Read ngakarimojong Tob 5 Bible Online

Tob 5 - ngakarimojong bible

Tob 5

¹Abu nai Tobias tolimok papa keŋ Tobit tema, “Papa, etiyae ayoŋ ŋakiro daadaŋ ŋuna ikilimok iyoŋ ayoŋ,

²nai alipite aryamunia ayoŋ ŋisiliŋa aneni a Gabael, ikwapei nyakayenia iŋes ayoŋ ka nyayeni ayoŋ iŋes? Ani kitoodikinet aai ayoŋ neni keŋ ŋina emaikina ayoŋ oina iŋes ikotere epedori iŋes akiyen ayoŋ, ido ekekinyom, okoinak ŋisiliŋa? Nabo daŋ, nyayeni ayoŋ ŋirotin ŋulu elosere Media, kori epite ŋolodoliet inaa.”

³Toboŋok nai Tobit Tobias lokoku keŋ tema, “Abu iŋes okoinak ayoŋ akikoŋiet keŋ, ido abu ayoŋ daŋ oinak iŋes ŋina kaŋ. Abu ayoŋ otyak akikoŋiet keŋ ŋarwa ŋaarei, abu isua ŋinituŋanan ya atutubet keŋ, ido abu ayoŋ ewuak atutubet apei neni aya ŋisiliŋa. Alunyarosi tokona ŋikaru ŋatomoniarei ameun akoloŋit ŋina ecikakinia ayoŋ ŋisiliŋa ŋul neni a Gabael. Aŋun tokona, lokoku kaŋ, toryamu aŋuna kon ituŋanan ŋini ikinyoma torukosi ka iyoŋ, ido etacio iwon iŋes akitodol apaki ŋina iboŋunio iyoŋ. Nai kijau ŋisiliŋa aneni a Gabael.”

⁴Aŋun, abu Tobias tolot kiŋa akiwarun ituŋanan ŋini erukoryata iŋes nakwap a Media, ituŋanan ŋini eyeni erot. Tolot iŋes kiŋa toryamu emalaika Rapael ewoi alokiŋaren keŋ, nai abu iŋes nyeyen atemar arae emalaika ŋolo ka Akuj.

⁵Kiŋit Tobias iŋes tema, “Esorokit, ai ibunitor iyoŋ?” Toboŋok Rapael iŋes tema, “Abunit ayoŋ aneni a ŋiyeneta kon, a Ŋisirael, ido abunit ayoŋ ne akitiya.” Kiŋit nai Tobias iŋes tema, “Iyeni iyoŋ erot ŋolo elosere Media a?” Toboŋok Rapael tema,

⁶“Ee, ayeni; alosit ayoŋ inaa ŋarwa ŋuna alalak, ayeni ayoŋ erot ŋolo elosi Media ka ayeni ŋirotin daadaŋ ŋulu elosere inaa. Ŋarwa ŋuna alalak alosit ayoŋ Media ka eboiyenene aneni a eyenet kosi Gabael ŋolo iboi alo Rages anakwap a Media. Eai ituŋanan ŋirwa ŋiarei alosit alo Ekibatana tari Rages, anerae eyai Rages nakibois ŋina a ŋimoru, toyai Ekibatana kidiŋ adipo a ŋimoru.”

⁷Tema nai Tobias neni a Rapael, “Esorokit, kidarunae ayoŋ, olot mono ayoŋ tooma lore olimok papa kaŋ, anerae kire ekeitanit ayoŋ iyoŋ orukosi ka ayoŋ, ido akataci ayoŋ iyoŋ.”

⁸Tolimok Rapael iŋes tema, “Ejok, ekedaruni ayoŋ iyoŋ, nai nyiŋel apaki ŋina aoyan.”

⁹Aŋun, abu Tobias tolot tolimok papa keŋ Tobit tema, “Apakinapeina, aryamu ayoŋ ekile ŋolo erae Esiraelit, eyenet yok pei.” Tolimu Tobit tema, “Lokoku kaŋ, tonyarau iŋes tooma, ikotere ayoŋ oyenu ŋituŋa a ekal keŋ ka ekabila keŋ ka oyenu kerae iŋes ituŋanan ŋini ikinyoma aŋuna ka arukor ka iyoŋ.”

¹⁰Abu nai Tobias tolot kiŋa, tonyarau ekile ŋol tema, “Esorokit, ikinyarit iyoŋ papa kaŋ.” Abu nai ekile ŋol tolot tooma, kisyau Tobit akimal iŋes. Toboŋok ekile ŋol emalas a Tobit tema, “Toyai neni kon emalas ŋolo ka alelyanu.” Nai toboŋok Tobit tema, “Anilelyanu eriŋa eyai aŋuna kaŋ? Arae ayoŋ ituŋanan ŋini nyete akwap, nyete ayoŋ akica ŋina anakuj, nai aperi ayoŋ anakiryonut ikwa ŋikatwak ŋulu nyeriŋa iteete akica. Tari keriŋa ayoŋ ayari, arae ayoŋ epei a ŋikatwak; apupi ayoŋ ŋituŋa, nai nyete ikes.” Nai toboŋok esorokit ŋol Tobit tema, “Tomukyaniar; eapi apaki ŋina ikitaŋaleunio iyoŋ Akuj, tomukyaniar.” Tolimok nai Tobit iŋes tema, “Ecamit lokoku kaŋ Tobias alosit Media. Ipedori iyoŋ arukor ka iŋes ka akitenar iŋes a? Lokaato, akataci ayoŋ iyoŋ.” Toboŋok esorokit tema, “Apedori ayoŋ alosit ka iŋes, ayeni ayoŋ ŋirotin daadaŋ, anerae alosenene ayoŋ Media ŋirwa ŋulu alalak ka atubonor ayoŋ anadipoe a Media a daadaŋ, ayenikinit ayoŋ ŋimoru a Media daadaŋ ka ŋirotin keŋ daadaŋ.”

¹¹Kiŋit nai Tobit Rapael tema, “Lokaato, lokal a ŋae ibunitor iyoŋ ka lokabila ali? Lokaato, tolimokinae ayoŋ.”

¹²Toboŋok Rapael tema, “Kaanukiro icamitor iyoŋ ayenun ekabila kaŋ?” Toboŋok Tobit tema, “Lokaato, acamit ayoŋ oyenu kire atemar lokoku a ŋae iyoŋ ka ŋae ekiro kon.”

¹³Toboŋok Rapael Tobit tema, “Arae ayoŋ Asaria lokoku ka Anania a ŋolo apolon, epei a ŋiyeneta kon.”

¹⁴Tolimok nai Tobit iŋes tema, “Alakara abunore kon, lokaato, elipi ikiu iyoŋ Akuj. Lokaato nyiŋo neni kaŋ, anerae acamit sek ayoŋ ayenun kire atapapaa kon. Eleereu jik aneni kaŋ atemar irae iyoŋ eyenet, irae iyoŋ lopapait a ŋituŋa a ŋulu ajokak ka a ŋulu ka apolou, anerae ayeni paaran ayoŋ Anania ka Nasan ŋidwe a Semelia ŋulusapa ŋuluarei, ido alosenene ayoŋ kaapei ka ikes Yerusalem ka elipenene ayoŋ kaapei ka ikes aina ka aponi nyimyekin anupit Akuj. Erae ŋiyeneta kon ŋituŋa ŋulu ajokak, ibunit iyoŋ alotuŋa a ŋulu ajokak, Ekejaunit ayoŋ iyoŋ a etau kaŋ!”

¹⁵Tolimok nabo Tobit Rapael tema, “Akataci ayoŋ iyoŋ esiliŋ epei a ŋinakoloŋit kaapei ŋisiliŋa ŋulu isitiyaete iyoŋ ka lokoku kaŋ. Aŋun torukosi ka lokoku kaŋ,

¹⁶ido eatakini ayoŋ ibore ice lotacit kon.” Tema Rapael, “Ikirukori ayoŋ ka iŋes, aŋun nyikuryan. Erotokinio isua ejokak ŋawat kosi, ido eboŋunio isua ejokak ŋawat kosi, anerae emam ŋace eya lorot.”

¹⁷Aŋun, tema Tobit neni a Rapael, “Lokaato, elipi toryamu iyoŋ ŋarereŋisyo.” Tonyara nai Tobit lokoku keŋ, tolimok iŋes tema, “Lokoku, kitemonok akimuj ŋina iitana aŋuna ke erot, ido toloto ka lokaato kon. Elipi Akuj ŋina anakuj ikiyok iyes todolo ama emam ŋace ka toboŋut neni kaŋ ejokak ŋawat, lokoku elipi toruko iyes ŋiarei ka emalaika a Akuj, ikotere toloto emam ŋace.” Ani eriŋa Tobias nyegeuna alosit, abu tonu papa keŋ ka toto keŋ. Tema nai Tobit neni keŋ, “Ape ejok emam ŋace.”

¹⁸Nai abu toto keŋ a Tobias togeik akigworo, ido tolimok Tobit tema, “Kaanukiro iyakiyarya iyoŋ lokoku kaŋ nariet? Meere mono iŋes ikiyoki iwon apaki ŋina ebunio lore ka ŋina elomarya alore a?

¹⁹Nyituk ŋisiliŋa kidiama losiliŋa, nai kimyek ŋisiliŋa ŋul toruwor ŋulu elakunor lokoku yok;

²⁰anerae itemokino aŋuna yok akiyar ŋina ikiinit Ekapolon iwon.”

²¹Tolimok Tobit aberu keŋ tema, “Nyipod, elosi lokoku yok ejok akuwan keŋ ka eboŋuni neni yok ejok akuwan keŋ. Iŋolikini iyoŋ iŋes akoloŋit ŋina eboŋunio neni kon ejok akuwan. Nyilimu ŋakiro ŋace! Nakaato, nyikuryan aŋuna kec,

²²anerae erukete iŋes ka emalaika ŋolo ajokan, edoli iŋes ejok ka eboŋuni ejok akuwan keŋ.”