Read ngakarimojong Tob 4 Bible Online

Tob 4 - ngakarimojong bible

Tob 4

¹Akoloŋit ŋinapei ŋin, totamu Tobit ŋisiliŋa ŋulu emyekinit iŋes aneni a Gabael alo Rages anakwap a Media.

²Abu nai iŋes totamu alotau keŋ bon tema, “Adau ayoŋ akiŋit Akuj otwana, kaanukiro ŋanyaraunia ayoŋ lokoku kaŋ Tobias, olimok iŋes ŋakiro a ŋisiliŋa a ŋul eriŋa ayoŋ nyetwana?”

³Abu nai Tobit tonyara lokoku keŋ Tobias, ani ebuni, tolimok tema, “Lokoku kaŋ, ani atwani ayoŋ tonukae ayoŋ ejok, lopite ŋolo iyookino. Kitopoloorite toto kon ka nyimyek iŋes ŋirwa daadaŋ ŋulu ka akiyar kon. Kitiya ŋuna daadaŋ italakarito iŋes ka nyiinak iŋes kiyaloloŋ a ŋakiro a ŋadi.

⁴Lokoku kaŋ, totamunite toto kon, anerae abu iŋes todaŋ ŋican ŋulu alalak aŋuna kon apaki ŋina iriŋakar iyoŋ iyai nakook keŋ. Tosodi, ani etwani iŋes, emaikina iyoŋ tonukak iŋes diyete kaŋ, nakipany apei.

⁵“Lokoku kaŋ, kitopoloorite Ekapolon ŋirwa daadaŋ ŋulu akiyar kon, toŋer akisec ka toŋer akibil ŋakiciketa keŋ. Kiboi anakiyookino ŋirwa daadaŋ ŋulu ka akiyar kon, nyiwuap akiyar ŋina itiyaere ŋuna nyiyookino,

⁶anerae ŋulu eyarete iwuapito ŋuna a kire, itiyaete ejok aloticisyo kec a daadaŋ. Inanak neni a daadaŋ a ŋulu itiyaete ŋuna iyookino

⁷ŋainakineta aloboro kon, ido nyikodo etau kidau ainakin ituŋanan akiŋarakinet. Nyiwua ereet kon aneni a ituŋanan a daadaŋ a ŋini ecanaana, ido nyiwuai Akuj daŋ ereet keŋ aneni kon.

⁸Ani kiyakar iyoŋ ŋiboro ŋulu alalak, inanak ŋainakineta alotyae a ŋolo a ŋiboro kon, ani kekudyoko ŋiboro kon nyikuryaniar ainakin ainakinet aloboro kon a ŋulu iyakar iyoŋ.

⁹“Aŋun, iŋadaari iyoŋ ebari aŋuna kon aŋuna a ŋirwa a ŋulu iyakar iyoŋ akiitanit;

¹⁰anerae ainanakin ŋuluce, ikilakuni anatwanare ka ikiyoki nyiloma nakiryonut.

¹¹Kire jik, erae ainanakin ŋainakineta aneni a ŋulu itiyaete ŋun ainakinet ŋina ajokan nooi alokiŋaren Akuj ŋina alokidiama nooi.

¹²“Lokoku kaŋ, tocoikinite akiryamanakin daadaŋ ka ŋapesur ŋuna esyaak jik, aberu aloletok atapapaa kon, nyiitu aberu ŋinagelaanot, ŋina nyerae ŋina a ekabila a papa kon, anerae ikirae iwon ŋiletok a ŋikadwarak, lokoku kaŋ, totamunite atemar apotu atapapaa yok ŋulu akoloŋ Noa, Aburaam, Isaka ka Yakob kiitunut ŋaberu aneni a ŋiyeneta kec. Aponi kiterereŋoe ikes alodwe kec, ido eruwor akwap kec ŋina a ŋiletok kec.

¹³Aŋun tokona, lokoku kaŋ, tomina ŋiyeneta kon ka nyijamuwa alotau kon ŋiyeneta kon ikes ŋidwe ŋulusapa ka ŋulupesur ŋulu a ŋituŋa kon, aŋuna iwounia aryamun aberu aneni kec, anerae ituŋanan ŋini ituro inyasun ka emunaar nooi. Nabo, ituŋanan ŋini nyitiyae, mam ibore eryamuni ka ekulyakaniar jik, anerae erae naŋerit akitiya ebunio eron.

¹⁴“Nyiŋadaiya akitodol akoloŋit ŋinace etacit a ŋulu itiyaete neni kon, nai totac ikes atipei. Ani kitiyanak iyoŋ Akuj, iryamuni etacit. Lokoku kaŋ, tocoikinite alotooma ibore daadaŋ ŋini itiyae iyoŋ, kiwuap ŋipitesyo daadaŋ ŋulu ajokak.

¹⁵Ibore ŋini iŋerit iyoŋ, nyitiya daŋ ŋun neni a ituŋanan a idio. Nyimat epiini ŋolo alalan, kori nyiruwor ekameran.

¹⁶Inak akimuj kon ace neni a ŋulu enyamit akoro ka inak ŋilowi kon ŋice neni a ŋulu emam ŋilowi enapito. Ŋiboro kon daadaŋ ŋulu nyiitanit iyoŋ, inak erae ŋainakineta neni a ŋulucetuŋa, ido nyikodo etau kon kidau akipotor ainakinet.

¹⁷Kiwuak amugati kon nalyal a ituŋanan a ŋini iyookino, nai nyiinak adio neni a ŋikasecak.

¹⁸Kiwar ŋakiro ŋuna ajokak aneni a ituŋanan a ŋini aoson ka nyijamuwa ŋakiro ŋuna ka aosou ŋuna ikilimokini ituŋanan.

¹⁹Kipur Ekapolon ŋapakio daadaŋ, kilip iŋes ikotere eruwor ŋipitesyo kon ŋulu iyookino ka ikotere iyookinotor ŋiticisyo kon daadaŋ ka ŋakiro ŋuna iye iyoŋ akitiya, anerae emam ŋituŋa ka akwap ka adio ŋulu eyakatar ayenut, nai Ekapolon elope iŋes elimokini ikes ŋakiro ŋuna iyookino akitiya, nai keseu Ekapolon ŋace, imasari iŋes ituŋanan nakibois a ŋikatwak. Aŋun, lokoku kaŋ, totamunite ŋakiciketa ŋun, nyimyek ikes eŋopiyarete alotau kon.”

²⁰“Lokoku kaŋ, ekesileerekini tokona ayoŋ iyoŋ atemar abu ayoŋ emyek aneni a Gabael a lokoku a Gabrias alo Rages anakwap a Media ŋatalantae a esilipa ŋatomon.

²¹Lokoku kaŋ, nyikuryaniar, anerae aruworoi iwon ŋikulyakanotin. Iyakar iyoŋ ebari ŋolo alalan erae kitopoloorit iyoŋ Akuj ka kiŋerit asecit, ido kitiyae ŋuna ajokak alokiŋaren Ekapolon Akuj kon.”