Read ngakarimojong Yudis 12 Bible Online

Yudis 12 - ngakarimojong bible

Yudis 12

¹Abu nai Oloperines tolimok ŋituŋa akiya Yudis neni eya ŋiboro keŋ ŋulukimujet ŋulu etiyaunitae a egolid ka tolimok ikes kitemokis akimuj a ŋuna keŋ kitemokis daŋ ŋamuja keŋ ŋuna ajokak ka ainakin iŋes epiini keŋ tomat.

²Nai tema Yudis, “Nyemuji ayoŋ ŋamuja nu, kemuj ayoŋ eruwor asecenu, nai emuji ayoŋ ŋamuja ŋuna ayauni ayoŋ.”

³Tolimok Oloperines iŋes tema, “Ani kedaun akimuj kon, ai eryamunere isua akimuj ŋina ikoni nen aŋuna kon? Anerae emam ŋituŋa kon eya ne ka isua.”

⁴Toboŋok Yudis tema, “Ikwapei iyarya iyoŋ, ekapolon kaŋ, nyerikari ayoŋ akimuj ŋina ayaunit ayoŋ aketiyan kon eriŋa Ekapolon nyitiyakina a ŋakan kaŋ ŋakiro ŋuna elosikinit iŋes.”

⁵Apotu nai ŋiketiyak ka Oloperines yaasi Yudis tooma eema, ido abu iŋes toper nen akitodol kidiŋ akuwar. Ani eapuuni akiwalar, tonyou Yudis,

⁶kiyakiya ituŋanan neni ka Oloperines alimokin iŋes ebe, “Ekelipit iyoŋ ekapolon kaŋ, tolimu atemar ekemyekin ayoŋ aketiyan kon olot kiŋa elip.”

⁷Aŋun, abu Oloperines tolimok ŋasigarya ŋuna eyokiyete iŋes kimyekis Yudis tolot. Kiboi Yudis anajore a ŋin, ŋirwa ŋiuni. A ŋinakuwar nakwaare alosenene iŋes kiŋa nakadipaalat ŋina a Besulia, kiloŋar alolelya a ŋolo ayai neni eboiyo ajore.

⁸Kedau akiloŋar, elipenene iŋes neni ka Akuj a Ŋisirael akiten iŋes ikotere ilounete Ŋisirael ŋimoe kec.

⁹Ekaku aboŋonori iŋes akiboi aloeema akitodol ŋina imuja iŋes akimuj keŋ eapiyari akoloŋ adoiyor.

¹⁰Ani epete ŋirwa ŋiomwon toyakaunor Oloperines ŋasuban aŋuna bon a ŋituŋa a ŋulu etiyanakinete iŋes abu iŋes nyenyerau edio a ŋikapolok a ŋasigarya keŋ.

¹¹Tolimok Oloperines Bagoas ŋolo arae ekolup ŋolo apolokinit ŋakiro a Oloperines tema, “Ape kimaimau aberu ŋinaburaniyait ŋina iyoki iyoŋ bu akimuj ka akimat kaapei ka isua,

¹²anerae eruwor ŋileec nooi kimyekin iwon aberu ŋina ikoni ŋin tolot pa iryamakina ka ekile. Pa kisupun iwon iŋes ebuni iŋes akyenar iwon.”

¹³Aŋun, abu Bagoas tolot aneni ayai Oloperines, tolot neni a Yudis tolimok iŋes tema, “Elipi nyiŋayaŋaya iyoŋ apese na ŋina ebusan na alosit neni a ekapolon kaŋ toruwor ŋina ikitopolooritae aŋuna iyakaunor diyete keŋ, ido olelyana kaapei ka isua ikimasi epiini ka toruwor nakoloŋit na apei anaberu ka Asiriya ŋina itiyae kai a erwosit Nebukadinesar.”

¹⁴Tolimok Yudis iŋes tema, “Ŋae ayoŋ aŋeri ŋakiro a ekapolon kaŋ? Ŋuna daadaŋ ejoikinito iŋes etiyae ayoŋ atipei ka eruwor alakara aneni kaŋ akitodol akoloŋit ŋina ka atwanare kaŋ.”

¹⁵Togeik nai Yudis akinap ŋilowi keŋ ka ŋiboro daadaŋ ŋulu esireneneo aberu. Abu aketiyan keŋ kiŋareniyo, ido abu topetak kiŋaren Oloperines aŋuna a Yudis ŋilowi a ŋikaalei a ŋulumesekin ŋulu esitiyae Yudis aperio.

¹⁶Bu nai Yudis, toper alokwap. Tolelyan Oloperines alotau keŋ aŋuna a Yudis, toyakaunor ekibure, anerae ewarit sek iŋes apaki ŋina isupunia Yudis ameun akoloŋit ŋina esyaunan ŋina eŋolikinia iŋes Yudis.

¹⁷Tema nai Oloperines neni a Yudis, “Tomata epiini olelyana kaapei ka isua.”

¹⁸Tolimok Yudis iŋes tema, “Okoe ekapolon kaŋ, amasi ayoŋ ka alakara, anerae erae na akoloŋit ŋina apolon nooi anakiyar kaŋ a daadaŋ.”

¹⁹Tolemu nai Yudis akimuj ŋina etemokinit aketiyan keŋ, kimuj ka tomat alokiŋaren Oloperines.

²⁰Tolakar Oloperines nooi aŋuna a Yudis, ido tomat epiini ŋolo alalan nooi ŋolo emam akoloŋit amasitor iŋes etya nen ŋinapei edounere iŋes.