Read ngakarimojong Neem. 6 Bible Online

Neem. 6 - ngakarimojong bible

Neem. 6

¹Apaki ŋina alimokinere Sanibalat, Tobia ka Gesem ŋolo arae emarabut ta neni a ŋimoe a Ŋiburaniyae a daadaŋ atemar adukok ayoŋ arwatata ka atemar adaun akitemokin neni aorori anarwatata daadaŋ (tari daŋ ŋina ariŋaakar ayoŋ apaki ŋin nyiwuakina ŋikekya lopukei),

²apotu Sanibalat ka Gesem kiyakuut ituŋanan alimokin ayoŋ ebe, “Bua eryamunos nakibois apei, lore epei alorerya a ŋulu eya nadipo ŋina enyaritae Ono.” Nai acamito ikes akitiya ŋuna aronok neni kaŋ.

³Aŋun, abu ayoŋ eyakiya ŋituŋa neni kec alimokin ikes ebe, “Etiyae ayoŋ etic ŋolo agogoŋon nooi, ido nyapedori ayoŋ abunore. Kaanukiro emyekinia ayoŋ etic, ido otiyaun neni kus?”

⁴Kiyakuut ikes ŋituŋa neni kaŋ ŋarwa ŋaomwon, ebasi neni pei, ido abu ayoŋ daŋ oboŋok ikes ŋuna pei sek.

⁵Abu nai Sanabalat kiyaku akiyakuunet ŋina a ŋakan eketiyan keŋ neni kaŋ etiŋit anakan keŋ abaruwa ŋina aŋaara.

⁶Egiritae nabaruwa ŋin ŋakiro nu, “Irworosi ŋituŋa a ŋakwapin ka elimunit Gesem daŋ ŋunapei, atemar icamito iyoŋ ka Ŋiburaniyae akiŋer erwosit, ŋakiro ŋun iŋes idukyo iyoŋ arwatata, ido anakiro a ŋun, ebookoi icamit iyoŋ aruwor erwosit kec.

⁷Idau daŋ iyoŋ akiwuakin ŋikadwarak akisera aŋuna kon alo Yerusalem ebe, ‘Eyai erwosit Yudaya!’ Iyakiyaryo tokona ituŋanan alimokin erwosit ŋakiro ŋun. Aŋun, bua ikotere ikiyanuni iwon ŋakiro ŋun kaapei.”

⁸Tosodi, abu ayoŋ eyakiya ituŋanan neni keŋ alimokin iŋes ebe, “Nyitiyakina ŋakiro ŋuna ikote ŋuna ilimunit iyoŋ, iyoŋ itamunit ŋakiro ŋun anatameta kon a elope.”

⁹Alimunete ikes ŋun, anerae acamito ikes daadaŋ akitubul isua etamete ebe, “Imyekinete ikes etic ŋolo ka akiduk, ido nyitiyakinio etic ŋol.” Nai tokona, okoe Akuj, kitogogoŋoi ayoŋ.

¹⁰Akoloŋit apei, apaki ŋina alositor ayoŋ kai a Semaia a lokoku a Delaia a ŋolo arae lokoku ka Meetabel, arae Semaia ŋolo agolokinitoe kai keŋ, abu iŋes okolimok ayoŋ tema, “Eryamunos kaapei tooma Kai ka Akuj, ido ogolokisi ŋikekya ŋulu ka Akai ka Akuj, anerae eponito ŋikemanitok kon akiar iyoŋ, kire jik akoloŋit na nakwaare epote ikes akiar iyoŋ.”

¹¹Nai abu ayoŋ otema, “Emaikina mono ekile ŋolo ikoni ayoŋ toem a? Epedori mono ekile ŋolo ikoni ayoŋ akiem Kai ka Akuj aiun akiyar keŋ a? Nyalosi ayoŋ inaa!”

¹²Abu nai ayoŋ oyenu atemar pa kiyakuunit Akuj iŋes jik, nai abu iŋes todwar ŋuna aronok aŋuna kaŋ, anerae epaŋgato Tobia ka Sanibalat iŋes.

¹³Kipaŋgatae iŋes aŋuna a ŋakiro a nu: Akitubul ayoŋ, ikotere osec ayoŋ aŋuna etiyaa ŋakiro ŋun, ikotere oruwor ayoŋ ituŋanan ŋini aronon alotuŋa.

¹⁴Okoe Akuj kaŋ, toyeni Tobia ka Sanibalat, alotooma ŋakiro nu ŋuna etiyata ikes ka akadwaran Noadia daŋ ka ŋikadwarak ŋuluce daadaŋ ŋulu acamito akitubul ayoŋ.

¹⁵Aŋun, aponi kirikakinae akiduk arwatata alotooma ŋirwa ŋatomonikan ka ŋiarei ŋirwa ke elap ŋatomoniarei ka ŋikan elap ŋolo anyaritae Alul.

¹⁶Tosodi ani iirarete ŋimoe kosi daadaŋ atemar erikakin isua akiduk arwatata, apotu ŋituŋa a ŋakwapin daadaŋ ŋulu eboiyete alodiyete kosi tokuryaketa, tojoŋoto akituro, anerae apotu ikes toyenut atemar erikakin etic ŋol aŋuna ka akiŋarakinet ka Akuj.

¹⁷Apaki daŋ ŋin, kepotu ŋikapolok a Yudaya kiyakiyasi ŋabaruwae neni a Tobia ka kepotu ŋabaruwae ŋuna aboŋokini Tobia todolut neni kec.

¹⁸Alalak ŋituŋa a Yudaya ŋulu kikoŋito neni a Tobia, anerae arae iŋes lokamuran a Sakania alokoku ka Ara, ido eisit lokoku keŋ Yeoanan nakoku a Mesulam a ŋolo arae lokoku a Berekia.

¹⁹Apotu daŋ ŋituŋa ŋul okolimokis ayoŋ ŋuna a ŋiticisyo a Tobia a ŋulu ajokak, ido kepotu ikes tolimokis iŋes ŋakiro kaŋ. Tosodi abu Tobia kiyaku ŋabaruwae akitukuryan ayoŋ.