Read ngakarimojong Tob 11 Bible Online

Tob 11 - ngakarimojong bible

Tob 11

¹Apaki ŋina adolunioto ikes diyete Kaserin, etaun ŋolo eteosi ka Ninepe, tema Rapael,

²“Iyeni iyoŋ epite ŋolokuwar emyekinere iwon papa kon a?

³Oema iwon kiŋaren eriŋa aberu kon nyedolo lore, ikotere etemokisi akai eriŋa ikes eponito alorot.”

⁴Ani elosete ikes kaapei, tema Rapael neni a Tobias, “Kitemok apid toapiye.” Alosi eeŋok kaapei ka ikes bunite alokaku kec.

⁵Apaki ŋin, eboi Ana iteorit lorot ŋolo iwuapakini lokoku keŋ eboŋuni.

⁶Ani ejipari iŋes lokoku keŋ ebunit, tema neni a papa a lokoku keŋ, “Kiŋolik, abu lokoku kon kaapei ka ekile ŋolo arukoryata iŋes!”

⁷Ani eriŋa Tobias nyedolo neni a papa keŋ, tolimok Rapael Tobias tema, “Ayeni ayoŋ atemar iŋolikini iŋes akwap nabo.

⁸Kiosak apid a ekolya nakonyen keŋ, einakini apid ŋin ŋikadeidei ŋulu akwaŋak anakonyen keŋ tocunakin, ido todalacun anakonyen keŋ, epedori nai papa kon akiŋolikin akwap nabo ka iŋolikini akica.”

⁹Abu nai Ana toem neni a lokoku keŋ, totunakin iŋes ebala, “Lokoku kaŋ, ikwapei tokona ekeŋolikinia ayoŋ iyoŋ atenit ayoŋ atwanare.” Abu nai Ana kikalou.

¹⁰Tonyou nai Tobit tolomu alopuke a ŋolo ka alapatu esibit iguwanakini, tolot Tobias akisiryam iŋes,

¹¹etiŋit apid a ekolya, kikamu papa keŋ ejok abu Tobias tokutak ŋakonyen a papa keŋ ebala, “Papa, tomukyaniar!” Ani irworo iŋes ŋakiro ŋun, abu kiosak apid a ekolya nakonyen a papa keŋ,

¹²abu apid ŋin kitojok ŋakonyen a Tobit.

¹³Ekaku abu Tobias a ŋakan keŋ a daadaŋ todalaciya ŋikadeidei ŋulu akwaŋak alokori a ŋakonyen a papa keŋ. Kiŋolik nai Tobit lokoku keŋ ka totunakin iŋes,

¹⁴kikalou tema neni a Tobias, “Ekete ayoŋ iyoŋ lokoku kaŋ, irae iyoŋ akica a ŋakonyen kaŋ.” Tema nai nabo Tobit, “kipuroe Akuj ka kipuroe ekiro keŋ ŋolo ka apolou nooi, kipuroe daŋ ŋimalaikan keŋ ŋulu asegak. Elipi kipuroe ekiro keŋ ŋolo asegan ananyameta a daadaŋ

¹⁵Tari kekesecanit iŋes ayoŋ, ekesyon tokona iŋes ayoŋ. Ete tokona ayoŋ lokoku kaŋ Tobias!” Aŋun, abu Tobit toloma tooma ere keŋ elelyani ka ipuro Akuj iworoe nooi. Abu nai Tobias tolimok papa keŋ atemar ajok alosit keŋ, tolimok daŋ atemar abu iŋes yau ŋisiliŋa ka atemar abu iŋes kiit Sara nakoku a Raguel ka atemar ebunit Sara alokaku ka aapuu nooi lopuke a Ninepe.

¹⁶Abu nai Tobit tolot elelyani ka ipuro Akuj akisiryam nateran keŋ alopuke a Ninepe. Ani iŋolikinete ŋituŋa a Ninepe iŋes ebunit elosi ejok ka emam ituŋanan erikit, apotu toumokis.

¹⁷Abu Tobit tolimo alokiŋaren kec daadaŋ atemar abu Akuj kisyoni iŋes ka etekyenyu ŋakonyen keŋ nabo. Ani iryamasi Tobit ka Sara, aberu a Tobias alokoku keŋ, abu kiterereŋ Sara ebala, “Tolomu, nakoku, alakara abunore. Kipuroe Akuj kon nakoku ŋina ikiyau iyoŋ neni kosi. Erereŋ papa kon ka toto kon, erereŋ lokoku kaŋ Tobias ka irereŋ iyoŋ nakoku. Tolomu tokona lore kon, ikijaunitae iyoŋ ka arereŋu ka alelyanu. Tolomu, nakoku.” Aŋun, akoloŋit ŋin, abu alelyanu toyakaun neni a Ŋiyudayan daadaŋ a ŋulu eboiyete alo Ninepe.

¹⁸Ayakasi Aikar ka locen keŋ Nadab alelyanete kaapei ka Tobit. Apotu ikes alotooma alelyanu kinumunuma ŋasuban ŋun ke ekiitanu a Tobias ŋirwa ŋikanikaarei, ido apotu ŋituŋa inakis Tobias ŋainakineta ŋuna alalak.