋ akilip ka adyekitoi kec, ido kiŋarak ikes anatyonis a ŋin. Kisyoni ŋituŋa kon ŋulu adaut akisec aneni kon.

⁴⁰Nai tokona okoe Akuj kaŋ, kiŋolik ka kiira akilip ŋina ilipyo anakibois a na.

⁴¹Tonyou tokona, okoe Ekapolon Akuj, ido tolot nakibois ŋina emaikina iyoŋ kiboiyo, iyoŋ kaapei ka Asaduku ŋina ka Acamunet a ŋina ka apedor kon. Okoe Ekapolon kiterereŋ ŋisacaradotin kon alotooma daadaŋ ŋuna itiyaete, kimyek ŋituŋa kon daadaŋ tolakaros aŋuna ka ajokis kon neni kec.

⁴²Okoe Ekapolon Akuj, nyiŋer erwosit ŋolo idau iyoŋ aseun. Totamunite amina ŋina ibu iyoŋ toyakar aŋuna a eketiyan kon Daudi.”