Read ngakarimojong Neem. 12 Bible Online

Neem. 12 - ngakarimojong bible

Neem. 12

¹Erae lu ŋisacaradotin ka ŋilepi ŋulu aboŋunete ka Serubabel lokoku a Sealtiel ta Yesua: Seraia, Yeremia, Esira,

²Amaria, Maluk, Atus,

³Sekania, Reum, Meremos,

⁴Ido, Genesoi, Abiya,

⁵Mijamin, Maadia, Biliga,

⁶Semaia, Yoiarib, Yedaia,

⁷Salu, Amok, Ilikia, Yedaia. Arae ŋul ŋikarikok a ŋisacaradotin ka a ŋirukitos keŋ alorwa a ŋulu a Yesua.

⁸Ŋilepi ŋulu aboŋunete kaapei ka Serubabel ta Yesua ikes lu: Binui, Kadimel, Serabia, Yuda ka Matania, arae Metania ka ŋirukitos keŋ apolokinito ŋieosyo ŋulu ka alakar neni ka Akuj ka arae

⁹Bakubukia ka Uni ta ŋirukitos kec aboonokin ka ikes.

¹⁰Arae Yesua papa a Yoiakim, arae Yoiakim papa a Eliasib, arae Eliasib papa a Yoiada,

¹¹arae Yoiada papa a Yonasan ka arae Yonasan papa a Yadua.

¹²Alorwa a ŋulu a Yoiakim a esacaradoti ŋulu apolokinito ŋatekerin ikes lu: Anateker a Seraia arae Meraia apolokinit, anateker a Yeremia arae Anania apolokinit,

¹³anateker a Esira arae Mesulam apolokinit, anateker ka Amaria arae Yeoianan apolokinit,

¹⁴anateker a Maluki arae Yonasan apolokinit, anateker a Sebania arae Yosepu apolokinit,

¹⁵anateker ka Arim arae Adina apolokinit, anateker a Meraios arae Elikai apolokinit,

¹⁶anateker a Ido arae Sakariya apolokinit, anateker a Gineson arae Mesulam apolokinit

¹⁷anateker ka Abia arae Sikiri apolokinit, anateker a Miniamin ka Moadia arae Pilitai apolokinit,

¹⁸anateker a Biliga arae Samua apolokinit, anateker a Semaia arae Yeonasan apolokinit;

¹⁹anateker a Yoiarib arae Matenai apolokinit, anateker a Yedaia arae Usi apolokinit

²⁰anateker a Salai arae Kala apolokinit, anateker ka Amok arae Eber apolokinit

²¹anateker a Ilikia arae Asabia apolokinit, anateker a Yedaia arae Nasaniel apolokinit.

²²Alorwa a ŋulu ka Eliasib, Yoiada, Nasanael, Yoanan ka Yadua, egiritae ŋirorwa a ŋikapolokinitok a ŋatekerin a ŋilepi ka a ŋisacaradotin daŋ akitodol apaki ŋina epukator erwosit Darius Perisia.

²³Egiritae ŋirorwa a ŋikapolok a ŋatekerin a ŋilepi lokitaabo ŋolo a ŋakiro a ŋirwa akitodol ŋirwa ŋulu a Yoanan a lokoku ka Eliasib.

²⁴Arae lu ŋikapolokinitok a ŋilepi: Asabia, Serabia, Yesua, lokoku a Kadimiel. Ŋirukitos kec ŋulu aboonokin ka ikes aeore ŋieosyo ŋulukipuret ka ŋulu ka alakar neni ka Akuj, lopite ŋolo ecikitor Daudi ŋolo arae ituŋanan ŋini ka Akuj.

²⁵Arae Matania, Akibukia, Obadia, Mesulam, Talimon ka Akub ŋiketeok ŋipukei, eyokiyete ikes ŋakais ŋuna eŋadatae ŋiboro alopukei.

²⁶Etiyaete ŋul etic ŋol alorwa a ŋulu a Yoiakim a lokoku a Yesua, a ŋolo arae lokoku a Yosadak ka alorwa a ŋulu epukator Neemia ta alorwa a ŋulu a Esira esacaradoti a ŋolo arae eketataman a ŋikisila.

²⁷Akoloŋit ŋina etaleunere arwatata ŋina a Yerusalem, aponi kiwarunae ŋilepi anakiboisyo kec, yaunae Yerusalem aŋuna ka akinumunum ŋasuban ŋuna italeunere arwatata analelyanu ka analakara eoi eramio ŋitworoi, ŋaduŋui ka ŋagitae.

²⁸Apotu ŋatuketa a ŋikaeok tocununos anakiboisyo a ŋuna alodiyete Yerusalem ka alorerya a Ŋinetopiasi

²⁹ka alorerya a Bes-Gilgal ka anakiboisyo a Geba ta Asimepes, apote ikes anakiboisyo a ŋun, anerae adukito ŋikaeok a ŋuna kec ŋirerya nakiboisyo ŋuna alodiyete Yerusalem.

³⁰Tosodi, apotu ŋisacaradotin ka ŋilepi kitaleunos, ido kitaleut ŋituŋa, ka ŋipukei ta arwatata.

³¹Abu nai ayoŋ oya ŋikarikok a ŋiletok a Yuda etipeiyorya ikes kidiama arwatata, ido oseu ŋatuketa ŋaarei ŋuna apolok, ŋuna elosete akirimor etaun ka alakar neni ka Akuj. Abu atukot apei kitor lowae ŋolo aloteten ŋolo ka epuke a ŋolo ka Aoret,

³²ewuapito ŋituŋa lu ikes: Osaia ka atutubet apei ŋina a ŋikarikok a ŋiletok a Yuda

³³ka Asaria, Esira, Mesulam,

³⁴Yuda, Benjamin, Semaia ka Yeremia.

³⁵Arukito daŋ ikes ka ŋisacaradotin ŋice ŋulu asorokanak ŋulu ekusete ŋarupepe, ŋisacaradotin ŋul ikes lu: Sakariya lokoku Yonasan, a ŋolo arae lokoku a Semaia, a ŋolo arae lokoku a Matania, a ŋolo arae lokoku a Mikaia, a ŋolo arae lokoku a Sekur, a ŋolo arae lokoku ka Asap

³⁶ka arukito Sakariya ka ŋiyeneta keŋ lu: Semaia, Asarael, Milalai, Gilalai, Maai, Nasaniel, Yuda ka Anani, atiŋito ŋul ŋiboro ŋulu eore ŋulu a Daudi a ŋolo arae ituŋanan ŋini ka Akuj, ido kiŋarenikinite ikes Esira ŋolo arae esacaradoti ka eketataman a ŋikisila.

³⁷Ani edolete lopuke ŋolo a Elelya, kitipeiyosi anadoketa a ŋuna alotaun a Daudi, neni ikyaaror alokidiama akai a Daudi, todolo lopuke ŋolo a Ŋakipi ŋolo ayai Kide etaun.

³⁸Tosodi, kitor atukot ŋinace lowae ŋolo alo kedyeny, ido abu ayoŋ ewuapak ikes erukitoe ka atutubet apei a ŋituŋa, omekisi arwatata alokidiama aduketait ŋina aoyan ŋina a ekitet tari narwatata ŋina Aburon,

³⁹kitoroi kidiama epuke ŋolo a Epuraim, kitoroi diyete Epuke ŋolo Ŋorot ka diyete Epuke ŋolo a Ŋikolya ka diyete aduketait ŋina aoyan ŋina ka Ananel ka diyete aduketait ŋina aoyan ŋina Amiat tari lopuke ŋolo a Ŋamesekin, ido abu atukot ŋin towo alopuke a ŋolo a ŋiketeok.

⁴⁰Aŋun, apotu ŋatuketa ŋunaarei daadaŋ ŋuna alakar neni ka Akuj, towua alo Kai ka Akuj, ayai ayoŋ daŋ nen kaapei ka atutubet apei ŋina a ŋikapolokinitok a ŋituŋa

⁴¹ta ŋisacaradotin lu: Eliakim, Maaseia, Miniamin Mikaia, Elioenai, Sakariya ka Anania, atiŋito ŋisacaradotin ŋul ŋarupepe,

⁴²aya daŋ nen ŋisacaradotin lu: Maaseia, Semaia, Eleasar, Usi, Yeoanan, Maliciya, Elam ka Ezer, ido aeosi ŋikaeok epolokinit Yesiraia ikes.

⁴³Apotu ikes inakis akoloŋit ŋin ŋamuronisya ŋuna alalak alelyanu, anerae abu Akuj inak ikes alelyanu ŋina apolon, apotu ŋaberu ka ŋidwe daŋ tolelyana. Apedori ituŋanan akiirar aneni alwanan ecelet ŋolo ka alyelyanu a ŋituŋa a Yerusalem.

⁴⁴Akoloŋit ŋin aponi toseunae ŋikilyok apolokin ŋagulei ŋuna iŋadao ŋiboro lu: Ŋainakineta, ŋaraito ŋuna a ekiŋaren ka ŋatutubeta ŋapeipei alotooma ŋitomon a ŋiboro; arae etic kec acununun nagulei ŋun ŋiboro ŋulu elimunit ekisil yaunae aŋuna a ŋisacaradotin ka ŋilepi alomanikorin a ŋulu a ŋituŋa a ŋulu eboiyete alotaunio, anerae alakara ŋituŋa a Yudaya aŋuna a ŋisacaradotin ka ŋilepi ŋulu etiyaete etic alo Kai ka Akuj.

⁴⁵Etiyaete ikes etic ŋolo a Akuj kec ka ŋolo kitaleununuyet, etiyaete ŋikaeok ka ŋiketeok ŋipukei daŋ ŋiticisyo kec lopite ŋolo ecikitor Daudi ka lokoku keŋ Solomon.

⁴⁶Alorwa a ŋulu a Daudi ka Asap, ŋirwa ŋulu koloŋ, ayai ekarikon a ŋikaeok ka ŋolo a ŋiketeok ŋipukei ka ayakasi ŋieosyo ŋulukipuret ka ŋulu ka alakar neni ka Akuj.

⁴⁷Alorwa a ŋulu a Serubabel ka alorwa a ŋulu a Neemia ayaununeete a ŋinakoloŋit Ŋisirael daadaŋ ŋainakineta aŋuna a ŋikaeok ka a ŋiketeok ŋipukei. Atyakanarete ikes ŋiboro aŋuna a ŋilepi, ido atyakanarete ŋilepi ŋiboro ŋulu amaikina erae ŋulu a ŋiletok ka Aron.