Read ngakarimojong Yudis 10 Bible Online

Yudis 10 - ngakarimojong bible

Yudis 10

¹Kedau Yudis akigworo neni ka Akuj a Isirael ka kedau akirwor ŋakiro ŋun daadaŋ,

²abu tonyou aneni sek aperyo ebuburiyara. Tonyarau Yudis aketiyan keŋ totiyaar kai ŋina eboiyeneneo iŋes ŋirwa ŋulu a Sabato ka ŋirwa ŋulu a ŋasuban.

³Abu iŋes tolaca eguniya ŋolo anapit iŋes, tolaca daŋ ŋilowi keŋ ŋulu araakar apuserut, kiloŋar, ido kiwosakin akimyet ŋina epol egyelit. Abu kikyaara ŋitim keŋ, tonap akitambara anakou ka tonap ŋilowi ŋulu a ŋasuban ŋulu sek anapenene iŋes ŋirwa ŋulu ariŋakar ekile keŋ Manase eyari.

⁴Abu Yudis tonap ŋamuk, ŋinapen a ŋakejen, a ŋakan, ŋikabobooe, ŋikadoŋidoŋ ka ŋinapen keŋ daadaŋ ŋulu etiyaunitae anamoru a ŋuna epol egyelit. Aŋun, abu iŋes kisibus akuwan keŋ nooi, ikotere enirari ŋikilyok daadaŋ ŋulu iŋolikinete iŋes.

⁵Abu Yudis inak aketiyan keŋ ecwee ŋolo etiyaunitae a ejamu ŋolo eleleba epiini inak daŋ amot ŋina eleleba akimyet, kilelebik daŋ locwee ŋikinyom ŋulu eowatae, ŋaboboryo ŋuna arukitoe esibit ŋabisikotyo ka ŋamugati ŋuna ajokak. Toenik iŋes ŋiboro ŋul daadaŋ iwapei inak aketiyan keŋ kiwok.

⁶Toloto nai ikes ŋaarei lopuke ŋolo ke etaun a Besulia, toryamut Usia ewoi a nen kaapei ka ŋikasikou a etaun ka Kabris ta Karimis.

⁷Ani iŋolikinete ŋituŋa ŋul Yudis kilocokin ka enapit ŋilowi ŋulu egelaaka apotu ikes toumokis aŋuna a akibuses keŋ, ido temasi,

⁸“Ikilipi kitiya neni kon ejok Akuj atapapaa yok ka kisiyook ŋakiro ŋuna iyeunit iyoŋ akitiya, ikotere elelyanete Ŋisirael kitopoloosi Yerusalem.” Abu Yudis toryedik itopoloorit Akuj.

⁹Tolimok nai Yudis ŋituŋa ŋul tema, “Tolimokisi ŋituŋa toŋaasi epuke a etaun aŋuna kaŋ, ikotere ayoŋ olot kiŋa etiya ŋakiro ŋuna idaut iyes alimokin ayoŋ.” Aŋun, apotu ikes tolimokis ŋisorok aŋaar epuke a etaun aŋuna keŋ, lopite ŋolo eŋitar iŋes.

¹⁰Kedaut ikes akitiya ŋun, abu Yudis toloma kiŋa erukito ka aketiyan keŋ. Kiteosi ŋikilyok a etaun ikes tari ŋina adolioto ikes kwap emoru, totuboros anakadipaalat, neni pa apedoritotor ikes akiŋolikinia Yudis ka aketiyan keŋ.

¹¹Ani eriŋa Yudis ka aketiyan keŋ elosete anakadipaalat, kiryamas ka ŋasigarya ka Asiriya ŋuna emanimanete nen,

¹²kikamasi ŋasigarya ŋun Yudis yaasi toena iŋes. Kiŋita ikes iŋes temasi, “Ataŋae ŋituŋa kon ka ai ibunio iyoŋ ka ai ilosi iyoŋ?” Toboŋok Yudis tema, “Arae ayoŋ nakoku a Ŋiburaniyae, nai asiit ayoŋ aneni kec, anerae eapi akipotokin ikes neni kus aŋuna ka amunyaro.

¹³Alosi ayoŋ neni ka Oloperines a ekapolon a asigar kus, alimokin iŋes ŋakiro ŋuna a kire. Etoodikini ayoŋ iŋes neni emaikina iŋes kitor, kikama akwap daadaŋ ŋina a ŋikamukumukui, nyetwania tari ipei daŋ a ŋasigarya keŋ, nyikamar, kori nyeari.”

¹⁴Ani iirarete ŋikilyok ŋul ŋakiro a Yudis ka kedaut akiŋolikin ereet keŋ, ebus iŋes nooi iteete ikes, temasi neni keŋ,

¹⁵“Iiu iyoŋ akiyar kon aŋuna ikirikiriunor aanyun ekapolon kosi. Tolot atipei loeema keŋ, ikitenakinete ŋice kosi iyoŋ, ido ikiinakin iyoŋ neni keŋ.

¹⁶Ani iwoi iyoŋ alokiŋaren keŋ, nyikuryana alotau kon, nai tolimok iŋes ŋakiro ŋuna idau iyoŋ alimokin isua, ido itiyae iŋes ŋuna ajokak neni kon.”

¹⁷Toseut ŋasigarya ka Asiriya ŋun ŋikilyok amiat arukor kaapei ka Yudis ta aketiyan keŋ ka apotu yaasi ikes loeema a Oloperines.

¹⁸Tolakaros nooi ŋituŋa ŋul ka ajore a daadaŋ aŋuna alimokinere ikes aloeema a epei tari ŋoloce atemar adolu Yudis. Potu ŋasigarya daadaŋ tocununos kirimokis Yudis kidiŋ ewoi alokiŋaren eema ka Oloperines, idarit akitodol ŋina elimokinere Oloperines ŋakiro keŋ.

¹⁹Apotu ikes toumokis aŋuna ka akibuses a Yudis, kituro Ŋisirael etamete atemar ikwaan ikes ka Yudis. Kirworikinos ikes make ebasi, “Ŋae ejamuwari ŋituŋa ŋul ŋulu eyakatar ŋaberu ŋuna ikwaan ka aberu na lotuŋa kec? Nyiyookino akimyekin ipei daŋ a ŋikilyok kec eyari, anerae kimyekin iwon ikes ebucar epote ikes anirar ŋituŋa a akwap a daadaŋ.”

²⁰Apotu nai ŋasigarya ŋuna eyokiyete Oloperines ka ŋiketiyak keŋ daadaŋ tolomut kiŋa, ido kitenasi Yudis tooma eema.

²¹Aperi Oloperines alokitaada keŋ ieŋunit alotooma atoto ŋina ayeunitae a ŋanaŋgae a ŋuna asonyitae a ŋausi a ŋuna kipura-areŋak ka a egolid, a ŋamoru aŋuna enyaritae emerald ka ŋamoru ŋace ŋuna epol egyelit.

²²Ani elimokinio iŋes ŋakiro a Yudis, bu iŋes kiŋaren eema, tokoditetei ŋitaae ŋulu etiyaunitae a esilipa alokiŋaren keŋ.

²³Ani ebuni Yudis tooma neni ayai Oloperines ka ŋiketiyak keŋ, apotu ikes daadaŋ toumokis aŋuna ka akibuses a ereet a Yudis. Abu nai Yudis toper a akook kitopoloo Oloperines, nai apotu ŋiketiyak keŋ kitonyout iŋes.