Read ngakarimojong Yudis 11 Bible Online

Yudis 11 - ngakarimojong bible

Yudis 11

¹Tema nai Oloperines neni a Yudis, “Aberu, toen etau, nyikuryaniar alotau kon, anerae nyewana ayoŋ idiotuŋanan ŋini eseuni akitiyanakin Nebukadinesar erwosit a akwap a daadaŋ.

²Tari tokona daŋ, ani kerae nyakajamuwarito ayoŋ ŋituŋa kon ŋulu iboiyete anakwap a ŋina a ŋikamukumukui, pa kabunit ayoŋ akitijiore ikes. Ikes ŋilopeyek ayaut ŋakiro nu neni kec.

³Nai tokona, tolimokinae ayoŋ ŋakiro ŋuna isiunia iyoŋ aneni kec, ido bu neni kosi. Kikote ŋakiro ai daŋ, ibu iyoŋ naiuno. Toen etau! Irubakini iyoŋ iyari takae nakwaare ka ŋarwa ŋace ŋuna epote.

⁴Mam ituŋanan ikiwani iyoŋ. Nai itiyaete daadaŋ ŋuna ajokak neni kon, lopite ŋolo itiyaata ŋiketiyak a ekapolon kaŋ a erwosit Nebukadinesar.”

⁵Tolimok Yudis Oloperines tema, “Tocamu ŋakiro a apito kon ka kimyekinae ayoŋ aketiyan kon erwor alokiŋaren kon. Nyalimokini ayoŋ ŋakiro ŋadi ŋuna ka alyokonu neni a ekapolon kaŋ tokona nakwaare.

⁶Ani kiwuap iyoŋ ŋakiro a aketiyan kon, isiyookini Akuj ŋakiro ŋadi aneni kon, ido nyikipiyori iyoŋ ekapolon kaŋ ikisiyookini ŋakiro ŋuna icamit iyoŋ akitiya.

⁷Ekoŋi ayoŋ neni kon alimit akiyar ka agogoŋu a Nebukadinesar a erwosit akwap a daadaŋ ka a apedor a ŋolo ikiyakuunit iyoŋ akirik ŋisubuna daadaŋ ŋulu eyarete; meere ŋituŋa bon itiyanakinete iŋes aŋuna kon, nai ŋityaŋ ŋulu ka ariet daŋ, ŋaatuk ka ŋikyeny eyarete aŋuna ka apedor kon, a ŋina itupitor Nebukadinesar anapolou ka ŋituŋa a ekal keŋ daadaŋ;

⁸anerae eirar isua ŋuna ka aosou ka apiiryanut kus ka elimoritae anakwap a daadaŋ atemar iyes bon ijokak nooi anapukan a daadaŋ, iyes iyenete ŋakiro nooi ka iyenete ejie ejok nooi.

⁹“Ani eruwor ŋakiro ŋuna erworo Akior anatukot kon, eirar isua ŋakiro keŋ, anerae apotu ŋituŋa a Besulia nyeara iŋes, ido abu iŋes tolimok ikes ŋakiro daadaŋ ŋuna abu iŋes ikilimok iyes.

¹⁰Aŋun, ekapolon ka ekarikon, nyijamuwa ŋakiro ŋuna alimuni Akior, nai kiricak ikes alotau kon, anerae erae ŋuna a kire. Kire jik, nyepedoryo akisican akwap kosi ka nyepedoryo akiar ŋituŋa kosi a ekileŋ tomunyarae, mati esecito ikes neni ka Akuj kec.”

¹¹“Nai tokona, ani pa kicamit iyoŋ ikiloun ekapolon kaŋ ka nyekuruworosi ŋuna ilosikinit iyoŋ akitiya, edolokini ikes atwanare, anerae aapuu ikes akisec, ido kitoŋoa Akuj kec apaki ŋina itiyaata ikes ŋakiro ŋuna nyiyookino.

¹²Ikwapei adaunor akimuj kec ka aapuunia ŋakipi kec daŋ adaun, ayeut ikes akiar ŋaatuk kec ka acamut akinyam ibore daadaŋ ŋini eŋerit Akuj alokisila keŋ ikes enyamete.

¹³Atubut ikes akirikar ŋaraito a ŋikinyom kec ŋuna eŋarenok ka atutubet apei alotooma ŋitomon a epiini, a akimyet, ŋulu aris ikes kitaleiyosi ka kiŋadaasi aŋuna a ŋisacaradotin a ŋulu itiyaete Kai ka Akuj kosi alo Yerusalem, ŋiboro ŋulu italeo ituŋanan idio tari akitap a ŋakan keŋ.

¹⁴Ikwapei itiyata ŋituŋa alo Yerusalem daŋ ŋakiro ŋun, apotu ikes kiyakiyasi ŋituŋa Yerusalem akiŋita ŋun ikotere ecamakini atukot a ŋikasikou ikes akitiya ŋun.

¹⁵Ani eayete ŋituŋa ŋulu iyakitae Yerusalem ŋakiro neni kec, ido kitiyata ikes ŋun, akoloŋit ŋinapei ŋin ipotokinio ikes napedor kus ikotere tomunyarae.

¹⁶“Aŋun, ani ayenuni ayoŋ aketiyan kon ŋakiro ŋun daadaŋ, abu ayoŋ osi aneni kec. Ekeyakuu Akuj ayoŋ akitiyakin kaapei ka iyoŋ ŋakiro ŋuna itubulete ŋituŋa anakwap a daadaŋ aneni daadaŋ iiraryata ŋituŋa ŋakiro ŋun.

¹⁷Arae ayoŋ aketiyan kon ituŋanan kire ŋini itopoloorit Akuj ka etiyanakini Akuj ŋina anakuj nakwaare ka naparan. Aŋun, ekapolon kaŋ, arubakini ayoŋ ikiboi ka iyes, nai aŋinakoloŋit nakwaare alosi ayoŋ aketiyan kon nakadipaalat akilip neni ka Akuj. Akalimokini iŋes ayoŋ akoloŋit ŋina eseceta ikes.

¹⁸Abuni nai ayoŋ okolimok iyoŋ, ikotere nai iyoŋ ilosete kaapei ka ŋasigarya kon daadaŋ, mam ipei daŋ kec epedori awoikin iyes.

¹⁹Eketeni nai ayoŋ iyes alo Yudaya daadaŋ tari ŋina idolyoto iyes Yerusalem, ewuakini ayoŋ nen toruwor neni ipukator iyoŋ. Iritari iyoŋ ikes a nen esibito ŋamesekin ŋuna emam ekeyokon ka mam iiŋok ikiŋoorokini iyoŋ, anerae aberakinoi alimokin ayoŋ ŋun, ikotere ayenunia ayoŋ ikes ekiŋaren eriŋa nyitiyakina, aponi okolimokin ayoŋ, ido aponi ekeyakuun alimokin iyoŋ.”

²⁰Apotu ŋakiro a Yudis kitalakasi Oloperines ka ŋiketiyak keŋ daadaŋ. Apotu ikes toumokis aŋuna ka aosou keŋ temasi,

²¹“Ameun alowae a akwap a epei tari ŋoloce mam aberu ibus ikwaan ka iŋes, kori irworo ka aosou ikwana!”

²²Tema nai Oloperines neni a Yudis, “Etiya Akuj ejok aŋuna ikiyakuunia iyoŋ aŋuna a ŋituŋa kon, akitogogoŋ isua ka amunyar ŋulu apotu tojamuwasi ekapolon kaŋ.

²³Meere akibuses bon ibus iyoŋ itakani nai irworo daŋ ŋuna ka aosou. Ani kitiya iyoŋ lopite ŋolo ilimunio iyoŋ, eruwor Akuj kon ŋina kaŋ ka ibuni iyoŋ akiboi alokai a apukan a Nebukadinesar ka ikituruunio iyoŋ anakwap a daadaŋ.”