Read ngakarimojong Neem. 1 Bible Online

Neem. 1 - ngakarimojong bible

Neem. 1

¹Ŋakiro a Neemia a lokoku ka Acalia. Alokaru a ŋolo a ŋatomoniarei ipukat Aritaseses Perisia, elap ŋolo enyaritae a Ŋaburaniyae Kisilep, apaki ŋina ayakar ayoŋ Susa lotaun a Perisia ŋolo apolon,

²abu lokaato kaŋ epei ŋolo anyaritae Anani bu neni kaŋ kaapei ka ŋikilyok ŋice ŋulu alo Yudaya, ido abu ayoŋ eŋit ikes ŋuna a Ŋiburaniyae a ŋulupiya a ŋulu aponi nyerikor ka ŋakiro ŋuna a Yerusalem.

³Okoboŋokis ikes ayoŋ temasi, “Ŋipiya ŋulu eya ama Yudaya, ŋulu aponi nyerikor, eyakasi locan ŋulu apolok ka loleec; aritaasi ŋimoe arwatata ŋina a Yerusalem ka amunaasi ŋipukei keŋ ka akim.”

⁴Ani eirari ayoŋ ŋakiro ŋun, abu eboikin, egwor, eyaloloŋ ŋirwa ŋulu alalak eredakinit akiron ka elipi alokiŋaren Akuj ŋina anakuj.

⁵Abu ayoŋ otema anakilip kaŋ, “Okoe Ekapolon, Akuj ŋina anakuj, Akuj ŋina etiron ka ŋina ikitubuli, ŋina iricit acamunet ka amina ŋina nyiryaŋiryaŋa aŋuna a ŋulu ikiminasi iyoŋ ka aŋuna a ŋulu iwuapito ŋakiciketa kon,

⁶kiŋolik eketiyan kon ka kiira akilip a eketiyan kon, ŋina tokona elipi ayoŋ alokiŋaren kon naparan ka nakwaare aŋuna a ŋiketiyak kon, a ŋituŋa a Isirael, alimorit ayoŋ ŋasecisya a Ŋisirael ŋuna aseci isua aneni kon, ikisec ayoŋ kaapei ka ekal kaŋ.

⁷Ikitoŋoi isua iyoŋ nooi aŋuna pa ewuapere ŋakiciketa, ŋikisila ka ŋakiro ŋuna itubunit iyoŋ, ŋakiro ŋuna ibu iyoŋ kicik eketiyan kon Moses.

⁸Totamu ŋakiro ŋuna ibu iyoŋ kicik eketiyan kon Moses ibala, ‘Ani pa kiwuapa iyes ŋakiro kaŋ ekeelari ayoŋ iyes nakwapin a ŋituŋa;

⁹nai ani kiboŋut iyes neni kaŋ, ido kiwuapa ŋakiciket kaŋ kitiyata ikes, tari keyakasi ŋituŋa kus ŋulu aponi torikoroe nakwapin ŋuna alwanak, acununi ayoŋ ikes aina, enyaku ikes nakibois ŋina aseu ayoŋ atemar kilipere neni kaŋ.’

¹⁰Erae ikes ŋiketiyak kon ka ŋituŋa kon ŋulu ibu iyoŋ tolaku ka apedor kon a ŋina etiron ka a agogoŋu kon.

¹¹Okoe Ekapolon, topupok akilip a eketiyan kon ka topupok akilip a ŋiketiyak kon a ŋulu elelyakinito akitopoloorit ekiro kon. Inak akiloun neni a eketiyan kon nakoloŋit na, ido kisyoni iŋes alokiŋaren ekepukan lo!”