Read ngakarimojong Tob 12 Bible Online

Tob 12 - ngakarimojong bible

Tob 12

¹Ani edaun ŋasuban ŋuna a ekiitanu. Tonyara Tobit lokoku keŋ Tobias tema, “Lokoku kaŋ, toanyu, inak ekile ŋolo abu torukosi ka iyoŋ etacit keŋ, inak daŋ iŋes akitalakaret.”

²Kiŋit Tobias papa keŋ tema, “Papa, ŋisiliŋa ŋiyai emaikina ayoŋ otac iŋes? Nyerono ainakin iŋes atutubet apei a ŋiboro a ŋulu aponi ayoŋ ka iŋes yaunae,

³anerae ekenyaku iŋes ayoŋ neni kon emam ŋace, abu kitaŋaleu aberu kaŋ, abu yau kaapei ka ayoŋ ŋisiliŋa ka ikitaŋaleu iŋes iyoŋ. Ŋisiliŋa ŋiyai emaikina ayoŋ eyatak ikwapei akitalakaret keŋ?”

⁴Tema Tobit, “Lokoku kaŋ, emaikina iŋes toryamu atutubet apei a ŋiboro a daadaŋ a ŋulu abu iŋes yau.”

⁵Aŋun, abu Tobias tonyarau Rapael tema, “Ya ikwapei etacit kon atutubet apei a ŋiboro a daadaŋ a ŋulu ibu iyoŋ yau, ido torotok emam ŋace.”

⁶Tonyarau nai Rapael Tobit ka Tobias pa eyenete ŋituŋa, tolimok ikes tema, “Kipuro Akuj ka tocamutu iŋes alokiŋaren ŋisubuna daadaŋ ŋulu eyarete a ŋuna a ŋakiro a ŋuna ajokak a ŋuna etiya iŋes neni kus. Kipuro ka toeoto ŋieosyo alokiro keŋ. Anakitopoloorit a ŋina iyookino, emaikina ŋituŋa daadaŋ tolimosi ŋiticisyo ka Akuj ŋulu ajokak. Nyididioto acamun iŋes.

⁷Ejok akililiŋiar ŋakiro a erwosit ŋuna imunono, nai emaikina tocamunae ka kisileereunoe ŋiticisyo ka Akuj ka emaikina tocamunae iŋes anakitopoloorit a ŋina iyookino aŋuna keŋ. Kitiyata ajokis, ido nyikidolokini iyes aronis.

⁸Ejok akilip ka akiredanakin akiron, nai akilo ŋun ŋaarei, ejok akiŋaranakin ŋituŋa anakiyookino. Ejok ayakar ibore ŋini edit alotooma akiyookino akilo ebari toyai tooma akitiya ŋuna aronok. Ejok akiŋaranakin ŋituŋa akilo akidiat egolid,

⁹anerae eiuni akiŋaranakin ŋituŋa ituŋanan anatwanare ka elemari ŋasecisya daadaŋ. Ŋulu iŋaranakinete ŋituŋa eyarete analelyanu a akiyar kec a daadaŋ,

¹⁰nai ŋulu eseceneneete ka ŋulu itiyaete aronis erae ŋimoe ŋulu aronok nooi a akiyar kec a ŋilopeyek.”

¹¹Torubak Rapael irworo neni a Tobit ka Tobias tema, “Tokona, akalimokini ayoŋ iyes ŋakiro daadaŋ ŋuna a kire ka nyekemunoni ayoŋ iyes ŋakiro ŋadi. Adau sek ayoŋ alimokin iyes apaki ŋina alimunitor ayoŋ ebe, ‘Ejok akililiŋiyar ŋakiro a erwosit ŋuna imunono, nai emaikina kisileereunoe ŋiticisyo ka Akuj anakitopoloorit a ŋina iyookino.’

¹²Aŋun, apaki ŋina ilipyata iyoŋ Tobit ka Sara, arae ayoŋ abu oyau ka osyom ŋakiro ŋuna ilipasi iyes alokiŋaren akica ŋina ke Ekapolon ka daŋ apaki daadaŋ ŋina inukya iyoŋ ŋikatwak

¹³ka apaki ŋina ibunio iyoŋ nyidid anyoun, kimyek akimuj kon tolot akinuk ituŋanan,

¹⁴ekeyakuunitae ayoŋ neni kon akikatakin iyoŋ. Ŋinapei paki, ekeyakuunit ayoŋ Akuj akitaŋaleun iyoŋ ka Sara nateran kon.

¹⁵Arae ayoŋ Rapael, epei a ŋimalaikan a ŋulukanikaarei a ŋulu ewuasi etenito ka elomanarete nakica ŋina ke Ekapolon.”

¹⁶Apotu ŋuluarei ŋul tomaranikis, topero alokwap ebuburiyara, anerae abulit ikes.

¹⁷Abu nai Rapael tema neni kec, “Nyikibul, toyai ekisil neni kus. Kipuroe Akuj ŋikaru ka ŋikaru.

¹⁸Ani eruwor ayoŋ, apaki ŋina ikirukitor ayoŋ ka iyes, pa etiyae ayoŋ aŋuna ka acamit kaŋ, nai aŋuna ka acamit a Akuj. Kipuro iŋes a ŋinakoloŋit, toeoto ŋikipurisyo keŋ.

¹⁹Tari ŋina ikiteoto iyes ayoŋ, kire nyimuja, kori nyemata ayoŋ idiobore nai iteete iyes etorube bon.

²⁰Aŋun tokona, tonyoutu alokwap, ido kiut Akuj. Kiŋolikisi alosi ayoŋ kidiama neni a ŋini ekeyakuunit ayoŋ. Kigira ŋakiru nu daadaŋ ŋuna iŋolikis iyes.” Abu nai Rapael tolot kidiama.

²¹Apotu nai Tobit ka Tobias tonyout, ido nyiŋolikis nabo jik Rapael.

²²Torubakis ikes ipurosi Akuj ka eeosi ŋikipurisyo keŋ, ido apotu kiiut Akuj aŋuna a ŋiticisyo keŋ a ŋulu ka aumokin a ŋulu ka apaki a ŋina atakanunia emalaika ŋolo ka Akuj neni kec.