Read ngakarimojong Yudis 16 Bible Online

Yudis 16 - ngakarimojong bible

Yudis 16

¹Tolimu Yudis tema, “Togeutu aeore eete neni ka Akuj kaŋ iramete ŋiburin, toekisi neni ke Ekapolon kaŋ iramete ŋitworoi. Toeikisi neni keŋ ekiruk ŋolokitete. Kitopoloosi iŋes ka tonyarata ekiro keŋ;

²anerae erae Ekapolon Akuj ŋina ilouni alojiesyo iwuakini iŋes ajore keŋ lotuŋa keŋ, abu iŋes okolaku ayoŋ anapedor a ŋulu ekemanito ayoŋ.

³Apotu ŋituŋa ka Asiriya totiyaunos alomoru a ŋulu alo Kuju, abu ekapolon a ŋasigarya ka Asiriya bu erikit ŋasigarya ŋuna nyimarun, apotu ikes toburusiyasi ŋayona, kilelebun ŋasigarya kec ŋuna emeto ŋaŋolei ŋimukura.

⁴Abu iŋes kiturokin tolimu atemar ecunyari akwap kaŋ ka eari ŋisorok kaŋ a ekileŋ, ido idesyanakini ŋidwe kaŋ ŋulu enakete kwap, ido aŋatari ŋidwe kaŋ ka arikori erae ŋakinyasuna ŋapesur kaŋ ŋuna nyiryamakina ka ŋikilyok.

⁵Nai abu Ekapolon ŋolo etiron tomunaiya ikes a akan a aberu,

⁶anerae pa arae ŋisorok aarete arwonit kec ŋolo etiron, meere tari ŋituŋa a Titanis aarete iŋes, meere tari ŋituŋa ŋulu aoyak toburok apotu toloto neni keŋ, nai arae Yudis nakoku a Merari iŋes aari iŋes a akibuses a ereet keŋ.

⁷Abu iŋes tolaca ŋilowi keŋ ŋulu a apuserut aŋuna ka akitopoloorya ŋulu esicanitae alo Isirael. Abu iŋes kiosak akimyet ŋina akukunyon loreet keŋ;

⁸abu iŋes toen ŋitim keŋ a akitambara, ido tonap ŋilowi ŋulu amilimilak aŋuna ka akisupunia iŋes.

⁹Apotu ŋamuk keŋ tonirasi ŋakonyen a ekapolon a ŋol, kikama akibuses a Yudis ŋatameta keŋ, ido abu ekileŋ totub edokole keŋ.

¹⁰Apotu Ŋiperisan tomarana aŋuna ka atitinyu keŋ, toumokis Ŋimedes aŋuna pa akuryania iŋes.

¹¹Apotu nai ŋituŋa kaŋ ŋulu esicanitae tocelut, apotu ŋituŋa ŋulu epalag kiworout ka apotu ŋimoe tomaranikis; apotu ŋituŋa kaŋ tocelut nooi, ido aponi tobwaŋae ŋimoe toboŋosi.

¹²Apotu ŋidwe ŋulusapa ŋulu a apito kicuma ikes ka towana ikes esibito ŋidwe a ŋituŋa a ŋulu irimito; apotu ikes totwaka alokiŋaren ŋasigarya a Ekapolon kaŋ.

¹³Aeikini ayoŋ neni a Akuj kaŋ eete ŋolokitete. Okoe Ekapolon, ipol iyoŋ ka epol akica kon, irae iyoŋ ŋolo igogoŋ ka ŋolo nyitakani.

¹⁴Emaikina ŋisubuna kon daadaŋ ikitiyanakis iyoŋ, anerae ibu iyoŋ tolimu akirot, ido toyakaunos ikes. Ibu iyoŋ kiyaku etau kon, ido toyeu ikes; mam ibore ipiyori ŋakiro kon;

¹⁵anerae itamaranikinio ŋimoru tari nakisyakineta kec kaapei ka ŋakipi; etalarete ŋatabab alokiŋaren kon ikwa amanok. Nai isyoni iyoŋ ŋulu ikitopoloorito iyoŋ;

¹⁶anerae erae ŋamuronisya daadaŋ ŋuna erae ŋainakineta ŋuna ebob eure ibore ŋini edit, erae asepwae daadaŋ ŋina ka ainakinet a ŋina epeyo ibore koŋin ŋini edit; nai ŋini itopoloorit Ekapolon, epol iŋes ŋikaru ka ŋikaru.

¹⁷Ekaŋ iyes ŋakwapin ŋuna itijikinete ŋituŋa kaŋ! Inyaŋari Ekapolon ŋolo etiron ŋakiro kec akoloŋit ŋina ka atubokino; iyakuuni iŋes akim ka ŋikur nawat kec; igworete ikes eryebasi ŋikaru ka ŋikaru.”

¹⁸Ani edolunete ikes Yerusalem, apotu kilipa neni ka Akuj. Apaki ŋinapei etaleunere ŋituŋa, apotu inakis ŋainakineta ŋuna epeyo, ŋainakineta ŋuna alemunete ikes ka acamit kec ka ŋainakineta kec.

¹⁹Abu Yudis daŋ kitaleik neni ka Akuj ŋiboro a Oloperines daadaŋ ŋulu apotu ŋituŋa inakis iŋes ka anaŋga ŋina abu iŋes ya anagule a ŋina aperi Oloperines, abu iŋes inak ŋin erae ainakinet aŋuna ka akikoŋiet.

²⁰Torubakis ŋituŋa itiyaete ŋasuban alo Yerusalem ŋilapyo ŋiuni alokiŋaren akibois ŋina asegan, ido abu Yudis torubak iboiyete ka ikes.

²¹Ekaku aŋun, toboŋosi ŋituŋa daadaŋ lorerya kec ka nakiboisyo kec. Toboŋo Yudis Besulia, kiboi anakibois keŋ. Ŋirwa ŋulu ka akiyar keŋ ŋul daadaŋ etopolooritae iŋes anakwap kec a daadaŋ.

²²Acamito ŋikalalak akiit iŋes, nai nyecamuna iŋes ekile edio anakiyar keŋ a daadaŋ ekaku a atwanare a Manase alokile keŋ ka aponi tonukae iŋes neni anukitae ŋituŋa keŋ.

²³Torubak arwonu a Yudis iyata jik ka tomojoŋ alokai alokile keŋ, todolo ŋikaru keŋ amiat ka ŋikan. Abu Yudis kimyek apito keŋ tolot. Abu nai iŋes totwana alo Besulia ka aponi tonukae iŋes naturukan a Manase alokile keŋ.

²⁴Kigworo Ŋisirael Yudis ŋirwa ŋikanikaarei. Ani eriŋa iŋes nyetwana, abu tokorak ŋiboro keŋ daadaŋ neni a ŋiyeneta a Manase alokile keŋ ka neni a ŋiyeneta keŋ a alope.

²⁵Mam ituŋanan ice nabo abu inak Ŋisirael ekabule alorwa a Yudis, kori ŋirwa ŋulu alalak ekaku a atwanare keŋ.