Read ngakarimojong Yudis 1 Bible Online

Yudis 1 - ngakarimojong bible

Yudis 1

¹Alokaru a ŋolo a ŋatomoniarei ipukat Nebukadinesar ŋituŋa ŋulu ka Asiriya alotaun a ŋolo apolon nooi a ŋolo a Ninepe, ŋirwa ŋul, epukat Aripasad ŋituŋa ŋulu a Media alo Ekibatana.

²Abu Aripasad toduk ŋarwatatain kisiryam etaun Ekibatana, abu iŋes toduk ŋarwatatain ŋun a ŋamoru a ŋuna ecietae, arae aburis a ŋamoru a ŋun emita ka atutubet ka arae aoyau kec ŋimitae ŋiuni, todukok Aripasad arwatata ŋina arae aoyau keŋ alokwap tari kidiama ŋamitae ŋatomonikanikaarei ka arae aburis a arwatata ŋamitae ŋatomoniarei ka ŋikan.

³Abu Aripasad todukok lopukei a ŋarwatatain a ŋun ŋaduketa ŋuna aoyak ŋuna erae aoyau alokwap tari kidiama ŋimitae ŋatomonikan ka arae alalau anakisyakinet ŋimitae ŋatomoniuni.

⁴Todukok ŋipukei ŋulu arae aoyau kec alokwap tari kidiama ŋimitae ŋatomoniuni kanikaarei arae aoyau kec alosye ke epei ka ŋolo iteor ŋimitae ŋatomoniomwon topedoryata ŋasigarya keŋ alomar kiŋa elalak ka topedoryata ŋasigarya ŋuna elosete a ŋakejen alomar ŋilaino kec.

⁵Abu nai erwosit Nebukadinesar kitiji erwosit Aripasad anadipo a ŋina aloloman a ŋina ayai lokukorin a Ragau.

⁶Ariito ka iŋes ŋituŋa daadaŋ ŋulu ka akwap a ŋikamukumukui ka ŋituŋa daadaŋ ŋulu eboiyete alodiyete aŋolol Eupurate, aŋolol Tigris ka aŋolol Yidasipes, anadipo ka Arioc erwosit a Ŋieliyemeani. Aŋun apotu ŋituŋa a ŋakwapin aŋuna alalak kimorikinos ka ŋasigarya a Ŋibabiloniyae.

⁷Abu nai Nebukadinesar erwosit a ŋituŋa a ŋulu ka Asiriya kiyakiya ŋituŋa neni a ŋituŋa a daadaŋ a ŋulu eboiyete alo Perisia ka daadaŋ ŋulu eboiyete alo To, ŋulu eboiyete alo Cilicia, Damasko, Lebanon ka Anti-Lebanon ka neni a daadaŋ a ŋulu eboiyete alodiyete anam

⁸ka neni a ŋituŋa a ŋakwapin a Karimel, a Gilead ŋina aneni ikyaara ka anadipo a ŋina apolon a ŋina ka Esidraelon

⁹ka neni a daadaŋ a ŋulu eboiyete alo Samaria ka ŋitaunio keŋ ka ekekwaye Yorodan akitodol Yerusalem ka Betani, Kelous, Kades ka aŋolol a Ijipit, Tapanes, Ramases ka akwap a Gosen daadaŋ

¹⁰akitodol tari yaye Tanis ka Mempis ka neni a daadaŋ a ŋulu eboiyete alo Ijipit akitodol lokukworin a Esiopia.

¹¹Nai apotu ŋituŋa daadaŋ ŋulu eboiyete anakwapin a ŋun a daadaŋ nyemitakis ŋakiro ŋuna alimokinit Nebukadinesar erwosit ka Asiriya ikes, ido apotu towout akimorikin ka iŋes alojie, anerae pa akuryanito ikes iŋes nai eteete ikes iŋes ikwa ituŋanan ipei bon. Aŋun, apotu ŋituŋa ŋul kitoboŋosi ŋituŋa ŋulu eyakuunit Nebukadinesar emam ibore etiŋito ka irumito ŋileec.

¹²Abu nai nebukadinesar toŋoik ŋituŋa a ŋakwapin a daadaŋ, kikoŋ elimit ekicoloŋ keŋ ŋolo ka apukan ka apukan keŋ atemar inyaŋari iŋes ŋakiro a ŋituŋa a Cilicia, Damasko ka Siria ka atemar eari daŋ a ekileŋ keŋ ŋituŋa ŋulu iboiyete alo Moab, Amon, Yudaya daadaŋ ka ŋituŋa daadaŋ anakwap a Ijipit akitodol tari lotuŋa ŋulu iboiyete alodiyete ŋanamyo ŋunaarei.

¹³Ani edoli ekaru ŋolo a ŋitomon ka ŋikanikaarei abu Nebukadinesar ya ŋasigarya keŋ akitijikin Aripasad, abu kilou ŋasigarya ka Aripasad daadaŋ kaapei ka ŋasigarya ŋuna ameto ŋaŋolei ka ŋuna adokito ŋagaari.

¹⁴Aŋun, abu Nebukadinesar kikama ŋitaunio ka Aripasad todol tari Ekibatana, kikama ŋaduketa keŋ ŋunajiet, toŋatana ŋiboro alomaketa keŋ kituruwo apolou ka Ekibatana acaryoit.

¹⁵Kikamu Nebukadinesar Aripasad alomoru a Ragau, toar a ŋakwaaras keŋ, tomunaiya iŋes jik.

¹⁶Ekaku toboŋosi nai Nebukadinesar Ninepe kaapei ka ŋasigarya keŋ ŋuna acununa anakiboisyo a ŋuna agelegelya, alalak ŋasigarya ŋun nooi. Apotu nai Nebukadinesar ka ŋasigarya keŋ kieŋut alo Ninepe kimwomworo ŋirwa amiat ka ŋatomoniarei.