Read ngakarimojong Yudis 13 Bible Online

Yudis 13 - ngakarimojong bible

Yudis 13

¹Ani ewari akwap toloto ŋipi ka Oloperines daadaŋ, togolok Bagoas epuke a eema alokiŋa, togolo kiŋa ŋiketiyak aneni a ekapolon keŋ. Toloto ikes akiper aŋuna aupitor ikes daadaŋ, anerae apotu ikes kitiyata ŋasuban apaki ŋina aoyan.

²Nai aponi kimyekinae Yudis bon alotooma eema ka Oloperines ŋolo aperi alokitaada keŋ ilesiyara, anerae amera iŋes nooi.

³Aris sek Yudis kelimoki aketiyan keŋ akiwo alokiŋa agule ŋina eperyo ka akidarun iŋes apaki ŋina elomunia kiŋa lopite ŋolo etiyanenea iŋes ŋirwa ŋuluce, anerae alimokinit Yudis aketiyan keŋ atemar elosi iŋes akilip. Aris Yudis kelimoki Bagoas daŋ ŋakiro ŋunapei ŋun.

⁴Aŋun, apotu ŋituŋa daadaŋ tolomasi kiŋa ka mam ituŋanan abu kidoŋ nagule ŋina eperyo kerae icaryoit, kori ŋini itopolooritae. Towo nai Yudis alodiyete ekitaada a Oloperines tolimu alotau keŋ bon tema, “Okoe Ekapolon Akuj ŋina ka apedor a daadaŋ, kiŋolik alosaa alo etic a ŋakan kaŋ aŋuna ka akitopolooro a Yerusalem.

⁵Erae tokona lo esaa kire ŋolo kiŋarakinet ŋituŋa kon ka ŋolokisiyookinet ŋakiro ŋuna ayeunit ayoŋ amunyarya ŋimoe ŋulu ikimanito isua.”

⁶Abu nai iŋes tolot lopir a ekitaada diyete neni ayai akou ka Oloperines, ido tolemu ekileŋ a Oloperines ŋolo enenetoi nen.

⁷Toapu iŋes nakou a Oloperines, totiŋ ŋitim a akou a Oloperines, ido tema, “Okoe Ekapolon Akuj a Isirael, inakinae ayoŋ agogoŋu nakuwar na!”

⁸Abu nai Yudis toduŋ edokole a Oloperines a agogoŋu keŋ a daadaŋ ŋarwa ŋaarei, ido totubo akou keŋ.

⁹Ekaku kikokoriyo akuwan ka Oloperines alokitaada, ido kiriu kwap ŋanaŋgae ŋuna adukunitoe esibit atoto. Atipei ekaku a ŋun, tolomu iŋes kiŋa, inak akou a Oloperines neni a aketiyan keŋ

¹⁰a ŋina abu kijau kiwuak locwee keŋ ŋolo ka akimuj. Toloto nai ikes ŋaarei kiŋa kaapei, lopite ŋolo sek etiyaeneniata elosete akilip. Kitoro ikes kidiŋ ajore, kirimokis akadipaalat, ido kitipeiyosi lomoru toloto Besulia todolut lopuke a etaun.

¹¹Ani eriŋa ikes elwaka alotaun, tonyara Yudis ŋiketeok etaun ŋulu aya lopuke ebala, “Toŋaasi epuke! Ikirukit iwon ka Akuj, Akuj yok, eriŋa itoodiunit apedor keŋ alo Isirael ka eriŋa itoodiunit agogoŋu keŋ neni a ŋimoe yok, lopite ŋolo etiyakinia nakoloŋit na.”

¹²Ani iirarete ŋituŋa a etaun keŋ etoil a Yudis, kiwonyut, totiyaunos lopuke a etaun ido tonyaraut ŋikasikou a etaun.

¹³Tomotunos ikes daadaŋ, tocununos iwapei ŋicaryo ka ŋulu itopolooritae, anerae atakani esibit pa anupito ikes atemar aboŋu Yudis. Toŋaasi ikes epuke, ido kijaut Yudis ka aketiyan keŋ tooma etaun. Kinokakis nai ikes akim aŋuna ka akica, ido kirimokis ikes kidiŋ.

¹⁴Tolimok nai Yudis ikes ecela nooi tema, “Kipuro Akuj, okoe kipuroe iŋes! Kipuroe Akuj ŋina nyinyakara akisyon keŋ aneni a Ŋisirael, nai amunya ŋimoe yok a akan kaŋ akoloŋit na nakwaare!”

¹⁵Tolemu nai iŋes akou a ituŋanan alocwee keŋ kitoodik ikes tema, “Kiŋoliutu ne, erae na akou a Oloperines a ekapolokiniton a ŋasigarya ka Asiriya ka erae na anaŋga ŋina adukunitere neni aperyo iŋes emera nooi. Aar Ekapolon iŋes a akan a aberu.

¹⁶Ikwapei eyarya Ekapolon, ŋolo abu ekeyok ayoŋ aneni alosit, ekoŋi ayoŋ atemar arae ereet kaŋ iŋes abu kisupa iŋes tari natwanare keŋ ka nyeseca ayoŋ ka iŋes ka nyiryamakina aŋuna ka akisirum ayoŋ ŋileec.”

¹⁷Apotu ŋituŋa daadaŋ toumokis nooi. Apotu ikes kijuuroto kilipa neni ka Akuj, ido tolimut daadaŋ ecamuna temasi, “Ikipuroe iyoŋ Akuj kosi, ŋina nakoloŋit na isirum ŋileec ŋimoe a ŋituŋa kon.”

¹⁸Tema nai Usia neni a Yudis, “Okoe nakoku, ikiterereŋit iyoŋ Akuj ŋina alokidiama nooi akilo ŋaberu daadaŋ anakwap, ido elipi kipuroe Ekapolon Akuj ŋina asubuni nakuj ka akwap, ŋina abu ikiten iyoŋ totub akou a ekarikon a ŋimoe yok.

¹⁹Nyedaun akipuro iyoŋ aneni a daadaŋ a ŋulu etamunito apedor a Akuj.

²⁰Elipi kituruwo Akuj nu ŋuna ikitopolooritere iyoŋ ŋikaru ka ŋikaru ka elipi ikirop iŋes iyoŋ a ŋarereŋisyo, anerae ibu iyoŋ tojal akiyar kon apaki ŋina ajamuwaritere akwap yok ka ibu iyoŋ kilocok amunyaro yok, toyar jik iyookino alokiŋaren Akuj yok.” Tolimut ŋituŋa daadaŋ temasi, “Amen! Amen!”