Read ngakarimojong Yudis 14 Bible Online

Yudis 14 - ngakarimojong bible

Yudis 14

¹Tolimok nai Yudis ikes tema, “Ŋikonei kaŋ topupokinae ayoŋ. Yaasi akou na kinenekis narwatata.

²Ani iwalari akwap ka ecaikini akoloŋ, emaikina ŋinituŋanan kus tolemu ŋiboro keŋ ŋulujiet ka emaikina ŋikilyok daadaŋ ŋulu epedorito ejie toloto kiŋa etaun, toseut ekarikon kec, tosub itiyaara iyes nakadipaalat akitijikin ŋasigarya ka Asiriya ŋuna eya kiŋa neni iboiyo ajore kec, nai nyitiyaarosi.

³Elemunete nai ikes ŋiboro kec ŋulujiet toloto najore kec akitonyoun ŋikapolokinitok a ŋasigarya ka Asiriya. Eemete ikes loeema a Oloperines, ido nyeryamunete iŋes. Ebuli nai ikes ka eemete alokiŋaren kus.

⁴Ilosete nai iyes daadaŋ ka ŋituŋa daadaŋ ŋulu eya nawaetin a Isirael neni kec kiwuapakis ikes, toara ikes ekerete.

⁵Nai ani eriŋa iyes nyitiyakina ŋun daadaŋ, yautu mono neni kaŋ Akior ŋolo erae Eamonait ikotere iŋes iŋolikini ka toyen ekile ŋolo ajamuwarit Ŋisirael ka kiyaku iŋes neni yok esibit arae ayakyan ŋin aŋuna ka atwanare a ŋolo eyakuunit iŋes.”

⁶Aŋun, apotu ikes tonyaraut Akior alo kai a Usia. Ani ebuni iŋes ka iŋolikini akou a Oloperines etiŋit ekile epei anatukot a ŋituŋa, toramakin kwap todo aloreet irakara.

⁷Ani ikeunete ikes iŋes kidiama, abu Akior toramakin nakejen a Yudis, kitopoloo iŋes tema, “Irereŋ iyoŋ alokalya a Yuda a daadaŋ. Ebuli ŋituŋa daadaŋ anakwapin a daadaŋ ŋulu iirarete ekiro kon.

⁸Tokona, tolimokinae ayoŋ ŋuna ibu iyoŋ kitiya alorwa a ŋul.” Aŋun, abu Yudis tolimok iŋes alokiŋaren ŋituŋa ŋakiro daadaŋ ŋuna abu iŋes kitiya ameun akoloŋit a ŋina alosyo iŋes najore a ŋituŋa ka Asiriya akitodol apaki na ŋina erworor iŋes neni kec.

⁹Kedau iŋes alimun ŋakiro ŋun daadaŋ, tocelut ŋituŋa nooi, tocelut elelyanete alotaun kec.

¹⁰Ani iŋolikini Akior ŋakiro daadaŋ ŋuna abu Akuj a Isirael kitiya, abu tonup nooi neni ka Akuj. Aŋun, aponi kileŋerae iŋes, toruwor epei a Ŋisirael, kiboi erae Esiraelit akitodol tari nakoloŋit na.

¹¹Ani ereŋuni akide, eapuuni akiwalar, kinenekis ikes akou a Oloperines kidiama arwatata a etaun. Tolemut nai ikes daadaŋ ŋiboro kec ŋulujiet, toloto a ŋatuketa lorotin ŋulu a emoru.

¹²Ani iŋolikinete ŋasigarya ka Asiriya ikes kiyakiyasi ituŋanan alimokin ŋikarikok a ŋajorei kec toloto nai ŋul tolimokis ŋikapolok a ŋajorei, ŋikarikok ka ŋikapolok ŋuluce daadaŋ.

¹³Toloto ikes loeema a Oloperines tolimokis eketiyan ŋolo apolokinit ŋakiro a Oloperines daadaŋ temasi, “Kitekyenyu ekapolon kon, anerae atitinyoto ŋipi ka atiyaunosi akitijikin iwon, ikotere emunyarotor jik.”

¹⁴Aŋun, abu Bagoas tolot kikoŋikoŋok epuke ŋolo elomarere loeema, anerae atami iŋes atemar eyakasi iŋes tooma kaapei ka Yudis.

¹⁵Nai ani edaun ituŋanan ŋini abu toboŋok iŋes, abu iŋes toŋaa epuke toloma nagule ŋinaperot, toryamu iŋes Oloperines iletete alokwap etwanit ka emam akou keŋ.

¹⁶Kiworou iŋes ecela nooi, kigwor ka toumen ka tocelu, ido tocilicili ŋilowi keŋ.

¹⁷Tolot nai Bagoas loeema ŋolo sek eboiyo Yudis, ani eryamuni iŋes emam, tomotun neni aya ŋituŋa tocelu tema,

¹⁸“Kikiŋalaasi ŋipi iwon! Ayau aberu a Ŋiburaniyae apei ŋileec lotuŋa a ekal a erwosit Nebukadinesar. Kiirasi, eperi Oloperines alokwap, ido emam akou keŋ!”

¹⁹Ani iirarete ŋikarikok a ŋasigarya ka Asiriya ŋakiro ŋun, apotu tocilicileta ŋisatyo kec, ido abu tokadak nooi, todol akigworo kec ka ecelet kec neni daadaŋ eboiyo ajore kec.