Read ngakarimojong Yudis 15 Bible Online

Yudis 15 - ngakarimojong bible

Yudis 15

¹Ani iirarete ŋasigarya ŋuna aya loeemae ŋakiro ŋun, toumokis aŋuna a ŋakiro a ŋuna apotu kitiyakin.

²Aŋuna aponiata ikes tokuryaketa ka tomarana, apotu nyidara ŋuluce, nai apotu daadaŋ tobwaŋas kaapei, toem ŋinituŋanan a keŋ, kitoro lorotin daadaŋ totuboros anadipo a emoru totuboros anakwap a ŋina a ŋikamukumukui.

³Toema ŋulu eboiyorito lokamukumukui ŋulu alodiyete Besulia daŋ. Apotu nai Ŋisirael daadaŋ ŋulu arae ŋasigarya toema neni a ŋasigarya ka Asiriya.

⁴Kiyakiya Usia ŋikilyok Betomasisaim, Koba ka Kola ta lokukorin a Isirael daadaŋ, alimokin ŋituŋa ŋulu eboiyete a nen ŋakiro ŋuna etiyakin ka alimokin ikes daadaŋ amotun lomoe ka amunyar ikes.

⁵Ani iirarete Ŋisirael ŋakiro ŋun, tocamunos daadaŋ toloto lomoe, toara ŋimoe akitodol Koba. Apotu Ŋisirael ŋulu eboiyete alo Yerusalem daŋ ka anakiboisyo daadaŋ a akwap a ŋina a ŋikamukumukui potu, anerae keponi tolimokinae ikes daŋ ŋakiro ŋuna kepotu kitiyakin najore a ŋimoe. Apotu ŋikilyok a Gilead ka Galileya kilout ŋimoe toara nooi todolo tari Damasko ka lokukorin keŋ.

⁶Apotu ŋituŋa a Besulia ŋuluce toloto najore a ŋituŋa ka Asiriya, toŋatasi ŋiboro a nen, toryamut ebari ŋolo alalan.

⁷Ani eboŋunete Ŋisirael anakiar ŋimoe toŋatasi ŋiboro ŋulu edoŋito. Apotu tari ŋituŋa ŋulu a ŋirerya ka a ŋitaunio a akwap a ŋina a ŋikamukumukui ka ŋulu ka adipo a emoru toŋatasi ŋiboro ŋulu alalak nooi, anerae alalak ŋiboro a ŋituŋa ka Asiriya nooi.

⁸Abu nai Yoakim esacaradoti ŋolo apolon nooi kaapei ka ŋikasikou a Ŋisirael a ŋulu eboiyete alo Yerusalem, potu akiŋolikin ŋakiro ŋuna ajokak ŋuna abu Ekapolon kitiya aŋuna a Ŋisirael ka akiŋolikin Yudis ka agatakin iŋes ajokis.

⁹Ani iryamunosi ikes ka Yudis, apotu ikes daadaŋ kiterereŋo iŋes eyakatar acamuna apei temasi kaapei, “Irae iyoŋ akica a Yerusalem, iyoŋ irae aberu ŋina iturotor Ŋisirael nooi, erae iyoŋ ituror akwap kosi nooi.

¹⁰Itiya iyoŋ ŋun daadaŋ a akan kon a alope, itiya iyoŋ ajokis ŋina apolon nooi neni a Ŋisirael, ido elakara Akuj aŋuna a ŋakiro a ŋuna itiya iyoŋ. Ikilipi ikiterereŋ iyoŋ Ekapolon ŋolo etiron ŋikaru ka ŋikaru!” Temasi ŋituŋa daadaŋ, “Amen.”

¹¹Torubakis ŋituŋa eŋasete ŋiboro aneni sek eboiyo ajore a ŋasigarya ka Asiriya toŋata ikes ŋiboro ŋirwa ŋatomoniuni. Apotu ŋituŋa inakis Yudis eema a Oloperines ka ŋiboro keŋ daadaŋ ŋulukimujet, ŋulu etiyaunitae a esilipa, ŋikitaadae keŋ, ŋabakulei keŋ ka ŋikicoloŋo ka ŋimesae keŋ daadaŋ. Abu Yudis ya ŋiboro ŋul daadaŋ kisiwok ŋaŋolei-sigirya keŋ, kidokok ŋice nagaari.

¹²Tocununos ŋaberu a Isirael daadaŋ akiŋolikin Yudis, kiterereŋo iŋes, kidoŋata ŋace kec itopoloorito Yudis. Tolemu Yudis ŋamaŋgili ŋuna anapit anakan keŋ tokorak ŋaberu ŋuna arukito ka iŋes,

¹³ido abu Yudis ka ŋituŋa ŋulu arukitotor iŋes kiwuakis ŋakwii a ŋikito a Olipa nakyes kec. Kiŋarenik iŋes ŋituŋa daadaŋ alodoŋa, iŋarenikinit ŋaberu ŋunace, ido kiwuapito Ŋisirael ŋulukilyok ikes, etiŋito ŋiboro kec ŋulu ke ejie, tonapito ŋatur ka ŋakwii ka toeos ŋieosyo.

¹⁴Togeik Yudis aeo eete keŋ lo ŋolo ka alakar neni ka Akuj alokiŋaren Ŋisirael daadaŋ, ido apotu ŋituŋa daadaŋ toeikis eete lo ŋolo ka akipuro.