Read ngakarimojong Tob 2 Bible Online

Tob 2 - ngakarimojong bible

Tob 2

¹Apaki ŋina epukator Esaradon, abu ayoŋ oboŋu lore, ido aponi ekenyakakin ayoŋ aberu kaŋ Ana ka lokoku kaŋ Tobias. Ŋirwa ŋulu a ŋasuban kosi aŋuna a ŋirwa a ŋatomonikan, ikes ŋasuban a etal ŋuna a ŋisabito, aponi kitemokinoe aŋuna kaŋ akimuj ŋina ajokan, nai abu ayoŋ owou akimuj.

²Ani kedaun akitemokin akimuj aŋuna kaŋ, ido kiwuakinae akimuj ŋina alalan kiŋaren kaŋ, abu ayoŋ olimok lokoku kaŋ Tobias otema, “Lokoku kaŋ, tolot yau ituŋanan daadaŋ ŋini a ŋican ŋini iryamuni iyoŋ erae ipei a ŋituŋa yok a ŋulu erikunitoe Ninepe, ŋini etamunit a etau keŋ a daadaŋ Akuj, ido ikimuji ayoŋ ka iŋes. Ekedaruni ayoŋ iyoŋ, tari ŋina iboŋunio iyoŋ.”

³Aŋun, abu Tobias tolot akiwarit ituŋanan idio ŋini a ŋican ipei a ŋituŋa kosi. Ani eboŋuni iŋes, abu tema, “Papa.” Oboŋok ayoŋ otema, “Lokoku kaŋ ayoŋ lo!” Torubak iŋes irworo tema, “Papa, topupok, keari ituŋanan ipei a ŋituŋa yok, ido ecakakinitae akuwan keŋ nalapatu ŋina ke emaket, eperi tokona iŋes a nen emyeded.”

⁴Abu nai ayoŋ oporu, emyek akimuj nyiira daŋ, olot olema akuwan a ituŋanan a ŋin analapatu ewuak nagule apei akitodol ŋina adoiyorya akoloŋ, apaki ŋina apedorya ayoŋ akinuk iŋes.

⁵Ani aboŋori ayoŋ, abu eloŋar, ido emuj akimuj kaŋ eyaloloŋi.

⁶Abu nai ayoŋ otamu ŋakiro ŋuna adwarit Amos, ŋakiro ŋuna alimunit iŋes itoroniyarit Besel ebala, “Ituruworyo ŋasuban kus ŋuna ka akiyaloloŋ ka eruworosi ŋieosyo kus daadaŋ ŋulu ka akiwolol.” Abu nai ayoŋ egwor.

⁷Ani kedau akoloŋ adoiyor, abu ayoŋ olot oboka akipany, ido onukak ituŋanan ŋin.

⁸Apotu ŋikidunyet kaŋ okokyanatar ayoŋ temasi, “Nyeriŋa iŋes ekuryana a? Ewaritae sek iŋes ikotere earyo aŋuna ka akitiya ŋakiro ŋun, ido abu iŋes toem nariet; nai iŋes lo, enuki nabo ŋikatwak!

⁹Akoloŋit ŋinapei ŋin nakwaare, abu ayoŋ eloŋar, olot lokal nalapatu a ekal kaŋ, ojotoor alodiyete arwatata a alapatu a ekal kaŋ, ido pa emukorit ayoŋ ereet kaŋ aŋuna ka amwanis.

¹⁰Pa ayeni ayoŋ atemar keyakasi ŋikaporokokoe kidiama arwatata; apotu ŋacin kec ŋuna ariŋa emwaka todoto nakonyen kaŋ, kitolomut anakonyen kaŋ ŋikadeidei ŋulu akwaŋak. Abu ayoŋ olot lomurok aŋuna ka akitaŋaleuno, nai ŋinapaki daadaŋ iwuakiniata ikes ŋikito kec nakonyen kaŋ, kiyatakin ŋikadeidei ŋulu akwaŋak ŋul ka amuumu akitodol ŋina amudukania ayoŋ jik. Abu ayoŋ nyapedo akitere akwap ŋikaru ŋiomwon. Apotu ŋiyeneta kaŋ daadaŋ kiyaloloŋo aŋuna kaŋ, ido abu Aikar ekeyok ayoŋ ŋikaru ŋiarei eriŋa iŋes nyeloto Elimais.”

¹¹Apaki daŋ ŋin, etiyaununui aberu kaŋ Ana ŋisiliŋa itiyae ŋiticisyo a ŋaberu a ŋunace.

¹²Eyakiyanari iŋes ibore ŋini itiyauni neni a ŋalopeyek, ido ataceneneete ŋaberu ŋun iŋes. Akoloŋit apei ŋirwa ke elap ŋikanikaarei elap ŋolo a Disitirus, apaki ŋina atubunio aberu kaŋ elou ŋolo sek esonyi iŋes, ido kinyaka neni a ŋalopeyek, apotu ŋituŋa ŋul totacakis iŋes ŋisiliŋa a etic keŋ daadaŋ ka inakis daŋ ikale ŋinimeot aŋuna ka akimuj keŋ.

¹³Ani eboŋuni iŋes neni kaŋ, kisyak ikale arwore, abu ayoŋ onyara iŋes eŋit otema, “Ai iryamunia iyoŋ imeot en? Ayeni ayoŋ atemar nyikokounit iyoŋ iŋes, meere a? Kinyaka neni a ŋalopeyek, anerae nyemaikina iwon onyama idiobore ŋini ekokounitae.”

¹⁴Nai abu iŋes okolimok ayoŋ tema, “Akainakinio ayoŋ erae ainakinet kaapei ka etacit aŋuna ke etic kaŋ.” Nai abu ayoŋ nyanup ŋakiro keŋ, ido abu olimok iŋes akinyakar ikale ŋin neni a ŋalopeyek. Abu ayoŋ oŋoik iŋes nooi aŋuna a ŋakiro a ŋun. Ekeŋit nai iŋes ayoŋ tema, “Nyaalu ŋiticisyo kon ŋulu ka amina? Nyaalu ŋiticisyo kon ŋulu ka akiyookino? Eyenio atemar itiyaenene iyoŋ ŋiticisyo ŋul!”