Read ngakarimojong Esir 4 Bible Online

Esir 4 - ngakarimojong bible

Esir 4

¹Ani iirarete ŋimoe a ŋituŋa a Yuda ka a ŋituŋa a Benjamin atemar ŋirikon ŋulu aboŋunete anakwap a ŋina sek arikoritae ikes edukete Akai ka Akuj a Isirael,

²toloto ikes neni a Serubabel ka neni a Yesua ta neni a ŋikarikok a ŋatekerin, tolimokis ikes ebe, “Oduko kaapei ka iyes, anerae ilipyo isua daŋ neni ka Akuj kus lopite ŋolo ilipyata iyes, ido einanakinio isua neni keŋ ŋamuronisya ameun alorwa a ŋulu a erwosit Esaraadon a ŋolo ka Asiriya, a ŋolo ikiyauni isua ne.”

³Nai toboŋokis Serubabel ka Yesua ta ŋikarikok a ŋatekerin temasi neni kec, “Nyipedorete iyes akitiya kaapei ka isua akiduk Akai aŋuna ka Akuj kosi, nai ikiduki isua make Akai aŋuna ke Ekapolon Akuj a Isirael, lopite ŋolo ikicikitor isua erwosit Kirus ŋolo a Perisia.”

⁴Apotu nai ŋituŋa ŋulu sek eboiyete anakwap a ŋin kitakadakis ŋituŋa a ekabila a Yuda, tokuryaketa akiduk,

⁵ido apotu ikes kiluŋuluŋa ŋikapolokinitok a ŋituŋa ka akwap a Perisia, ikotere nyecamakis ŋituŋa a ekabila a Yuda edukete nabo Akai ka Akuj. Torubakis ikes itiyaete ŋun ŋirwa daadaŋ ŋulu epukator Kirus akitodol apaki ŋina aruworor Darius ekepukan a Perisia.

⁶Apaki ŋina epukator erwosit Auseuro alokaru a ŋolo ageunia iŋes akipuka, apotu ŋimoe a ŋituŋa a ekabila a Yuda kigira abaruwa itoroniarito ŋituŋa ŋulu eboiyete alo Yudaya ka alo Yerusalem.

⁷Tosodi alorwa a ŋulu epukator Aritaseses apotu Bisilam, Misiredas, Tabeel kaapei ka ŋirukitos kec ŋuluce, kigira abaruwa neni a erwosit Aritaseses a ŋolo a Perisia; egiritae abaruwa ŋin a Ŋaramaniae ka amaikina kibelekinoe naŋajep ŋina a ŋituŋa a Perisia apaki ŋina eswomere.

⁸Apotu Reum ŋolo ewuapit erwosit anapolou ka Simisai ekegirigiran, kigira abaruwa neni a erwosit Aritaseses itoroniarito Yerusalem.

⁹(Apotu nai Reum ŋolo ewuapit erwosit anapolou ka Simisai ekegirigiran ta ŋirukitos kec ŋuluce: Ŋikatubok ŋakiro, ŋikiyakia, ŋikapolok ŋulu epukato kaapei ke erwosit, Ŋiperisi, ŋituŋa ŋulu ka Erek, Ŋibabiloniyae, ŋituŋa a Susa ikes Ŋielami

¹⁰ka ŋituŋa a ŋakwapin ŋuluce ŋulu kebu koloŋ arwonit ekapolon Osinapar toriko kisiboiyo lotaunio ŋulu a Samaria ka nakiboisyo ŋunace Alokekwaye Aŋolol Eupurate ŋuna epukat erwosit a Perisia, kigira abaruwa neni ka Aritaserses.

¹¹Ŋakiro ŋuna apotu ikes kigira nabaruwa ŋin ikes nu): “Neni a erwosit Aritaseses, ikiyakikinito iyoŋ ŋiketiyak kon, ŋituŋa ŋulu iboiyete Alokekwaye Aŋolol Eupurate emalas. Tosodi tokona,

¹²ikilipi iyoŋ erwosit toyenu atemar aloto Yerusalem Ŋiburaniyae ŋulu apote aneni kon neni kosi. Edukete ikes nabo etaun ŋol ŋolo a ŋikaŋerok ka a ŋikaronok, aapuu ikes akirikakin akiduk nabo ŋarwatatain ka esubanakinete ŋakisyakineta a ŋarwatatain.

¹³Tokona ikilipi iyoŋ erwosit toyenu atemar, ani kedukokin nabo etaun lo ka kirikakin adukokin ŋarwatatain, ejoŋoete ŋituŋa lu akitac ocur ka etacit ŋolo sek amaikina ikes tolemut aloboro a ŋulu eyakatar ikes, kori egyelanarete, aŋun, ekudyokunete ŋiboro ŋulu sek elemununuyo aŋuna ke erwosit.

¹⁴Aŋuna tokona erwosit ikiyarikinitor isua kai a apukan, nyikicamit isua akitere ŋituŋa pa itopoloorito erwosit, aŋun, iyakuunitae isua abaruwa na akiteyenikin iyoŋ erwosit ŋakiro ŋun,

¹⁵ikotere toripuripuinae anakigireta a ŋuna atapapaa kon. Iryamuni iyoŋ anakigireta a ŋun atemar erae etaun lo ŋolo a ŋikaŋerok ka esicanito ŋituŋa keŋ ŋirwosi ka ŋikapolok ŋulu ipukatotor ŋirwosi. Erae etaun ŋolo a ŋikaŋerok ŋinapeikoloŋ, ŋakiro ŋun iŋes aponere kinyasunae etaun ŋol toruwor ereŋorot.

¹⁶Ikiteyenikinitae isua iyoŋ erwosit atemar kedukokin nabo etaun ŋol, kirikakin adukokin ŋarwatatain keŋ, emamukaun ibore erae ŋini a erwosit anakwap a ŋina alokekwaye aŋolol Eupurate.”

¹⁷Kiyakiya erwosit aboŋokinet keŋ na, “Neni a Reum a ŋolo iwuapit erwosit anapolou ka Simisai ekegirigiran ka neni a ŋirukitos kec a ŋuluce a daadaŋ ŋulu iboiyete alo Samaria ka a nakwap a ŋina alokekwaye aŋolol Eupurate, ekemalae ayoŋ iyes. Tosodi tokona,

¹⁸adaun akisyom abaruwa ŋina ikigirakinete iyes ayoŋ ka akibeleun ŋakiro keŋ alokiŋaren kaŋ.

¹⁹Aŋun, abu ayoŋ otub atemar toripuripunae ŋakiro ŋun, ido adaun kire aripun atemar ŋinapei alorwa a ŋulu koloŋ keŋereneneete ŋituŋa a Yerusalem ŋirwosi ka ayakatar Yerusalem ŋituŋa ŋulu aŋerito ŋapukasinei ka ayakatar ŋituŋa ŋulu esyaak.

²⁰Ayakar Yerusalem ŋirwosi ŋulu agogoŋok ŋulu epukato akwap daadaŋ ŋina alokekwaye aŋolol Eupurate, ido alemenakinio ikes ocur ka etacit ŋolo alemununyete ŋituŋa aloboro a ŋulu ayakatar ikes, kori a ŋulu agyelanarete.

²¹Aŋun, emaikina iyes tolimokis ŋituŋa ŋul atemar tojoŋoto akitiya etic ŋol ka atemar nyedukokin nabo etaun ŋol akitodol ŋina atubunio ayoŋ ŋakiro kaŋ.

²²Nyijamakis jik ŋakiro ŋun, ikotere nyaryamu ayoŋ ajamuwaro adio.”

²³Tosodi ani eswomakinio abaruwa a erwosit Aritaseses neni a Reum ka neni a Simisai a ekegirigiran ka neni a ŋirukitos kec a ŋuluce, toloto ikes atipei neni Ŋiburaniyae Yerusalem, kitiŋakis Ŋiburaniyae ka agogoŋu akimyekin etic kec ŋolo ka akiduk nabo etaun.

²⁴Apaki ŋin, aponi kimyekinae etic ŋolo ka akiduk a Akai ka Akuj, torubak jik etic ŋol egolokinitoe akitodol ekaru ŋolo a ŋiarei ipukat erwosit Darius ŋolo a Perisia.