Read ngakarimojong Tob 3 Bible Online

Tob 3 - ngakarimojong bible

Tob 3

¹Abu nai ayoŋ ka aryeba ka akiyaloloŋ ŋina apolon alotau kaŋ egwor, ido alotooma aumen, abu ogeik akilip abala,

²“Okoe Ekapolon, iyookino iyoŋ ka iyookino ŋiticisyo kon daadaŋ; erae ŋirotin kon daadaŋ akisyon ka ŋulu a kire. Itubi iyoŋ ŋakiro a akwap.

³Okoe Ekapolon, totamunae tokona ayoŋ kitiya ŋuna ajokak neni kaŋ. Nyikisican ayoŋ aŋuna a ŋasecisya kaŋ ka aŋuna ka asecit kaŋ a ŋina ka abaŋao ka aŋuna ka asecit a ŋina apotu atapapaa kaŋ kitiyata alokiŋaren kon,

⁴toŋero akiwuap ŋakiciketa kon. Aŋun ibu iyoŋ ikimyek isua ikiŋataryo, ikirikoryo ka ikiaryo, ikotere oruworosi ŋulu ikirworore, ikiswomatar ŋituŋa ka ŋulu ikijamuwaritae, alotuŋa a ŋakwapin a daadaŋ aŋuna ibu iyoŋ ikiela isua.

⁵Eyookin tokona ŋatubokineta kon ŋuna alalak aŋuna ikisicania iyoŋ ayoŋ aŋuna a ŋasecisya kaŋ; anerae nyiwuapa isua ŋakiciketa kon ka nyeyara isua alokiŋaren kon iwuapitae ŋuna a kire.

⁶Aŋun, kitiya tokona neni kaŋ lopite ŋolo icamitor iyoŋ, tolimok etau kaŋ tolemarae aneni kaŋ, ikotere akalemaryo ayoŋ anakwap oruwor apuwa. Ejok aneni kaŋ atwanare akilo akiyar, anerae eira ayoŋ ŋiyany ŋulu pa amaikina ayoŋ oryamu, ido epol nooi akiyaloloŋ kaŋ. Okoe Ekapolon, tolimu ikotere ojoŋo ayoŋ aryamunit aryeba na; kimyekinae ayoŋ olot lore ŋolo a ŋikaru ka ŋikaru; okoe Ekapolon nyiwua ereet kon aneni kaŋ; anerae ejok aneni kaŋ atwanare akilo akidaŋidaŋ ŋican ŋulu alalak lu anakiyar kaŋ ka opupi ŋiyany.”

⁷Akoloŋit ŋinapei ŋin, aneni anyaritae Ekibatana alo Media, aponi Sara daŋ nakoku a Raguel kisiburae, arae aketiyan a papa keŋ apei abu kisibura iŋes,

⁸anerae kepotu ŋikilyok ŋikanikaarei kiita iŋes, ido kebu ekipye ŋolo anyaritae Asimodeus toar ŋikilyok ŋul daadaŋ a ŋipeipei eriŋa nyeruko ka Sara. Aŋun, abu aketiyan a papa keŋ tolimok Sara tema, “Iyoŋ iyarenene ŋikilyok kon! Topupok, adaut ŋikilyok ŋikanikaarei akiit iyoŋ ka mam ikoku idou iyoŋ ŋini alimokin ekiro a epei daŋ.

⁹Kaanukiro ikidicia iyoŋ isua aŋuna ka atwanare a ŋikilyok kon? Torukosi ka ikes! Elipi nyikiŋolik isua ikoku kon idio ŋinisapat, kori ŋinipese!”

¹⁰Akoloŋit ŋin abu Sara kiyaloloŋ alotau keŋ, ido kigwor. Ani kedau iŋes alosit nagule a papa keŋ ŋina alokidiama akai, abu kiredak amyedakin. Nai abu iŋes totamatama ŋakiro ŋun tema, “Nyacamit ayoŋ kirworotor ikes papa kaŋ ebasi, ‘Iyakar sek iyoŋ nakoku kon apei ŋinaminat, nai abu iŋes tomyedakin aŋuna ka akiyaloloŋ keŋ.’ Einakinete ŋakiro nu papa kaŋ anamojoŋu keŋ akiyaloloŋiyor totwana. Nyejok ayoŋ amyedakin, nai ejok ayoŋ akilip Ekapolon ikotere ayoŋ otwana, ojoŋo jik akipup ŋiyany lu.”

¹¹Apaki ŋinapei ŋin, elipi Sara ikyaarit ŋakan keŋ lowae ŋolo ke edirisa ebala, “Ikipuroi iyoŋ Akuj ŋina esyonon! Kipuroe ekiro kon ŋikaru ka ŋikaru; emaikina ŋiticisyo kon ikipuro iyoŋ ŋikaru ka ŋikaru.

¹²Ekapolon, tokona eteunit ayoŋ neni kon ka ereunit ŋakonyen kaŋ neni kon.

¹³Tolimu ikotere akalemaryo ayoŋ anakwap ojoŋo akipup ŋiyany lu jik.

¹⁴Okoe Ekapolon, iyeni iyoŋ atemar mam aronis etiyat ayoŋ ka nyeloma ka ekile edio,

¹⁵iyeni daŋ iyoŋ atemar nyemunaara ayoŋ ekiro kaŋ, kori ekiro a papa kaŋ anakwap a ŋina aponi okorikun ayoŋ a na. Ayoŋ bon arae ikoku a papa kaŋ; emamukar iŋes ikoku ice ŋini eruwor ikedoŋon nakou keŋ ka emamukar iŋes iyenet, kori idio a ateker keŋ ŋini apedori ayoŋ acamun oruwor aberu keŋ. Adaut ŋikilyok kaŋ ŋikanikaarei atwakare. Kaanukiro arubakinitor ayoŋ ayari? Nai okoe Ekapolon, ani pa kejok aneni kon alemar akiyar kaŋ, topupokinae ayoŋ anajamuwaro kaŋ.”

¹⁶Apaki ŋinapei ŋin, kiira Akuj ŋakilipasinei a Tobit ka Sara anakibois keŋ a ŋina ka apolou.

¹⁷Aŋun, aponi kiyakiyarae Rapael akitaŋaleun ikes daadaŋ ŋiarei. Kitaŋaleunoe Tobit tolemarae ŋikadeidei ŋulu akwaŋak anakonyen keŋ, ikotere iŋes iŋolikini akica a Akuj a ŋakonyen keŋ, ido kitaŋaleunoe Sara nakoku a Raguel, anainakin iŋes kiit Tobias lokoku a Tobit ka analacakin iŋes aneni ke ekipye a ŋolo anyaritae Asimodeus, anerae Tobias iŋes ekile ŋolo amaikina kiit iŋes eriŋa ŋikilyok ŋuluce daadaŋ ŋulu acamito akiit iŋes. Apaki ŋinapei, abu Tobit toboŋu analapatu kai keŋ, bu Sara daŋ nakoku a Raguel anagule a ŋina alokidiama.