Read ngakarimojong Esir 9 Bible Online

Esir 9 - ngakarimojong bible

Esir 9

¹Kedaun akitiya ŋakiro ŋun daadaŋ apotu ŋikapolokinitok ŋituŋa potu neni kaŋ temasi, “Nyetyakara ŋituŋa a Isirael ka ŋilepi alotuŋa a ŋakwapin ka anakiro kec a ŋuna asiilyanak, nyetyakara ikes aneni a Ŋikanaani, a Ŋiitaiti, a Ŋiperisi, a Ŋiyebusi, a Ŋiamoni, a Ŋimoabi, a Ŋijipitian ka aneni a Ŋiamori,

²anerae eitununut ikes ŋidwe ŋulupesur ŋulu a ŋituŋa a ŋul ikwapei ŋaberu kec ka ŋaberu a ŋidwe kec a ŋulusapa. Aŋun, enyalakin ŋituŋa ŋulu asegak ŋulu ka Akuj ka ŋituŋa a ŋakwapin, ido anamamukau akikinyomit Akuj arikokis ŋikapolokinitok ŋituŋa akitiya ŋakiro ŋun.

³Apaki ŋina eirarya ayoŋ ŋakiro ŋun, abu ocil akaulat kaŋ ka elou kaŋ ka orut ŋitim anakou kaŋ ka alopenek kaŋ, eboikin akabulit.”

⁴Apotu nai daadaŋ ŋulu ayakatar akitopoolorit ŋakiro ŋuna ka Akuj a Ŋisirael tocununos ekerimokis ayoŋ kidiŋ, eboi ayoŋ alokwap akabulit akitodol apaki ŋina ka amuronot a ŋina ke eboŋ; etiyaete ikes ŋun aŋuna amamukar akikinyomit ayakatar ŋulu aboŋunete anakwap a ŋina sek arikoritae.

⁵Apaki ŋina ka amuronot a ŋina ke eboŋ, abu ayoŋ anakiredakin akiron ka ecilicilaara ekaaso ka akaulat kaŋ oryedik, ekyaa ŋakan kaŋ apetarit neni ke Ekapolon Akuj kaŋ,

⁶otema, “Okoe Akuj kaŋ, ekerumito ayoŋ ŋileec nooi ka nyacamit akikeun ereet kaŋ neni kon Akuj kaŋ, anerae alalata ŋasecisya kosi nooi ka adolu ekaile kidiama.

⁷Ameun alorwa atapapaa kosi tari tokona, ikiya isua jik lokaile ŋolo apolon nooi aŋuna a ŋasecisya kosi, aponi ikipotokin isua ka ŋirwosi kosi ka ŋisacaradotin kosi napedor a ŋirwosi a ŋakwapin, ikotere ikiaryo a ekileŋ, ikirikoryo ikirae ŋirikon, ikidemaryo ŋiboro ka ikiteryamunio ŋileec ŋulu apolok nooi, lopite ŋolo eyakatar ŋakiro tokona.

⁸Nai tokona, alotooma apaki ŋina euruwuana, ikiminak iyoŋ isua Ekapolon Akuj kosi, iyoŋ ŋolo ibu ikimyek isua ikirae ŋipiya ka ikiinak isua akiboi ikirae ŋulu ikiuna anakibois kon a ŋina asegan, ikotere ikiinakinia isua akiboi emam ŋace ka akiyar ŋina kitete anakiyar a na a ŋina ikiraakar ŋipi.

⁹Kire, ikirae isua ŋipi, nai nyimyekina iyoŋ isua amina anapiitonut, nai ikitoodik iyoŋ isua amina kon ŋina nyiryaŋiryaŋa alokiŋaren erwosit a Perisia aŋuna ka ainakin isua akiyar ŋina kitete ikotere ikidukokini nabo Akai ka Akuj, osubakisi neni emunaara ka ikiryamuni neni ikiunor alo Yudaya ka alo Yerusalem.

¹⁰“Tosodi tokona, okoe Akuj kosi, anukiro ikilimuni isua ekaku a ŋakiro a ŋun? Anerae aŋeri isua ŋakiciketa kon

¹¹ŋuna ilimu iyoŋ aneni a ŋiketiyak kon a ŋikadwarak ibala, ‘Akwap na ŋina ilomarete iyes toruwor ŋina kus, erae akwap ŋina nyeseg, ŋina eya ŋakiro ŋuna asiilyanak ŋuna itiyato ŋituŋa a ŋakwapin. Ilelebikinito ikes asiilyo kec nakwap ŋin ameun alowae ke epei tari ŋoloce.

¹²Aŋun, nyipotonosi ŋidwe kus ŋulupesur, alokiitanu neni a ŋidwe kec a ŋulusapa, kori ŋidwe kus ŋulusapa neni a ŋidwe kec a ŋulupesur, irubakinete iyes igogoŋ ka imujete ŋiboro ŋulu ajokak anakwap a ŋin, kimyekis aŋuna a ŋidwe kus erae ibore ŋini eruwor ŋini kec ŋikaru ka ŋikaru.’

¹³Atakanut ŋun daadaŋ neni kosi aŋuna a ŋiticisyo kosi a ŋulu aronok ka aŋuna a ekaile a ŋolo apolon, aŋuna ibunio iyoŋ Akuj kosi nyikisican isua lopite ŋolo amaikina ikisicanere isua aŋuna a ŋasecisya kosi, ido ikideu isua lupei lu ikirae ŋipiya,

¹⁴ikiŋeri mono tokona isua ŋakiciketa kon nabo enyalakinos eitanakinos ka ŋituŋa a ŋakwapin ŋulu itiyaete asiilyo a? Nyikiŋoikini mono iyoŋ isua akitodol ŋina ikimunyarya nyidoŋ tari ŋipiya a?

¹⁵Okoe Ekapolon, Akuj a Isirael, iyookino iyoŋ, nai ikideun isua ikirae ŋipiya, lopite ŋolo eyakatar ŋakiro tokona. Ikiya isua kiŋaren kon ikiyakar ekaile, anerae mam ituŋanan epedori akiwo alokiŋaren kon aŋuna a ŋakiro aŋun.”